2 صَمُوِيل 24 - الكتاب المقدس بالعربي الدارجي هنا تشاد

دَاوُد حسب شعب بني إسرائيل

¹ وَ يَوْم وَاحِدْ، اللّٰهْ غِضِبْ بَتَّانْ لِبَنِي إِسْرَائِيلْ وَ لَزَّ دَاوُدْ يِسَوِّي شَيّءْ الْمَا بِوَافِقْ وَ قَالْ لَيَّهْ: «قُمّ أَحْسِبْ بَنِي إِسْرَائِيلْ وَ بَنِي يَهُوذَا.»

² وَ خَلَاصْ، الْمَلِكْ دَاوُدْ قَالْ لِيُوَابْ قَايِدْ دَيْشَهْ: «أَمْشِي فِي كُلَّ قَبَايِلْ بَنِي إِسْرَائِيلْ مِنْ دَانْ فِي الْمُنْشَاقْ لَحَدِّي بِيرْ سَبْعَةْ فِي الْوَطِي وَ أَحْسِبْ كُلَّ الشَّعَبْ لِنَعَرِفْ عَدَدْهُمْ.»

³ وَ يُوَابْ قَالْ لِلْمَلِكْ: «خَلِّي اللّٰهْ إِلٰـهَكْ يِزِيدْ عَدَدْ الشَّعَبْ مِيَةْ مَرَّةْ وَ خَلِّي إِنْتَ سِيدِي الْمَلِكْ تِشِيفَهْ بِعَيْنَكْ. وَ لَاكِنْ مَالَا، يَا سِيدِي الْمَلِكْ، تِدَوْر تِسَوِّي الشَّيّءْ دَا؟»

⁴ وَ لَاكِنْ أَمُرْ الْمَلِكْ بِقِي شَدِيدْ بِلْحَيْن فِي يُوَابْ وَ الْقُيَّادْ الْآخَرِينْ هَنَا الدَّيْش. وَ خَلَاصْ، هُمَّنْ مَرَقَوْا مِنْ بَكَانْ الْمَلِكْ لِيَمْشُوا يَحْسُبُوا شَعَبْ بَنِي إِسْرَائِيلْ.

⁵ هُمَّنْ شَقَّوْا بَحَرْ الْأُرْدُنْ وَ مَشَوْا فِي حِلَّةْ عَرُوعِرْ وَ الْحِلَّةْ دِي قَاعِدَةْ فِي أُسْط الْوَادِي. وَ مَشَوْا لِقَبِيلَةْ قَادْ وَ وَجَّهَوْا عَلَيْ حِلَّةْ يَعْزِيرْ.

⁶ وَ وَصَّلَوْا حِلَّةْ قِلْعَادْ فِي مَنْطَقَةْ تَحْتِيمْ قَادِشْ وَ مَشَوْا لَحَدِّي دَانْ يَعَنْ وَ عَلَيْ حَوَالَيْ صَيْدَا.

⁷ وَ دَخَلَوْا فِي صُورْ الْمَدِينَةْ الْقَوِيَّةْ وَ فِي كُلَّ مُدُنْ الْحِوِّيِّينْ وَ الْكَنْعَانِيِّينْ. وَ فِي الْآخِرْ، مَشَوْا وَطِي بَلَدْ يَهُوذَا فِي حِلَّةْ بِيرْ سَبْعَةْ.

⁸ وَ بَعَدْ رَاغَوْا فِي كُلَّ الْبَلَدْ فِي مُدَّةْ 9 شَهَرْ وَ 20 يَوْم، قَبَّلَوْا فِي أُورُشَلِيمْ.

⁹ وَ خَلَاصْ، يُوَابْ أَنْطَى عَدَدْ حِسَابْ الشَّعَبْ لِلْمَلِكْ. وَ رُجَالْ بَنِي إِسْرَائِيلْ عَدَدْهُمْ 800 000 عَسْكَرْ الْيَعَرْفُوا حَرْب السُّيُوفْ وَ مِنْ بَنِي يَهُوذَا كَمَانْ 500 000.

¹⁰ وَ بَعَدْ حَسَبْ الشَّعَبْ، طَوَّالِي دَاوُدْ هَسَّعْ قَلْبَهْ قَاعِدْ يَضْرُبْ. وَ قَالْ: «أَنَا سَوَّيْت ذَنِبْ كَبِيرْ أَشَانْ حَسَبْت الشَّعَبْ. هَسَّعْ دَا، يَا اللّٰهْ، أَغْفِرْ لَيِّ خَطَايِ أَنَا عَبْدَكْ. أَشَانْ أَنَا سَوَّيْت الشَّيّءْ دَا مِثِلْ نَادُمْ مَطْمُوسْ.»

¹¹ وَ وَكِتْ دَاوُدْ قَمَّ بِفَجُرْ، اللّٰهْ حَجَّى لِلنَّبِي قَادْ الْيِشِيفْ رُؤْيَةْ لِدَاوُدْ وَ قَالْ لَيَّهْ:

¹² «أَمْشِي قُولْ لِدَاوُدْ: ‹دَاهُو اللّٰهْ قَالْ: ”أَنَا نِنَزِّلْ لَيْك تَلَاتَةْ نَفَرْ هَنَا مَصَايِبْ. وَ أَعَزِلْ مِنْهُمْ وَاحِدْ وَ أَنَا نِنَزِّلَهْ.“›»

¹³ وَ خَلَاصْ، قَادْ مَشَى لِدَاوُدْ وَ قَالْ لَيَّهْ: «تِدَوْر سَبْعَةْ سَنَةْ هَنَا جُوعْ فِي بَلَدَكْ؟ أَوْ تِدَوْر تَجْرِي قِدَّامْ عُدْوَانَكْ وَ هُمَّنْ يَطُرْدُوكْ لِمُدَّةْ تَلَاتَةْ شَهَرْ؟ أَوْ تِدَوْر وَبَاءْ يَنْزِلْ لِمُدَّةْ تَلَاتَةْ يَوْم فِي بَلَدَكْ؟ هَسَّعْ دَا، فَكِّرْ وَ أَوْرِينِي الرَّدّ النُّقُولَهْ لِلّٰهْ الرَّسَّلَانِي.»

¹⁴ وَ دَاوُدْ قَالْ لِقَادْ: «أَنَا أَضَّايَقْت مَرَّةْ وَاحِدْ! خَلِّي نَقَعْ فِي إِيدْ اللّٰهْ أَشَانْ رَحْمَتَهْ وَسِيعَةْ. وَ خَلِّي مَا نَقَعْ فِي إِيدْ إِنْسَانْ.»

¹⁵ وَ خَلَاصْ، اللّٰهْ نَزَّلْ وَبَاءْ فِي بَلَدْ إِسْرَائِيلْ. وَ مِنْ الْفَجُرْ لَحَدِّي الْوَكِتْ الْمُحَدَّدْ، مَاتَوْا 70 000 نَاسْ مِنْ دَانْ فِي الْمُنْشَاقْ لَحَدِّي بِيرْ سَبْعَةْ فِي الْوَطِي.

¹⁶ وَ الْمَلَكْ الْمُدَمِّرْ مَدَّ إِيدَهْ عَلَيْ أُورُشَلِيمْ لِيِدَمِّرْهَا. لَاكِنْ اللّٰهْ مَا دَوَّرْ الدَّمَارْ دَا وَ قَالْ لِلْمَلَكْ: «خَلَاصْ، كَفَى! أَرْفَعْ إِيدَكْ.» وَ الْمَلَكْ دَا قَاعِدْ فِي الْمَدَقّ هَنَا أَرَوْنَى الْيَبُوسِي.

¹⁷ وَ وَكِتْ دَاوُدْ شَافْ الْمَلَكْ الْكَتَلْ الشَّعَبْ دَا، قَالْ لِلّٰهْ: «أَنَا بَسْ أَذْنَبْت وَ سَوَّيْت الْخَطَا دَا. لَاكِنْ الشَّعَبْ دَوْل الْمِثِلْ الْغَنَمْ سَوَّوْا شُنُو؟ عَاقِبْنِي أَنَا وَ عَايِلْتِي.»

¹⁸ وَ فِي نَفْس الْيَوْم دَا، النَّبِي قَادْ مَشَى لِدَاوُدْ وَ قَالْ لَيَّهْ: «أَمْشِي أَبْنِي مَدْبَحْ لِلّٰهْ فِي الْمَدَقّ هَنَا أَرَوْنَى الْيَبُوسِي.»

¹⁹ وَ خَلَاصْ، دَاوُدْ مَشَى مِثِلْ اللّٰهْ أَمَرَهْ بَيَّهْ بِوَاسِطَةْ النَّبِي قَادْ.

²⁰ وَ وَكِتْ أَرَوْنَى رَفَعْ رَاسَهْ وَ شَافْ الْمَلِكْ وَ خَدَّامِينَهْ جَايِينْ عَلَيَّهْ، هُو جَاءْ وَ وَقَعْ فِي الْأَرْض وَ سَجَدْ قِدَّامْ الْمَلِكْ.

²¹ وَ قَالْ: «مَالَا سِيدِي الْمَلِكْ جَايِ بَكَانْ عَبْدَهْ؟» وَ دَاوُدْ رَدَّ لَيَّهْ وَ قَالْ: «أَنَا جِيتْ لِنَشْرِي مِنَّكْ الْمَدَقّ وَ نَبْنِي فَوْقَهْ مَدْبَحْ لِلّٰهْ أَشَانْ الْوَبَاءْ دَا يَقِيفْ مِنْ الشَّعَبْ.»

²² وَ أَرَوْنَى قَالْ بَتَّانْ لِدَاوُدْ: «خَلِّي سِيدِي الْمَلِكْ يِشِيلْ الْمَدَقّ وَ يِسَوِّي بَيَّهْ أَيِّ شَيّءْ الْيِدَوْرَهْ. شِيفْ! دَاهُو بَقَرْ لِلضَّحِيَّةْ الْمُحَرَّقَةْ. وَ الْكَارَّوْ الْيِفَجُّقُوا بَيَّهْ الْقَمَحْ وَ آلَاتَهْ كَمَانْ يَبْقَوْا لَيْك حَطَبْ.

²³ يَا الْمَلِكْ، أَنَا أَرَوْنَى أَنْطَيْتَكْ كُلَّ الْأَشْيَاءْ دَوْل. خَلِّي اللّٰهْ إِلٰـهَكْ يَقْبَلْ ضَحِيّتَكْ.»

²⁴ وَ لَاكِنْ الْمَلِكْ قَالْ لِأَرَوْنَى: «لَا! أَنَا نَشْرِيهْ مِنَّكْ وَ نِكَفِّي تَمَنَهْ. أَشَانْ مَا نِدَوْر نِقَدِّمْ ضَحِيَّةْ لِلّٰهْ إِلٰـهِي الْمَا تِكَلِّفْنِي شَيّءْ.» وَ خَلَاصْ، دَاوُدْ شَرَى الْمَدَقّ وَ الْبَقَرْ بِـ‍ 50 حَجَرْ فُضَّةْ.

²⁵ وَ فِي الْبَكَانْ دَا، دَاوُدْ بَنَى مَدْبَحْ لِلّٰهْ وَ قَدَّمْ فَوْقَهْ ضَحَايَا مُحَرَّقِينْ وَ ضَحَايَا سَلَامَةْ. وَ بَيْدَا، اللّٰهْ رَحَمْ الْبَلَدْ وَ الْوَبَاءْ وَقَفْ مِنْ بَنِي إِسْرَائِيلْ.