1 تَسَلونِيكِي 3 - الكتاب المقدس بالعربي الدارجي هنا تشاد

زيارة تِمُوتَاوُس

¹ أَيْوَى، أَنِحْنَ مُشْتَاقِينْ لَيْكُو. وَ وَكِتْ فَقَدْنَا صَبُرْنَا خَلَاصْ، شِلْنَا نِيَّةْ أَشَانْ نَقْعُدُوا وِحَيْدنَا فِي مَدِينَةْ أَتِينَا.

² وَ رَسَّلْنَا لَيْكُو أَخُونَا تِمُوتَاوُسْ الْيَخْدِمْ مَعَانَا سَوَا لِلّٰهْ فِي بَلِّغِينْ بِشَارَةْ الْمَسِيحْ. وَ رَسَّلْنَاهْ لِيِشَجِّعْكُو وَ يِقَوِّي إِيمَانْكُو

³ أَشَانْ نَادُمْ وَاحِدْ مِنْكُو مَا يِبَرْجِلْ بِسَبَبْ التَّعَبْ الْقَاعِدْ فَوْقكُو. إِنْتُو ذَاتْكُو تَعَرْفُوا كَدَرْ مُقَدَّرْ لَيْنَا النَّاسْ يِتَعُّبُونَا.

⁴ وَ وَكِتْ لِسَّاعْنَا قَاعِدِينْ مَعَاكُو، قُلْنَا لَيْكُو كَدَرْ التَّعَبْ يَجِي فَوْقنَا كُلِّنَا. وَ خَلَاصْ، بِقِي مِثِلْ قُلْنَا وَ دَا تَعَرْفُوهْ.

⁵ أَشَانْ دَا، وَكِتْ فَقَدْت الصَّبُرْ مَرَّةْ وَاحِدْ، رَسَّلْت لَيْكُو تِمُوتَاوُسْ أَشَانْ نِدَوْر نَعَرِفْ كَنْ إِنْتُو ثَابْتِينْ فِي إِيمَانْكُو وَلَّا لَا. وَ فِي الْوَكِتْ دَاكْ، أَنَا قَاعِدْ نِهِمّ لَيْكُو. فِي فِكْرِي، أَكُونْ إِبْلِيسْ الْيِجَرِّبْ النَّاسْ أَنَّصَرْ فَوْقكُو وَ التَّعَبْ الْأَنَا تِعِبْتَهْ فَوْقكُو مَشَى فِي الرِّيحْ سَاكِتْ.

الخبر من تِمُوتَاوُس

⁶ لَاكِنْ هَسَّعْ بَسْ، تِمُوتَاوُسْ قَبَّلْ مِنْكُو وَ جَابْ لَيْنَا خَبَرْ حَلُو. أَوْرَانَا بِإِيمَانْكُو وَ مَحَبِّتْكُو وَ قَالْ فِكِرْكُو فَوْقنَا دَايْماً فِكِرْ زَيْن وَ إِنْتُو مُشْتَاقِينْ لَيْنَا مِثِلْ أَنِحْنَ مُشْتَاقِينْ لَيْكُو.

⁷ وَ بِمِثِلْ دَا، يَا أَخْوَانِي، إِنْتُو شَجَّعْتُونَا بِإِيمَانْكُو وَ رَقَّدْتُوا قُلُوبْنَا فِي أُسُطْ تَعَبْنَا وَ صُعُوبَاتْنَا.

⁸ أَوَّلْ الْهَمّ كَتَلَانَا لَاكِنْ مِنْ سِمِعْنَا إِنْتُو ثَابْتِينْ فِي رَبِّنَا، خَلَاصْ الْحَيَاةْ بِقَتْ لَيْنَا حَلُوَّةْ بَتَّانْ.

⁹ مِنْ شِدَّةْ الْفَرْحَةْ، مَا نَعَرْفُوا كِكَّيْف نَشْكُرُوا اللّٰهْ فِي شَانْكُو. أَيْوَى فِي شَانْكُو إِنْتُو، نَفْرَحَوْا قِدَّامْ اللّٰهْ بِفَرْحَةْ كَبِيرَةْ بِلْحَيْن.

¹⁰ لَيْل وَ نَهَارْ نَسْأَلَوْا اللّٰهْ بِشِدَّةْ أَشَانْ يِلِمِّنَا بَتَّانْ مَعَاكُو وَ نِزِيدُوا لَيْكُو كُلَّ شَيّءْ اللِّسَّاعْ مُقَصِّرْ لَيْكُو فِي إِيمَانْكُو.

¹¹ وَ هَسَّعْ، خَلِّي اللّٰهْ أَبُونَا ذَاتَهْ وَ رَبِّنَا عِيسَى يِسَهُّلُوا لَيْنَا الدَّرِبْ أَشَانْ نَجُوكُو.

¹² وَ لَيْكُو إِنْتُو، خَلِّي الرَّبّ يِزِيدْ مَحَبِّتْكُو وَ يِكَتِّرْهَا أَشَانْ تِرَّايَدَوْا أَمْبَيْنَاتْكُو بِزِيَادَةْ وَ تِحِبُّوا كُلَّ النَّاسْ مِثِلْ أَنِحْنَ نِحِبُّوكُو.

¹³ وَ خَلِّي الرَّبّ يِثَبِّتْ قُلُوبْكُو أَشَانْ تُكُونُوا صَالِحِينْ وَ بَلَا عَيْب قِدَّامْ أَبُونَا اللّٰهْ فِي الْيَوْم الرَّبِّنَا عِيسَى يَجِي فَوْقَهْ مَعَ جَمَاعْتَهْ الصَّالِحِينْ.