2 صَمُوِيل 7 - الكتاب المقدس بالعربي الدارجي هنا تشاد

دَاوُد دوّر يبْني بيت للّه

¹ وَ بَعَدْ اللّٰهْ نَصَرَهْ لِلْمَلِكْ دَاوُدْ فِي كُلَّ عُدْوَانَهْ الْمُجَاوِرِينَهْ، خَلَاصْ هُو سَكَنْ فِي بَيْتَهْ بِالسَّلَامَةْ.

² وَ يَوْم وَاحِدْ، الْمَلِكْ قَالْ لِلنَّبِي نَاتَانْ: «شِيفْ، أَنَا سَاكِنْ فِي بَيْت جَمِيلْ هَنَا حَطَبْ الْأَرْز. وَ لَاكِنْ صَنْدُوقْ الرَّبّ قَاعِدْ فِي خَيْمَةْ بَسْ.»

³ وَ نَاتَانْ رَدَّ لِلْمَلِكْ وَ قَالْ: «أَمْشِي سَوِّي كُلَّ شَيّءْ الْفِي قَلْبَكْ أَشَانْ اللّٰهْ مَعَاكْ.»

⁴ وَ لَاكِنْ فِي اللَّيْلَةْ دِي، اللّٰهْ حَجَّى لِنَاتَانْ وَ قَالْ:

⁵ «أَمْشِي قُولْ لِعَبْدِي دَاوُدْ: ‹دَاهُو اللّٰهْ قَالْ: ”دَا مَا إِنْتَ التَّبْنِي لَيِّ بَيْت الْأَنَا نَسْكُنْ فَوْقَهْ.

⁶ أَشَانْ أَنَا أَبَداً مَا سَكَنْت فِي بَيْت مِنْ يَوْم الْأَنَا مَرَقْت بَنِي إِسْرَائِيلْ مِنْ مَصِرْ لَحَدِّي الْيَوْم. وَ لَاكِنْ أَنَا سِرْت مَعَاهُمْ وَ سَكَنْت فِي خَيْمَةْ.

⁷ وَ فِي أَيِّ بَكَانْ، أَنَا سِرْت مَعَ كُلَّ بَنِي إِسْرَائِيلْ. وَ أَنَا أَبَداً مَا كَلَّمْت لِوَاحِدْ مِنْ كُبَارَاتْ قَبَايِلْ بَنِي إِسْرَائِيلْ الْأَنَا أَمَرْتُهُمْ لِيَحْكُمُوا فَوْق شَعَبِي وَ لَا سَأَلْتَهْ مَالَا مَا بَنَى لَيِّ بَيْت هَنَا حَطَبْ الْأَرْز.“›

⁸ «وَ هَسَّعْ دَا، أَمْشِي قُولْ لِعَبْدِي دَاوُدْ: ‹دَاهُو اللّٰهْ الْقَادِرْ قَالْ: ”أَنَا جِبْتَكْ مِنْ سَرْحَةْ الْغَنَمْ أَشَانْ تَبْقَى كَبِيرْ هَنَا شَعَبِي بَنِي إِسْرَائِيلْ.

⁹ وَ أَنَا كُنْت مَعَاكْ فِي أَيِّ بَكَانْ الْإِنْتَ مَشَيْت فَوْقَهْ وَ قَشَّيْت كُلَّ عُدْوَانَكْ مِنْ قِدَّامَكْ. وَ نِسَوِّي أُسْمَكْ عَالِي مِثِلْ الْأَسَامَيْ هَنَا النَّاسْ الْكُبَارْ فِي الْأَرْض.

¹⁰ وَ أَنَا نَنْطِي بَكَانْ لِشَعَبِي بَنِي إِسْرَائِيلْ وَ نِمَكِّنْهُمْ. وَ هُمَّنْ يَسْكُنُوا فِي الْبَكَانْ دَا بَلَا خَوْف. وَ نَاسْ فَسْلِينْ مَا يَظُلْمُوهُمْ بَتَّانْ مِثِلْ أَوَّلْ.

¹¹ وَ مِنْ وَكِتْ الْأَنَا كَلَّفْت حُكَّامْ فِي شَعَبِي بَنِي إِسْرَائِيلْ، أَنَا نَجَّيْتَكْ مِنْ كُلَّ عُدْوَانَكْ. وَ نِخَبِّرَكْ كَدَرْ أَنَا اللّٰهْ نِثَبِّتْ بَيْت عَايِلْتَكْ.

¹² وَ وَكِتْ أَيَّامَكْ يِكَمُّلُوا، تُمُوتْ وَ تَلْحَقْ أَبَّهَاتَكْ. وَ أَنَا نَعَزِلْ وَاحِدْ مِنْ ذُرِّيّتَكْ، هُو الْيَمْرُقْ مِنْ صُلْبَكْ، وَ أَنَا نِثَبِّتْ مُلْكَهْ.

¹³ وَ هُو بَسْ الْيَبْنِي بَيْت لِيِمَجُّدُوا فَوْقَهْ أُسْمِي وَ أَنَا نِثَبِّتْ عَايِلْتَهْ فِي الْمُلُكْ إِلَى الْأَبَدْ.

¹⁴ وَ أَنَا نَبْقَى لَيَّهْ أَبُوهْ وَ هُو يَبْقَى لَيِّ إِبْنِي. وَ كَنْ مَا مَاشِي عَدِيلْ، أَنَا نِأَدِّبَهْ مِثِلْ الْإِنْسَانْ يِأَدِّبْ عِيَالَهْ.

¹⁵ وَ لَاكِنْ مَا نِشِيلْ مِنَّهْ رَحْمَتِي مِثِلْ شِلْتَهَا مِنْ شَاوُولْ الْأَنَا طَرَّفْتَهْ أَشَانْ إِنْتَ تَبْقَى مَلِكْ.

¹⁶ وَ عَايِلَةْ بَيْتَكْ تَحْكِمْ دَايْماً بَعَدَكْ وَ مُلْكَكْ يَثْبِتْ إِلَى الْأَبَدْ.“›»

¹⁷ وَ نَاتَانْ حَجَّى لِدَاوُدْ بِكُلَّ الْكَلَامْ الْقَالَهْ لَيَّهْ اللّٰهْ فِي الرُّؤْيَةْ دِي.

صلاة دَاوُد

¹⁸ وَ الْمَلِكْ دَاوُدْ دَخَلْ فِي الْخَيْمَةْ فِي حَضَرَةْ اللّٰهْ وَ قَالْ: «أَنَا يَاتُو، يَا اللّٰهْ رَبِّي؟ وَ عَايِلْتِي تِسَاوِي شُنُو لَحَدِّي تَنْطِينِي دَرَجَةْ مِثِلْ دِي؟

¹⁹ وَ دَا شَيّءْ هَيِّنْ سَاكِتْ لَيْك إِنْتَ، يَا اللّٰهْ رَبِّي، وَ إِنْتَ عَاهَدْت عَايِلَةْ بَيْتِي أَنَا عَبْدَكْ فِي الْمُسْتَقْبَلْ. وَ يَا اللّٰهْ رَبِّي، شَيّءْ مِثِلْ دَا يِشَابِهْ لَيِّ أَنَا الْإِنْسَانِي وَلَّا؟

²⁰ يَا اللّٰهْ رَبِّي، إِنْتَ تَعَرِفْنِي تَمَامْ أَنَا عَبْدَكْ. وَ نَقْدَرْ نُقُولْ شُنُو بَتَّانْ؟

²¹ وَ بِسَبَبْ كَلَامَكْ وَ نِيّتَكْ، إِنْتَ سَوَّيْت لَيِّ الْأَشْيَاءْ الْكُبَارْ دَوْل وَ عَرَّفْتُهُمْ لَيِّ أَنَا عَبْدَكْ.

²² يَا اللّٰهْ الرَّبّ، إِنْتَ الْأَكْبَرْ. إِنْتَ مَا عِنْدَكْ شَبِيهْ وَ أَبَداً مَا فِي إِلٰـهْ إِلَّا إِنْتَ. وَ دَا حَسَبْ كُلَّ الْكَلَامْ السِّمِعْنَاهْ.

²³ فِيَّهْ أُمَّةْ فِي كُلَّ الْأَرْض مِثِلْ شَعَبَكْ بَنِي إِسْرَائِيلْ وَلَّا؟ يَا رَبّ، إِنْتَ فَدَيْتهُمْ وَ سَوَّيْتهُمْ شَعَبَكْ أَشَانْ أُسْمَكْ يَبْقَى عَالِي. وَ إِنْتَ سَوَّيْت عَجَايِبْ كُبَارْ الْبِخَوُّفُوا لِبَلَدَكْ وَ قِدَّامْ شَعَبَكْ الْإِنْتَ فَدَيْتهُمْ لِنَفْسَكْ مِنْ بَلَدْ مَصِرْ. وَ طَرَدْت الْأُمَمْ الْآخَرِينْ وَ إِلٰـهَاتْهُمْ قِدَّامْ شَعَبَكْ.

²⁴ وَ إِنْتَ ثَبَّتّْ شَعَبَكْ بَنِي إِسْرَائِيلْ لِيَبْقَوْا دَايْماً شَعَبَكْ حَلَالَكْ. يَا اللّٰهْ، إِنْتَ بِقِيتْ لَيْهُمْ إِلٰـهُّمْ.

²⁵ وَ هَسَّعْ دَا، يَا اللّٰهْ إِلٰـهِي، الْكَلَامْ الْقُلْتَهْ فَوْقِي أَنَا عَبْدَكْ وَ فَوْق عَايِلْتِي دَا، خَلِّي يِلْحَقَّقْ إِلَى الْأَبَدْ. وَ تَمِّمْ كُلَّ شَيّءْ الْقُلْتَهْ.

²⁶ وَ خَلِّي يِمَجُّدُوا أُسْمَكْ إِلَى الْأَبَدْ وَ يُقُولُوا: ‹اللّٰهْ الْقَادِرْ، هُو بَسْ إِلٰـهْ بَنِي إِسْرَائِيلْ.› وَ خَلِّي بَيْتِي أَنَا عَبْدَكْ دَاوُدْ يَقْعُدْ ثَابِتْ قِدَّامَكْ.

²⁷ أَشَانْ إِنْتَ ذَاتَكْ، يَا اللّٰهْ الْقَادِرْ إِلٰـهْ بَنِي إِسْرَائِيلْ، خَبَّرْتِنِي أَنَا عَبْدَكْ وَ قُلْت لَيِّ: ‹نِثَبِّتْ بَيْت عَايِلْتَكْ فِي الْمُلُكْ.› «وَ فِي شَانْ دَا، أَنَا عَبْدَكْ لِقِيتْ الشَّجَاعَةْ وَ قَدَّمْت لَيْك الصَّلَاةْ دِي.

²⁸ وَ هَسَّعْ دَا، يَا اللّٰهْ رَبِّي، إِنْتَ بَسْ الْإِلٰـهْ وَ كَلَامَكْ حَقّ. وَ إِنْتَ عَاهَدْتِنِي أَنَا عَبْدَكْ بِكُلَّ الْخَيْر دَا.

²⁹ وَ خَلَاصْ هَسَّعْ دَا، أَقْبَلْ سُؤَالِي وَ بَارِكْ عَايِلْتِي أَنَا عَبْدَكْ لِيَمُلْكُوا قِدَّامَكْ إِلَى الْأَبَدْ. يَا اللّٰهْ رَبِّي، أَشَانْ إِنْتَ بَسْ قُلْت بِبَرَكَتَكْ، عَايِلَةْ بَيْتِي تَلْقَى بَرَكَةْ دَايْمَةْ.»