2 صَمُوِيل 2 - الكتاب المقدس بالعربي الدارجي هنا تشاد

دَاوُد بِقي ملك في بلد يَهُوذَا

¹ وَ بَعَدْ الْحِزِنْ دَا، دَاوُدْ سَأَلْ اللّٰهْ وَ قَالْ: «هَلْ نَمْشِي نَقْعُدْ فِي حِلَّةْ وَاحِدَةْ مِنْ حِلَّالْ بَلَدْ يَهُوذَا وَلَّا؟» وَ اللّٰهْ قَالْ لَيَّهْ: «أَمْشِي.» وَ دَاوُدْ قَالْ: «نَمْشِي وَيْن؟» وَ اللّٰهْ قَالْ لَيَّهْ: «أَمْشِي حِلَّةْ حِبْرُونْ.»

² وَ دَاوُدْ قَمَّ مَشَى حِبْرُونْ مَعَ عَوِينَهْ الْإِتْنَيْن أَخِنُوعَمُ الْمِنْ حِلَّةْ يَزْرَعِيلْ وَ أَبِقَايِلْ مَرِةْ نَابَالْ الْمِنْ حِلَّةْ كَرْمَلْ.

³ وَ دَاوُدْ وَدَّى مَعَايَهْ نَاسَهْ وَ عَايِلَاتْهُمْ وَ سَكَنَوْا فِي حِبْرُونْ وَ حَوَالَيْهَا.

⁴ وَ نَاسْ قَبِيلَةْ يَهُوذَا جَوْا لِدَاوُدْ مَسَحَوْه وَ دَرَّجَوْه مَلِكْ فَوْقهُمْ. وَ وَكِتْ خَبَّرَوْه كَدَرْ نَاسْ حِلَّةْ يَابِيشْ فِي تُرَابْ قِلْعَادْ سَتَرَوْا جَنَازَةْ شَاوُولْ،

⁵ خَلَاصْ دَاوُدْ رَسَّلْ لِنَاسْ يَابِيشْ قِلْعَادْ وَ قَالْ: «اللّٰهْ يِبَارِكُّو أَشَانْ إِنْتُو عِنْدُكُو أَمَانْ لِسِيدْكُو شَاوُولْ وَ سَتَرْتُوا جَنَازْتَهْ.

⁶ وَ هَسَّعْ دَا، خَلِّي اللّٰهْ يِوَصِّفْ لَيْكُو الرَّحْمَةْ وَ الْأَمَانْ. وَ أَنَا كُلَ نِسَوِّي لَيْكُو الْخَيْر مِثِلْ إِنْتُو سَوَّيْتُوهْ.

⁷ صَحِيحْ، كَنْ سِيدْكُو شَاوُولْ مَاتْ كُلَ، شِدُّوا حَيْلكُو وَ أَبْقَوْا رُجَالْ فَحَلِينْ. أَشَانْ نَاسْ قَبِيلَةْ يَهُوذَا مَسَحَوْنِي وَ دَرَّجَوْنِي مَلِكْ فَوْقهُمْ.»

إِشْبُوشَت بِقي ملك في إسرائيل

⁸ وَ أَبْنِيرْ وِلَيْد نِيرْ قَايِدْ دَيْش شَاوُولْ جَابْ إِشْبُوشَتْ وِلَيْد شَاوُولْ فِي حِلَّةْ مَحَنَايِمْ.

⁹ وَ دَرَّجَهْ مَلِكْ فِي تُرَابْ قِلْعَادْ وَ أَشُورِينْ وَ يَزْرَعِيلْ وَ أَفْرَايِمْ وَ بَنْيَامِينْ وَ فِي كُلَّ تُرَابْ بَنِي إِسْرَائِيلْ.

¹⁰ وَ إِشْبُوشَتْ وِلَيْد شَاوُولْ عِنْدَهْ 40 سَنَةْ وَكِتْ بِقِي مَلِكْ فِي إِسْرَائِيلْ وَ حَكَمْ سَنْتَيْن. وَ لَاكِنْ نَاسْ قَبِيلَةْ يَهُوذَا تَابَعَوْا دَاوُدْ.

¹¹ وَ الْمَلِكْ دَاوُدْ حَكَمْ فِي حِبْرُونْ سَبْعَةْ سَنَةْ وَ سِتَّةْ شَهَرْ فَوْق نَاسْ قَبِيلَةْ يَهُوذَا.

ناس دَاوُد حاربوا بني إسرائيل

¹² وَ أَبْنِيرْ وِلَيْد نِيرْ وَ نَاسْ إِشْبُوشَتْ وِلَيْد شَاوُولْ مَرَقَوْا مِنْ مَحَنَايِمْ وَ مَشَوْا عَلَيْ حِلَّةْ قِبْعُونْ.

¹³ وَ يُوَابْ وِلَيْدهَا لِصَرُويَةْ وَ نَاسْ دَاوُدْ كُلَ مَرَقَوْا. وَ الْمَجْمُوعْتَيْن دَوْل لَمَّوْا فِي رَهَدْ قِبْعُونْ. وَ دَوْل وَقَفَوْا بِهِنِي وَ دَوْل وَقَفَوْا بِهِنَاكْ لِلرَّهَدْ.

¹⁴ وَ أَبْنِيرْ قَالْ لِيُوَابْ: «خَلِّي صُبْيَانَّا وَ صُبْيَانْكُو يَمُرْقُوا يِجَرُّبُوا قُدْرِتْهُمْ قِدَّامْنَا.» وَ يُوَابْ قَالْ: «سَمَحْ. خَلِّي يَمُرْقُوا.»

¹⁵ وَ خَلَاصْ، حَسَبَوْا 12 رَاجِلْ مِنْ قَبِيلَةْ بَنْيَامِينْ نَاسْ إِشْبُوشَتْ وِلَيْد شَاوُولْ وَ 12 رَاجِلْ مِنْ نَاسْ دَاوُدْ.

¹⁶ وَ أَيِّ وَاحِدْ قَمَّ وَ كَرَبْ قَبِيلَهْ مِنْ رَاسَهْ وَ أَطَّاعَنَوْا بِالسُّيُوفْ فِي نَوَايِطْهُمْ وَ مَاتَوْا كُلُّهُمْ فِي الْبَكَانْ دَا. وَ سَمَّوْه حِلْقَتْ هَصُورِيمْ (مَعَنَاتَهْ زَرَعْ الْحُجَارْ) وَ الْبَكَانْ دَا فِي قِبْعُونْ.

¹⁷ وَ فِي الْيَوْم دَا، الْحَرِبْ بِقِي شَدِيدْ بِلْحَيْن وَ نَاسْ دَاوُدْ هَزَمَوْهُمْ لِأَبْنِيرْ وَ نَاسْ بَنِي إِسْرَائِيلْ.

¹⁸ وَ أَوْلَادْهَا لِصَرُويَةْ التَّلَاتَةْ يُوَابْ وَ أَبِشَايْ وَ عَسَاحِيلْ، هُمَّنْ كُلَ حَاضْرِينْ فِي الْحَرِبْ دَا. وَ عَسَاحِيلْ هُو جَرَّايْ مِثِلْ غَزَالْ النَّقَعَةْ.

¹⁹ وَ عَسَاحِيلْ جَرَى وَرَاءْ أَبْنِيرْ وَ مَا بَارَى مِنْ دَرْبَهْ وَ لَا إِسْرَةْ وَ لَا زَيْنَةْ.

²⁰ وَ أَبْنِيرْ أَنْلَفَتْ شَافَهْ وَ قَالْ: «دَا إِنْتَ، يَا عَسَاحِيلْ؟» وَ عَسَاحِيلْ قَالْ: «أَيْوَى، دَا أَنَا.»

²¹ وَ أَبْنِيرْ قَالْ: «أَمْشِي عَلَيْ إِسْرَايْتَكْ أَوْ زَيْنَايْتَكْ وَ تَلْقَى وَاحِدْ مِنْ الصُّبْيَانْ، أَكْتُلَهْ وَ شِيلْ سِلَاحَهْ.» وَ لَاكِنْ عَسَاحِيلْ أَبَى مَا يِقَبِّلْ مِنْ وَرَاءْ أَبْنِيرْ.

²² وَ أَبْنِيرْ قَالْ بَتَّانْ لِعَسَاحِيلْ: «قَبِّلْ مِنْ دَرْبِي وَلَّا تِدَوْر نَكْتُلَكْ؟ وَ كَنْ كَتَلْتَكْ، نُقُولْ شُنُو لِأَخُوكْ يُوَابْ؟»

²³ وَ لَاكِنْ عَسَاحِيلْ أَبَى مَا يِقَبِّلْ مِنْ وَرَاءْ أَبْنِيرْ. وَ خَلَاصْ، أَبْنِيرْ طَعَنَهْ فِي بَطْنَهْ بِقَعَرْ حَرِبْتَهْ لَحَدِّي مَرَقَتْ لَيَّهْ مِنْ وَرَاءْ. وَ هُو وَقَعْ وَ مَاتْ فِي الْبَكَانْ دَا. وَ كُلَّ النَّاسْ يَقِيفُوا وَكِتْ وَصَّلَوْا فِي الْبَكَانْ الْمَاتْ فَوْقَهْ عَسَاحِيلْ.

²⁴ وَ لَاكِنْ يُوَابْ وَ أَبِشَايْ شَالَوْا دَرِبْ أَبْنِيرْ. وَ وَكِتْ وَصَّلَوْا جَبَلْ أَمَّةْ، الْحَرَّايْ وَقَعَتْ خَلَاصْ. وَ الْجَبَلْ دَا قَاعِدْ صَبَاحْ لِحِلَّةْ قِيَّحْ فِي الدَّرِبْ الْمَاشِي عَلَيْ صَحَرَاء قِبْعُونْ.

²⁵ وَ قَبِيلَةْ بَنْيَامِينْ لَمَّوْا كُلُّهُمْ وَرَاءْ أَبْنِيرْ مِثِلْ رَاجِلْ وَاحِدْ فِي رَاسْ جَبَلْ وَاحِدْ.

²⁶ وَ أَبْنِيرْ نَادَاهْ لِيُوَابْ بِحِسّ عَالِي وَ قَالْ: «لِمَتَى نِخَلُّوا مِنِّنَا الدُّوَاسْ؟ إِنْتَ مَا تَعَرْفَهْ كَدَرْ الشَّيّءْ دَا يِكَمِّلْ بِحِزِنْ؟ وَ لِمَتَى تُقُولْ لِنَاسَكْ يِخَلُّوا مِنْهُمْ مُطَارَدَةْ أَخْوَانْهُمْ؟»

²⁷ وَ يُوَابْ قَالْ لِأَبْنِيرْ: «نَحْلِفْ لَيْك بِاللّٰهْ الْحَيّ، أَوَّلْ كَنْ إِنْتَ مَا حَجَّيْت دَا، نَاسِي يِطَارُدُوكُو لَحَدِّي أَمْبَاكِرْ فَجُرْ.»

²⁸ وَ خَلَاصْ، يُوَابْ ضَرَبْ الْبُوقْ وَ كُلَّ نَاسَهْ وَقَفَوْا مِنْ مُطَارَدَةْ أَخْوَانْهُمْ بَنِي إِسْرَائِيلْ وَ بَتَّانْ مَا أَلْحَارَبَوْا.

²⁹ وَ أَبْنِيرْ وَ نَاسَهْ رَاغَوْا طُولْ اللَّيْل فِي وَادِي الْأُرْدُنْ وَ شَقَّوْا الْبَحَرْ وَ رَاغَوْا لَحَدِّي حِلَّةْ بِتْرُونْ وَ وَصَّلَوْا مَحَنَايِمْ.

³⁰ وَ بَعَدْ يُوَابْ خَلَّى مُطَارَدَةْ أَبْنِيرْ، لَمَّ كُلَّ نَاسَهْ. وَ فَقَدْ عَسَاحِيلْ وَ 19 نَاسْ مِنْ نَاسْ دَاوُدْ.

³¹ وَ لَاكِنْ نَاسْ دَاوُدْ كَتَلَوْا 360 نَاسْ مِنْ رُجَالْ هَنَا بَنْيَامِينْ وَ أَبْنِيرْ.

³² وَ شَالَوْا جَنَازَةْ عَسَاحِيلْ وَ دَفَنَوْهَا فِي قَبُرْ أَبُوهْ الْفِي بَيْت لَحَمْ. وَ بَعَدْ دَا، يُوَابْ وَ نَاسَهْ رَاغَوْا طُولْ اللَّيْل وَ وَصَّلَوْا فِي حِبْرُونْ بِفَجُرْ بَدْرِي.