1 بُطْرُس 3 - الكتاب المقدس بالعربي الدارجي هنا تشاد

وصايا للعوين و الرجال

¹ وَ لَيْكَنْ إِنْتَنْ الْعَوِينْ كُلَ، خَلِّي أَيِّ مَرَةْ تَسْمَعْ عَدِيلْ كَلَامْ رَاجِلْهَا. وَ كَنْ فِيَّهْ رُجَالْ الْمَا قَاعِدِينْ يِتَابُعُوا كَلَامْ اللّٰهْ، أَكُونْ الْحَالْ الْعَدِيلَةْ هَنَا عَوِينْهُمْ تِجِيبْهُمْ فِي دَرِبْ اللّٰهْ. وَ دَا مَا بِكَلَامْ

² أَشَانْ يِشِيفُوا فَوْقهِنْ الْإِحْتِرَامْ وَ الْحَالْ الصَّالْحَةْ.

³ مَا تِنْكَرْبَنْ فِي الْجَمَالْ الْبَرَّانِي مِثِلْ الْمُشَاطْ وَ زِينَةْ هَنَا الدَّهَبْ وَ اللُّبَاسْ السَّمَحْ.

⁴ فِي بَدَلَهْ، أَنْكَرْبَنْ فِي الْجَمَالْ الدَّخْلَانِي وَ هُو جَمَالْ النَّفَسْ الْبَارِدْ وَ الْهُدُوءْ. وَ الْجَمَالْ الدَّخْلَانِي، هُو مِثِلْ حَجَرْ غَالِي الْأَبَداً مَا يَتْلَفْ وَ قِيمْتَهْ كَبِيرَةْ قِدَّامْ اللّٰهْ.

⁵ وَ مِثِلْ دَا بَسْ، زَمَانْ الْعَوِينْ الصَّالْحَاتْ الْعَشَمْهِنْ ثَابِتْ فِي اللّٰهْ جَمَّلَنْ نُفُوسْهِنْ وَ سِمْعَنْ عَدِيلْ كَلَامْ رُجَالْهِنْ.

⁶ وَ مِثِلْ دَا، سَارَةْ سِمْعَتْ كَلَامْ إِبْرَاهِيمْ وَ نَادَتَهْ سَيِّدْهَا. وَ هَسَّعْ كَنْ تِسَوَّنْ الْخَيْر وَ مَا تِخَلَّنْ أَيِّ خَوْف يَكْرُبْكَنْ، إِنْتَنْ تَبْقَنْ بَنَاتْهَا.

⁷ وَ لَيْكُو إِنْتُو الرُّجَالْ كُلَ، خَلِّي أَيِّ رَاجِلْ يَقْعُدْ مَعَ مَرْتَهْ بِمُفَاهَمَةْ وَ يَعَرِفْ تَمَامْ كَدَرْ هِي مَا قَوِيَّةْ مِثْلَهْ. كَرُّمُوا عَوِينْكُو أَشَانْ هِنَّ كُلَ يَوْرِثَنْ مَعَاكُو نِعْمَةْ الْحَيَاةْ الْاللّٰهْ يَنْطِيهَا لَيْكُو. وَ تَابُعُوا كَلَامِي دَا أَشَانْ شَيّءْ مَا يِبَرْجِلْ صَلَاوَاتْكُو.

وصايا لكل المُؤمِنين

⁸ وَ آخِرْ شَيّءْ نُقُولَهْ لَيْكُو كُلُّكُو، خَلِّي قَلِبْكُو يَبْقَى وَاحِدْ وَ خَلِّي رُوحْكُو تَبْقَى طَوِيلَةْ. أَرَّايَدَوْا أَمْبَيْنَاتْكُو بِمَحَبَّةْ أَخَوِيَّةْ وَ بِقَلِبْ حَنُونْ وَ مَسْكُنُوا نُفُوسْكُو.

⁹ كَنْ النَّاسْ يِسَوُّوا فَوْقكُو شُغُلْ فَسِلْ، مَا تُرُدُّوا لَيْهُمْ بِشُغُلْ فَسِلْ. وَ كَنْ يِعَيُّرُوكُو، مَا تُرُدُّوا لَيْهُمْ بِمُعْيَارْ. لَاكِنْ بَارُكُوهُمْ، أَشَانْ اللّٰهْ نَادَاكُو فِي دَرْبَهْ لِتِبَارُكُوا النَّاسْ وَ تَوْرُثُوا بَرَكَةْ مِنْ اللّٰهْ.

¹⁰ وَ مَكْتُوبْ فِي الْكِتَابْ: <أَيِّ نَادُمْ الْيِدَوْر يِعِيشْ أَيَّامْ سَعِيدِينْ خَلِّي يَحْفَضْ لِسَانَهْ مِنْ الْكَلَامْ الْفَسِلْ وَ خَشْمَهْ مِنْ الْكَلَامْ الْكِدِبْ

¹¹ خَلِّي يِبَعِّدْ مِنْ الْفَسَالَةْ وَ يِسَوِّي الْخَيْر. خَلِّي يِفَتِّشْ السَّلَامْ وَ يِتَابِعَهْ بِنِيَّةْ وَاحِدَةْ.

¹² أَشَانْ عَيْن اللّٰهْ تِرَاقِبْ الصَّالِحِينْ وَ هُو يَسْمَعْ صَلَاوَاتْهُمْ. لَاكِنْ اللّٰهْ يُقُمّ ضِدّ الْفَسْلِينْ.>

التعب في شان الخَيْر

¹³ وَ يَاتُو الْيِسَوِّي لَيْكُو شَيّءْ فَسِلْ، كَنْ إِنْتُو مُنْكَرِبِينْ فِي الْخَيْر؟

¹⁴ وَ كَنْ يِتَعُّبُوكُو بِسَبَبْ إِنْتُو صَالِحِينْ كُلَ، إِنْتُو مُبَارَكِينْ. مَا تَخَافَوْا مِنْهُمْ وَ مَا تِبَرْجُلُوا.

¹⁵ لَاكِنْ خُطُّوا فِي قُلُوبْكُو كَدَرْ الْمَسِيحْ، هُو قُدُّوسْ وَ هُو رَبُّكُو. أَقْعُدُوا دَايْماً جَاهِزِينْ أَشَانْ تُرُدُّوا لِأَيِّ نَادُمْ الْيَطْلُبْ مِنْكُو دَلِيلْ هَنَا الْعَشَمْ الْعِنْدُكُو.

¹⁶ لَاكِنْ حَجُّوا لَيَّهْ بِنَفَسْ بَارِدْ وَ إِحْتِرَامْ. سَوُّوا كُلَّ شَيّءْ بِنِيَّةْ مُخْلِصَةْ. وَ بَيْدَا، الْعَيْب يِسَوِّيهُمْ لِلنَّاسْ الْيَتْهَمَوْكُو وَ يِعَيُّرُوكُو فِي شَانْ الْخَيْر التِّسَوُّوهْ فِي دَرِبْ الْمَسِيحْ.

¹⁷ وَ كَنْ اللّٰهْ يَنْطِي إِذِنْ لِلنَّاسْ أَشَانْ يِتَعُّبُوكُو، أَخَيْر يِتَعُّبُوكُو بِسَبَبْ الْخَيْر الْإِنْتُو سَوَّيْتُوهْ مِنْ يِتَعُّبُوكُو بِسَبَبْ إِنْتُو سَوَّيْتُوا فَسَالَةْ.

¹⁸ وَ الْمَسِيحْ كُلَ تِعِبْ تَعَبْ وَاحِدْ وَ نِهَائِي فِي شَانْ ذُنُوبْ النَّاسْ. الصَّالِحْ مَاتْ فِي شَانْ الْمُذْنِبِينْ وَ بَيْدَا، يِوَدِّيكُو كُلُّكُو فِي حَضَرَةْ اللّٰهْ. هُو كَتَلَوْه وَ مَاتْ مِثِلْ مَوْت النَّاسْ وَ اللّٰهْ حَيَّاهْ بِالرُّوحْ الْقُدُّوسْ.

¹⁹ وَ بِقُدْرَةْ الرُّوحْ الْقُدُّوسْ، هُو مَشَى وَ بَلَّغْ لِلْأَرْوَاحْ الْقَاعِدِينْ فِي السِّجِنْ.

²⁰ زَمَانْ، الْأَرْوَاحْ دَوْل أَبَوْا مَا تَابَعَوْا كَلَامْ اللّٰهْ وَكِتْ اللّٰهْ الصَّبُورْ قَاعِدْ يَرْجَى لَحَدِّي نُوحْ يِكَمِّلْ السَّفِينَةْ. وَ نَاسْ شِيَّةْ بَسْ رِكْبَوْا فِي السَّفِينَةْ وَ عَدَدْهُمْ تَمَانَةْ وَ هُمَّنْ دَوْل نِجَوْا بِسَبَبْ الْأَلْمِي الرَّفَعْ السَّفِينَةْ.

²¹ وَ دَا مَثَلْ هَنَا الْغَطِّسِينْ الْهَسَّعْ يِنَجِّيكُو. وَ الْمُهِمّ فِي الْغَطِّسِينْ مَا غَسُولْ الْجِلِدْ مِنْ الْوَسَخْ لَاكِنْ هُو الْعَهَدْ التِّسَوُّوهْ مَعَ اللّٰهْ بِنِيَّةْ مُخْلِصَةْ. وَ الْغَطِّسِينْ يِنَجِّيكُو بِسَبَبْ بُعَاثْ عِيسَى الْمَسِيحْ.

²² وَ الْمَسِيحْ هُو الْمَشَى فَوْق فِي السَّمَاوَاتْ وَ هَسَّعْ قَاعِدْ جَنْب اللّٰهْ فِي نُصَّهْ الزَّيْنَايْ. وَ تِحْتَهْ الْمَلَائِكَةْ وَ حُكَّامْ وَ كُبَارَاتْ الْأَرْوَاحْ.