1 صَمُوِيل 6 - الكتاب المقدس بالعربي الدارجي هنا تشادالفِلِسْطيّين قبّلوا صنْدوق اللّه 1 وَ صَنْدُوقْ اللّٰهْ قَعَدْ فِي بَلَدْ الْفِلِسْطِيِّينْ مُدَّةْ سَبْعَةْ شَهَرْ. 2 وَ الْفِلِسْطِيِّينْ نَادَوْا رُجَالْ الدِّينْ وَ الشَّوَّافِينْ وَ سَأَلَوْهُمْ وَ قَالَوْا: «كِكَّيْف نِسَوُّوا بِصَنْدُوقْ اللّٰهْ؟ وَصُّفُونَا كِكَّيْف نِسَوُّوا لِنِقَبُّلُوهْ فِي بَلَدَهْ.» 3 وَ هُمَّنْ قَالَوْا: «كَنْ تِقَبُّلُوا صَنْدُوقْ إِلٰـهْ بَنِي إِسْرَائِيلْ فِي بَلَدَهْ، مَا تِقَبُّلُوهْ سَاكِتْ. لَاكِنْ قَدُّمُوا لَيَّهْ هَدِيَّةْ لِكَفَّارَةْ الْخَطَا. وَ بَيْدَا، إِنْتُو تَشْفَوْا مِنْ الْمَرَضْ وَ تَعَرْفُوا مَالَا اللّٰهْ مَا رَفَعْ مِنْكُو الْوَبَاءْ دَا.» 4 وَ الْفِلِسْطِيِّينْ قَالَوْا: «شُنُو الْهَدِيَّةْ لِكَفَّارَةْ الْخَطَا النِّوَدُّوهَا مَعَايَهْ؟» وَ هُمَّنْ رَدَّوْا لَيْهُمْ وَ قَالَوْا: «قَدُّمُوا خَمْسَةْ دَرَادِيمْ هَنَا دَهَبْ مِثِلْ الْحُبُونْ دَوْل وَ خَمْسَةْ فَارْ هَنَا دَهَبْ عَلَيْ عَدَدْ كُبَارَاتْ الْفِلِسْطِيِّينْ. أَشَانْ الْوَبَاءْ دَا لِحِقْكُو إِنْتُو كُلُّكُو وَ كُبَارَاتْكُو كُلَ. 5 عَدُّلُوهُمْ مِثِلْ الْحُبُونْ الْكَرَبَوْكُو وَ الْفَارْ الْخَرَبْ بَلَدْكُو. وَ تِمَجُّدُوا اللّٰهْ إِلٰـهْ بَنِي إِسْرَائِيلْ. وَ بَيْدَا، أَكُونْ يِوَقِّفْ نَزِّلِينْ الْوَبَاءْ مِنْكُو إِنْتُو وَ مِنْ إِلٰـهْكُو وَ مِنْ بَلَدْكُو. 6 مَا تِقَوُّوا رُوسَيْكُو مِثِلْ زَمَانْ الْمَصْرِيِّينْ وَ فِرْعَوْن مَلِكْ مَصِرْ سَوَّوْه! أَشَانْ اللّٰهْ تَعَّبَاهُمْ حَتَّى هُمَّنْ خَلَّوْا بَنِي إِسْرَائِيلْ فَاتَوْا. 7 «وَ هَسَّعْ دَا، سَوُّوا كَارَّوْ جَدِيدْ وَ شِيلُوا بَقَرْ إِتْنَيْن شَوَايِلْ الْيَوْم وَاحِدْ كُلَ مَا رَبَطَوْا فَوْقهُمْ عُودْ هَنَا كَارَّوْ. وَ أَرْبُطُوهُمْ فِي الْكَارَّوْ دَا. وَ قَبُّلُوا عِيَالْهُمْ وَ دِسُّوهُمْ فِي الزَّرِيبَةْ. 8 شِيلُوا صَنْدُوقْ اللّٰهْ وَ خُطُّوهْ فِي الْكَارَّوْ. وَ الْخُمَامْ هَنَا الدَّهَبْ التِّقَدُّمُوهُمْ مِثِلْ هَدِيَّةْ لِكَفَّارَةْ الْخَطَا دَا، دِسُّهُمْ فِي صَنْدُوقْ آخَرْ وَ خُطُّوهْ جَنْب صَنْدُوقْ اللّٰهْ. وَ خَلَاصْ، خَلُّوا الْكَارَّوْ يَمْشِي 9 وَ شِيفُوا. كَنْ الْبَقَرْ مَشَوْا عَلَيْ حُدُودْ بَلَدْ إِسْرَائِيلْ عَلَيْ حِلَّةْ بَيْت شَمْس، تَعَرْفُوا كَدَرْ اللّٰهْ بَسْ ضَرَبَاكُو بِكُلَّ الْوَبَاءْ دَا. وَ كَنْ فَاتَوْا بِدَرِبْ آخَرْ كَمَانْ، تَعَرْفُوا كَدَرْ الشَّيّءْ الْجَاكُو، دَا مَا مِنْ اللّٰهْ لَاكِنْ صُدْفَةْ بَسْ.» 10 وَ الْفِلِسْطِيِّينْ سَوَّوْا الشَّيّءْ الْقَالَوْا لَيْهُمْ دَا. شَالَوْا بَقَرْ إِتْنَيْن شَوَايِلْ وَ رَبَطَوْهُمْ فِي الْكَارَّوْ. وَ عِيَالْهُمْ كَمَانْ دَسَّوْهُمْ فِي الزَّرِيبَةْ. 11 وَ خَلَاصْ، خَطَّوْا صَنْدُوقْ اللّٰهْ فِي الْكَارَّوْ مَعَ الصَّنْدُوقْ الْعِنْدَهْ فَوْقَهْ فَارْ وَ دَرَادِيمْ هَنَا دَهَبْ. 12 وَ الْبَقَرْ مَشَوْا عَدِيلْ عَلَيْ حِلَّةْ بَيْت شَمْس. هُمَّنْ مَاشِينْ فِي دَرِبْهُمْ وَ يَبْكُوا وَ مَا مَيَّلَوْا إِسْرَةْ وَلَّا زَيْنَةْ. وَ كُبَارَاتْ الْفِلِسْطِيِّينْ تَابَعَوْهُمْ لِلْبَقَرْ لَحَدِّي حُدُودْ بَيْت شَمْس. 13 وَ فِي الْيَوْم دَا، سُكَّانْ بَيْت شَمْس قَاعِدِينْ فِي الْوَادِي يَقْطَعَوْا الْقَمَحْ. وَ طَوَّالِي وَكِتْ شَافَوْا صَنْدُوقْ اللّٰهْ دَا، فِرْحَوْا فَرْحَةْ شَدِيدَةْ. 14 وَ وَكِتْ الْكَارَّوْ وَصَّلْ فِي زَرَعْ يَشُوعْ فِي حِلَّةْ بَيْت شَمْس، وَقَفْ. وَ فِي الْبَكَانْ دَا، فِيَّهْ حَجَرْ كَبِيرْ. وَ النَّاسْ شَقَّقَوْا حَطَبْ الْكَارَّوْ وَ دَبَحَوْا الْبَقَرْ الْإِتْنَيْن وَ حَرَّقَوْهُمْ ضَحِيَّةْ مُحَرَّقَةْ لِلّٰهْ. 15 وَ قُبَّالْ دَا، اللَّاوِيِّينْ رَفَعَوْا صَنْدُوقْ اللّٰهْ وَ الصَّنْدُوقْ الْمَعَايَهْ الْفَوْقَهْ الْأَشْيَاءْ هَنَا الدَّهَبْ وَ نَزَّلَوْهُمْ فِي الْحَجَرْ الْكَبِيرْ دَا. وَ فِي نَفْس الْيَوْم، سُكَّانْ بَيْت شَمْس قَدَّمَوْا ضَحَايَا مُحَرَّقِينْ وَ ضَحَايَا آخَرِينْ لِلّٰهْ. 16 وَ بَعَدْ شَافَوْا كُلَّ شَيّءْ الْبِقِي، كُبَارَاتْ الْفِلِسْطِيِّينْ الْخَمْسَةْ قَبَّلَوْا مَدِينَةْ عَقْرُونْ فِي نَفْس الْيَوْم. 17 وَ دَاهُو عَدَدْ دَرَادِيمْ الدَّهَبْ الْفِلِسْطِيِّينْ قَدَّمَوْهُمْ مِثِلْ هَدِيَّةْ لِكَفَّارَةْ الْخَطَا لِلّٰهْ. وَاحِدْ لِأَشْدُودْ وَ وَاحِدْ لِغَزَّةْ وَ وَاحِدْ لِأَشْقَلُونْ وَ وَاحِدْ لِقَاتْ وَ وَاحِدْ لِعَقْرُونْ. 18 وَ الْفَارْ هَنَا الدَّهَبْ كَمَانْ، عَدَدْهُمْ يِمَثِّلْ كُلَّ الْحِلَّالْ التَّابْعِينْ لِلْكُبَارَاتْ الْفِلِسْطِيِّينْ الْخَمْسَةْ. وَ الْحِلَّالْ دَوْل، هُمَّنْ الْمُدُنْ الْقَوِيِّينْ وَ الْفُرْقَانْ لَحَدِّي الْحُدُودْ قَرِيبْ لِلْحَجَرْ الْكَبِيرْ الْخَطَّوْا فَوْقَهْ صَنْدُوقْ اللّٰهْ. وَ الْحَجَرْ دَا قَاعِدْ لَحَدِّي الْيَوْم، فِي زَرَعْ يَشُوعْ الْفِي حِلَّةْ بَيْت شَمْس. 19 وَ اللّٰهْ ضَرَبْ سُكَّانْ حِلَّةْ بَيْت شَمْس أَشَانْ هُمَّنْ شَافَوْا لُبّ صَنْدُوقْ اللّٰهْ. وَ مَاتَوْا مِنْهُمْ 70 رَاجِلْ. وَ الشَّعَبْ بِقَوْا حَزْنَانِينْ أَشَانْ اللّٰهْ ضَرَبَاهُمْ ضَرْبَةْ شَدِيدَةْ. 20 وَ سُكَّانْ حِلَّةْ بَيْت شَمْس قَالَوْا: «يَاتُو الْيَقْدَرْ يَقْعُدْ قِدَّامْ اللّٰهْ الرَّبّ الْقُدُّوسْ؟ وَ صَنْدُوقْ اللّٰهْ دَا، هَسَّعْ نِوَدُّوهْ وَيْن؟» 21 وَ هُمَّنْ رَسَّلَوْا لِسُكَّانْ قَرْيَةْ يَعَرِيمْ وَ قَالَوْا لَيْهُمْ: «الْفِلِسْطِيِّينْ قَبَّلَوْا صَنْدُوقْ اللّٰهْ. هَسَّعْ دَا، تَعَالُوا وَدُّوهْ بَكَانْكُو!» |
La Bible en arabe tchadien © Alliance biblique du Tchad, 2019
Bible Society of Chad