2 بُطْرُس 3 - الكتاب المقدس بالعربي الدارجي هنا تشاد

جيّة المسيح التانية

¹ يَا أَخْوَانِي النِّحِبُّكُو، دَاهُو الْجَوَابْ التَّانِي الْكَتَبْتَهْ لَيْكُو. وَ فِي جَوَابَاتِي نِدَوْر نِذَكِّرْكُو بِالْكَلَامْ التَّعَرْفُوهْ خَلَاصْ وَ تِفَكُّرُوا بِفِكِرْ مُخْلِصْ.

² فَكُّرُوا فِي كَلَامْ الْأَنْبِيَاء الصَّالِحِينْ الْقَالَوْه مِنْ زَمَانْ. وَ فَكُّرُوا فِي وَصِيَّةْ عِيسَى رَبِّنَا وَ مُنَجِّينَا السِّمِعْتُوهَا بِوَاسِطَةْ الرُّسُلْ الْمَشَوْا لَيْكُو.

³ وَ دَاهُو أَوَّلْ شَيّءْ الْوَاجِبْ تَفْهَمَوْه. فِي الزَّمَنْ الْأَخِيرْ شَمَّاتِينْ يُقُمُّوا وَ يِشَّمَّتَوْا. وَ يِتَابُعُوا شَهْوَاتْهُمْ بَسْ.

⁴ وَ يُقُولُوا: «وَاعَدَوْا بِجَيَّةْ عِيسَى وَ لَاكِنْ هُو مَا جَاءْ. أَبَّهَاتْنَا مَاتَوْا وَ مِنْ بِدَايَةْ الدُّنْيَا لَحَدِّي الْيَوْم، شَيّءْ غَيَّرْ كَيْ مَا فِيهْ!»

⁵ وَ النَّاسْ دَوْل بِنِيِّتْهُمْ بَسْ نِسَوْا شَيّءْ وَاحِدْ مَعْرُوفْ وَ دَا هُو. زَمَانْ اللّٰهْ كَلَّمْ كِلْمَةْ وَ بَيْهَا السَّمَاوَاتْ كَانَوْا وَ الْأَرْض أَنْفَصَلَتْ مِنْ الْأَلْمِي وَ الْأَلْمِي حَوَّقْهَا.

⁶ وَ بِكِلْمَةْ اللّٰهْ دِي، الْأَلْمِي دَا غَرَقْ الدُّنْيَا فِي الزَّمَنْ دَاكْ وَ دَمَّرَاهَا.

⁷ وَ بِكِلْمَةْ اللّٰهْ بَتَّانْ السَّمَاوَاتْ وَ الْأَرْض الْقَاعِدِينْ حَالِيّاً مَضْمُومِينْ أَشَانْ يَرْجَوْا النَّارْ. اللّٰهْ قَاعِدْ يَحْفَضْهُمْ لَحَدِّي يَوْم الْحِسَابْ الْيَهْلَكَوْا فَوْقَهْ النَّاسْ الْفَسْلِينْ.

⁸ يَا أَخْوَانِي النِّحِبُّكُو، فِي شَيّءْ وَاحِدْ مَعْرُوفْ الْمَا وَاجِبْ تَنْسَوْه وَ دَا هُو. لِلّٰهْ يَوْم وَاحِدْ مِثِلْ أَلِفْ سَنَةْ وَ أَلِفْ سَنَةْ مِثِلْ يَوْم وَاحِدْ.

⁹ وَ اللّٰهْ مَا يِأَخِّرْ وَعَدَهْ. النَّاسْ الْيُقُولُوا هُو أَخَّرْ، مَا فِهْمَوْا عَدِيلْ. أَخَيْر نُقُولُوا اللّٰهْ صَبُورْ لَيْكُو. هُو مَا يِدَوْر أَيِّ نَادُمْ يَهْلَكْ لَاكِنْ يِدَوْر كُلَّ النَّاسْ يُتُوبُوا.

¹⁰ وَ لَابُدَّ يَوْم اللّٰهْ يَجِي بِغَفْلَةْ مِثِلْ جَيَّةْ السَّرَّاقْ. وَ عَجَلَةْ كَيْ حَرَكَةْ شَدِيدَةْ تِنْسَمِعْ وَ السَّمَاوَاتْ يَبْقَوْا مَا فِيهُمْ وَ النُّجُومْ يِنْحَرْقُوا. وَ الْأَرْض وَ كُلَّ شَيّءْ الْيِسَوُّوهْ فَوْقهَا يِنْكَشِفْ.

¹¹ وَ كَنْ كُلَّ شَيّءْ يِدَّمَّرْ مِثِلْ دَا، إِنْتُو وَاجِبْ تِسَوُّوا شُنُو؟ وَاجِبْ تِعِيشُوا بِتَقْوَى وَ حَالْ صَالْحَةْ.

¹² أَرْجَوْا يَوْم اللّٰهْ وَ أَتْمَنَّوْا جَيْتَهْ. وَ فِي الْيَوْم دَا، السَّمَاوَاتْ يِنْحَرْقُوا وَ يِدَّمَّرَوْا وَ النُّجُومْ يُمُوعُوا فِي الْحَمُو.

¹³ وَ اللّٰهْ أَنْطَانَا وَعَدْ وَ أَشَانْ دَا نَرْجَوْا السَّمَاءْ الْجَدِيدْ وَ الْأَرْض الْجَدِيدَةْ وَ الدُّنْيَا التَّجِي تَبْقَى دَارْ الصَّالِحِينْ.

نِهاية الجواب

¹⁴ يَا أَخْوَانِي النِّحِبُّكُو، دَا بَسْ الشَّيّءْ التَّرْجَوْه مِنْ اللّٰهْ. وَ أَشَانْ دَا، سَوُّوا جُهُدْ أَشَانْ تِعِيشُوا بِسَلَامْ قِدَّامَهْ بَلَا خَطَا وَ لَا عَيْب.

¹⁵ فَكُّرُوا فِي الرُّوحْ الطَّوِيلَةْ هَنَا رَبِّنَا وَ أَعَرْفُوا كَدَرْ هُو يِأَخِّرْ جَيْتَهْ أَشَانْ النَّاسْ يَنْجَوْا. وَ الْكَلَامْ دَا مِثِلْ الْكَلَامْ الْأَخُونَا بُولُسْ النِّرِيدُوهْ كَتَبَهْ لَيْكُو مِنْ الْحِكْمَةْ الْاللّٰهْ أَنْطَاهَا لَيَّهْ.

¹⁶ وَ هُو يِحَجِّي بِالْكَلَامْ دَا فِي كُلَّ جَوَابَاتَهْ. وَ فِي كَلَامْ قَاعِدْ فِي جَوَابَاتَهْ التَّفْسِيرَهْ مَا هَيِّنْ. وَ نَاسْ وَاحِدِينْ الْمَا قَرَوْا وَ إِيمَانْهُمْ مَا ثَابِتْ يِعَوُّجُوا كَلَامَهْ مِثِلْ يِعَوُّجُوا كَلَامْ الْكُتُبْ الْآخَرِينْ. وَ بَيْدَا، يِجِيبُوا لِنُفُوسْهُمْ الْهَلَاكْ.

¹⁷ وَ لَيْكُو إِنْتُو يَا أَخْوَانِي النِّحِبُّكُو، تَعَرْفُوا الْكَلَامْ دَا مِنْ أَوَّلْ. وَ أَشَانْ دَا، أَوْعُوا بَالْكُو وَ مَا تِخَلُّوا كِدِبْ الْعَاصِيِينْ يِوَدِّيكُو فِي دَرِبْهُمْ وَ يِتَلِّفْ إِيمَانْكُو الثَّابِتْ.

¹⁸ لَاكِنْ أَبْقَوْا قَوِيِّينْ فِي نِعْمَةْ رَبِّنَا عِيسَى الْمَسِيحْ مُنَجِّينَا وَ بِعِرْفِتْكُو لَيَّهْ. وَ الْمَسِيحْ، خَلِّي يِمَجُّدُوهْ فِي الْوَكِتْ الْحَاضِرْ وَ إِلَى الْأَبَدْ. آمِينْ.