2 كُرُنْتُس 3 - الكتاب المقدس بالعربي الدارجي هنا تشاد

المُعاهدة الجديدة

¹ أَكُونْ تُقُولُوا أَنِحْنَ بَدَيْنَا بَتَّانْ نَشْكُرُوا نُفُوسْنَا. لَا، مَا كَيْ. أَكِيدْ نَاسْ وَاحِدِينْ وَاجِبْ لَيْهُمْ جَوَابْ الْيَشْهَدْ لَيْهُمْ، كَنْ جَوَابْ لَيْكُو أَوْ جَوَابْ مِنْكُو. وَ لَاكِنْ دَا مَا وَاجِبْ لَيْنَا أَنِحْنَ.

² إِنْتُو بَسْ جَوَابْنَا. إِنْتُو مَكْتُوبِينْ فِي قُلُوبْنَا. وَ كُلَّ النَّاسْ يَعَرْفُوهْ وَ يَقْرُوهْ.

³ أَيْوَى، إِنْتُو بَسْ جَوَابْ الْمَسِيحْ وَ هُو رَسَّلَهْ بِوَاسِطَتْنَا وَ دَا وَاضِحْ لِأَيِّ نَادُمْ. وَ الْجَوَابْ دَا مَا مَكْتُوبْ بِقَلَمْ لَاكِنْ بِرُوحْ اللّٰهْ الْحَيّ. وَ هُو مَا مَكْتُوبْ فِي لَوْح هَنَا حَجَرْ لَاكِنْ مَكْتُوبْ فِي قُلُوبْ النَّاسْ.

⁴ وَ قُلْنَا الْكَلَامْ دَا أَشَانْ عَشَمْنَا فِي اللّٰهْ قَوِي بِالْمَسِيحْ.

⁵ أَنِحْنَ بِنُفُوسْنَا مَا عِنْدِنَا الْقُدْرَةْ الْوَاجْبَةْ لِنِسَوُّوا الْخِدْمَةْ دِي. نَقْدَرَوْا نِسَوُّوا الْخِدْمَةْ دِي إِلَّا كَنْ اللّٰهْ أَنْطَانَا الْقُدْرَةْ الْوَاجْبَةْ.

⁶ أَيْوَى، هُو أَنْطَانَا الْقُدْرَةْ لِنَبْقَوْا خَدَّامِينْ وَ نَخْدُمُوا لِلّٰهْ فِي الْمُعَاهَدَةْ الْجَدِيدَةْ. وَ الْمُعَاهَدَةْ الْجَدِيدَةْ دِي مَا هَنَا شُرُوطْ مَكْتُوبِينْ وَ لَاكِنْ هَنَا رُوحْ اللّٰهْ. أَشَانْ مُعَاهَدَةْ الشُّرُوطْ الْمَكْتُوبِينْ تِجِيبْ الْمَوْت وَ لَاكِنْ رُوحْ اللّٰهْ يِجِيبْ الْحَيَاةْ.

⁷ شُرُوطْ التَّوْرَاةْ كَتَبَوْهُمْ فِي لِيحَانْ هَنَا حَجَرْ وَ نُورْ اللّٰهْ الْمَجِيدْ بَانْ وَكِتْ هُو نَزَّلَاهُمْ. وَ النُّورْ الْمَجِيدْ دَا شَدِيدْ لَحَدِّي بَنِي إِسْرَائِيلْ مَا قِدْرَوْا يِشِيفُوا النُّورْ الْقَاعِدْ فِي وِجِهْ مُوسَى. وَ النُّورْ دَا مَا طَوَّلْ. وَ كَنْ كَلَامْ اللّٰهْ الْحَكَمْ النَّاسْ بِالْمَوْت دَا نَزَلْ بِنُورْ مَجِيدْ،

⁸ أَكِيدْ كَلَامْ اللّٰهْ الْيَنْطِي لَيْنَا الرُّوحْ الْقُدُّوسْ يَجِي بِنُورْ مَجِيدْ زِيَادَةْ.

⁹ نَعَرْفُوا كَدَرْ خِدْمَةْ الْمُعَاهَدَةْ الْجَعَلَتْ النَّاسْ خَاطِيِّينْ قِدَّامْ اللّٰهْ، عِنْدَهَا نُورْ مَجِيدْ. وَ مِثِلْ دَا، نَعَرْفُوا كَدَرْ خِدْمَةْ الْمُعَاهَدَةْ التَّجْعَلْ النَّاسْ صَالِحِينْ عِنْدَهَا نُورْ مَجِيدْ زِيَادَةْ مَرَّةْ وَاحِدْ.

¹⁰ وَ صَحِيحْ، أَوَّلْ فِي نُورْ مَجِيدْ وَ حَالِيّاً جَاءْ نُورْ مَجِيدْ آخَرْ زِيَادَةْ مِنَّهْ وَ وَدَّرَهْ.

¹¹ وَ كَنْ الشَّيّءْ الْمَا طَوَّلْ جَاءْ بِنُورْ مَجِيدْ، أَكِيدْ الْيَقْعُدْ إِلَى الْأَبَدْ يَجِي بِنُورْ شَدِيدْ زِيَادَةْ مِنَّهْ.

المِنْديل أنْرفع

¹² وَ بِمِثِلْ دَا، عِنْدِنَا عَشَمْ قَوِي وَ أَشَانْ دَا نَخْدُمُوا بِشَجَاعَةْ شَدِيدَةْ.

¹³ أَنِحْنَ مَا نِسَوُّوا مِثِلْ مُوسَى. هُو غَطَّى وِجْهَهْ بِمِنْدِيلْ أَشَانْ بَنِي إِسْرَائِيلْ مَا يِشِيفُوا النُّورْ الْقَاعِدْ يُفُوتْ.

¹⁴ لَاكِنْ هُمَّنْ دَوْل فِكِرْهُمْ أَنْطَمَسْ. وَ لَحَدِّي الْيَوْم كَنْ يَقْرُوا لَيْهُمْ شُرُوطْ التَّوْرَاةْ الْهِي الْمُعَاهَدَةْ الْقَدِيمَةْ، خَلَاصْ نَفْس الْمِنْدِيلْ قَاعِدْ يِغَطِّي فِكِرْهُمْ وَ مَا يِخَلِّيهُمْ يَفْهَمَوْا الْكَلَامْ عَدِيلْ. وَ الْمِنْدِيلْ دَا مَا يِنْرَفِعْ مِنْهُمْ إِلَّا كَنْ يِآمُنُوا بِالْمَسِيحْ.

¹⁵ أَيْوَى، لَحَدِّي الْيَوْم كَنْ كَلَامْ مُوسَى يَقْرُوهْ لَيْهُمْ، الْمِنْدِيلْ قَاعِدْ يِغَطِّي قُلُوبْهُمْ.

¹⁶ لَاكِنْ كَنْ نَادُمْ يِشِيلْ دَرِبْ الرَّبّ، الْمِنْدِيلْ يِنْرَفِعْ وَ هُو يَفْهَمْ عَدِيلْ.

¹⁷ وَ فِي الْكَلَامْ دَا، الرَّبّ هُو الرُّوحْ الْقُدُّوسْ. وَ أَيِّ بَكَانْ الرُّوحْ الْقُدُّوسْ هَنَا الرَّبّ قَاعِدْ فَوْقَهْ، الْحُرِّيَّةْ كُلَ قَاعِدَةْ فَوْقَهْ.

¹⁸ وَ أَنِحْنَ مَا عِنْدِنَا مِنْدِيلْ الْيِغَطِّي وُجُوهْنَا. وَ كُلِّنَا قَاعِدِينْ نِشِيفُوا نُورْ اللّٰهْ الْمَجِيدْ. وَ النُّورْ دَا يِبِينْ فَوْقنَا وَاضِحْ. وَ النُّورْ الْمَجِيدْ دَا يَجِي مِنْ رُوحْ اللّٰهْ الْقَاعِدْ يِغَيِّرْنَا زِيَادَةْ لَحَدِّي صُورِتْنَا تَبْقَى مِثِلْ صُورَةْ اللّٰهْ الْمَجِيدَةْ.