1 صَمُوِيل 11 - الكتاب المقدس بالعربي الدارجي هنا تشاد

شَاوُول فزع سُكّان يَابِيش

¹ وَ بَعَدْ دَا، نَحَاشْ مَلِكْ بَنِي عَمُّونْ مَشَى فِي حِلَّةْ يَابِيشْ فِي تُرَابْ قِلْعَادْ وَ حَاصَرْهَا. وَ كُلَّ سُكَّانْ يَابِيشْ قِلْعَادْ قَالَوْا لَيَّهْ: «سَوِّي مَعَانَا مُعَاهَدَةْ وَ نَقْعُدُوا تِحْتَكْ.»

² وَ نَحَاشْ قَالْ لَيْهُمْ: «تَمَامْ! كَنْ نِسَوِّي مَعَاكُو مُعَاهَدَةْ دَا، إِلَّا نِسِلّ كُلَّ عُيُونْكُو الزَّيْنَايَاتْ. وَ بَيْدَا، نِجِيبْ الْإِهَانَةْ فِي كُلَّ بَنِي إِسْرَائِيلْ.»

³ وَ شُيُوخْ يَابِيشْ قَالَوْا: «أَرْجَانَا سَبْعَةْ أَيَّامْ. نِرَسُّلُوا فِي كُلَّ بَلَدْ بَنِي إِسْرَائِيلْ وَ كَنْ مَا لِقِينَا نَادُمْ يَفْزَعْنَا، خَلَاصْ نَمُرْقُوا وَ نَقْعُدُوا تِحْتَكْ.»

⁴ وَ وَكِتْ الْمُرَسَّلِينْ وَصَّلَوْا فِي حِلَّةْ شَاوُولْ الْأُسُمْهَا قِبَيْعَةْ، حَجَّوْا بِالْكَلَامْ دَا لِكُلَّ الشَّعَبْ وَ الشَّعَبْ قَمَّوْا يَبْكُوا بِحِسّ عَالِي.

⁵ وَ فِي الْوَكِتْ دَا، شَاوُولْ جَايِ مِنْ الزَّرَعْ وَرَاءْ بَقَرَهْ وَ قَالْ: «شُنُو الْبِقِي لِلشَّعَبْ وَ قَاعِدِينْ يَبْكُوا؟» وَ هُمَّنْ أَوْرَوْه بِالْخَبَرْ هَنَا نَاسْ يَابِيشْ.

⁶ وَ وَكِتْ شَاوُولْ سِمِعْ الْكَلَامْ دَا، طَوَّالِي رُوحْ اللّٰهْ نَزَلْ فَوْقَهْ وَ هُو زِعِلْ زَعَلْ شَدِيدْ.

⁷ وَ شَالْ بَقَرْ إِتْنَيْن دَبَحَاهُمْ وَ قَطَّعَاهُمْ وَ رَسَّلْ لَحَمْهُمْ فِي كُلَّ بَلَدْ إِسْرَائِيلْ. وَ قَالْ: «قُولُوا لِبَنِي إِسْرَائِيلْ: ‹أَيِّ نَادُمْ الْمَا مَرَقْ لِلْحَرِبْ وَرَاءْ شَاوُولْ وَ صَمُوِيلْ، بَقَرَهْ نِقَطِّعْهُمْ مِثِلْ دَا!›» وَ خَلَاصْ، خَوْف شَدِيدْ مِنْ اللّٰهْ دَخَلْ فِي قُلُوبْهُمْ وَ مَرَقَوْا كُلُّهُمْ مِثِلْ رَاجِلْ وَاحِدْ.

⁸ وَ فِي حِلَّةْ بَازَقْ، شَاوُولْ حَسَبْ عَسْكَرَهْ. وَ عَدَدْ رُجَالْ بَنِي إِسْرَائِيلْ 300 000 وَ رُجَالْ قَبِيلَةْ يَهُوذَا 30 000.

⁹ وَ النَّاسْ اللَّمَّوْا قَالَوْا لِلْمُرَسَّلِينْ الْجَوْا مِنْ حِلَّةْ يَابِيشْ قِلْعَادْ: «قُولُوا لِنَاسْكُو أَمْبَاكِرْ قَايْلَةْ يَلْقَوْا الْفَزَعْ.» وَ الْمُرَسَّلِينْ مَشَوْا وَ خَبَّرَوْا نَاسْ حِلَّةْ يَابِيشْ وَ هُمَّنْ فِرْحَوْا بِلْحَيْن بِالْخَبَرْ دَا.

¹⁰ وَ قَالَوْا لِبَنِي عَمُّونْ: «أَمْبَاكِرْ أَنِحْنَ نِسَلُّمُوا نُفُوسْنَا لَيْكُو وَ تِسَوُّوا فَوْقنَا كُلَّ شَيّءْ التِّدَوْرُوهْ.»

شَاوُول أنّصر في بني عَمُّون

¹¹ وَ أَمْبَاكِرْ بِفَجُرْ بَدْرِي، شَاوُولْ قَسَّمْ عَسْكَرَهْ عَلَيْ تَلَاتَةْ بَكَانْ وَ هَجَمَوْا مُعَسْكَرْ بَنِي عَمُّونْ وَ كَتَلَوْهُمْ لَحَدِّي الْحَرَّايْ بِقَتْ قَايْلَةْ. وَ الْعَسْكَرْ الْفَضَّلَوْا شَتَّتَوْا مَرَّةْ وَاحِدْ، إِتْنَيْن مَاشِينْ سَوَا كُلَ مَا فِيهْ!

¹² وَ كُلَّ النَّاسْ قَالَوْا لِصَمُوِيلْ: «يَاتُمَّنْ الْقَالَوْا: ‹شَاوُولْ مَا يَمْلُكْ فَوْقنَا؟› جِيبُوهُمْ هِنِي نَكْتُلُوهُمْ!»

¹³ وَ لَاكِنْ شَاوُولْ قَالْ: «فِي الْيَوْم دَا، مَا يَكْتُلُوا نَادُمْ وَاحِدْ كُلَ! أَشَانْ اللّٰهْ نَجَّى بَنِي إِسْرَائِيلْ فِي الْيَوْم دَا.»

¹⁴ وَ صَمُوِيلْ قَالْ لِبَنِي إِسْرَائِيلْ: «تَعَالُوا نَمْشُوا حِلَّةْ قِلْقَالْ لِنِجَدُّدُوا ثَبِّتِينْ الْمَلِكْ.»

¹⁵ وَ خَلَاصْ، كُلَّ بَنِي إِسْرَائِيلْ مَشَوْا لِحِلَّةْ قِلْقَالْ وَ ثَبَّتَوْا الْمَلِكْ شَاوُولْ قِدَّامْ اللّٰهْ. وَ قَدَّمَوْا ضَحَايَا سَلَامَةْ لِلّٰهْ. وَ بَعَدْ دَا، شَاوُولْ وَ كُلَّ بَنِي إِسْرَائِيلْ فِرْحَوْا فَرْحَةْ شَدِيدَةْ.