1 بُطْرُس 2 - الكتاب المقدس بالعربي الدارجي هنا تشاد

¹ أَشَانْ دَا، خَلُّوا مِنْكُو كُلَّ الْفَسَالَةْ وَ كُلَّ النَّجَاضَةْ وَ النِّفَاقْ وَ الْحُسُدْ وَ الْقَطِيعَةْ.

² وَ مِثِلْ الصَّغِيرْ الْيِتْمَنَّى لَبَنْ أَمَّهْ، إِنْتُو كُلَ أَتْمَنَّوْا كَلَامْ اللّٰهْ الْمِثِلْ لَبَنْ صَافِي. وَ بِالْكَلَامْ دَا، تَكْبُرُوا وَ تَلْقَوْا النَّجَاةْ.

³ أَشَانْ إِنْتُو دُقْتُوا وَ عِرِفْتُوا كَدَرْ رَبِّنَا الْمَسِيحْ رَحِيمْ.

عِيسَى هو الحجر الحيّ

⁴ قَرُّبُوا لَيَّهْ. هُو بَسْ الْحَجَرْ الْحَيّ الْاللّٰهْ عَزَلَهْ الْمُهِمّ بِلْحَيْن لَاكِنْ النَّاسْ مَا دَوَّرَوْه.

⁵ وَ إِنْتُو كُلَ مِثِلْ حُجَارْ الْحَيِّينْ الْاللّٰهْ قَاعِدْ يَبْنِي بَيْكُو بَيْت هَنَا رُوحَهْ. وَ إِنْتُو رُجَالْ دِينْ خَاصِّيْن وَ قَاعِدِينْ تِقَدُّمُوا لِلّٰهْ ضَحَايَا بِإِذِنْ الرُّوحْ الْقُدُّوسْ الْاللّٰهْ يَرْضَى بَيْهُمْ بِوَاسِطَةْ عِيسَى الْمَسِيحْ.

⁶ وَ اللّٰهْ قَالْ فِي الْكِتَابْ: <أَسْمَعَوْا. أَنَا نُخُطّ فِي جَبَلْ صَهْيُون حَجَرْ زَاوِيَةْ. وَ هُو الْحَجَرْ الْغَالِي الْأَنَا عَزَلْتَهْ. وَ الْيِآمِنْ بَيَّهْ، أَبَداً مَا يَخْجَلْ.>

⁷ وَ لَيْكُو إِنْتُو الْمُؤمِنِينْ، الْمَسِيحْ هُو الْحَجَرْ الْعِنْدَهْ قِيمَةْ كَبِيرَةْ. وَ لَاكِنْ لِلنَّاسْ الْمَا مُؤمِنِينْ، هُو بِقِي مِثِلْ الْكَلَامْ الْمَكْتُوبْ فِي الْكِتَابْ الْبُقُولْ: <الْحَجَرْ الْبَنَّايِينْ الْبَيْت أَوَّلْ مَا دَوَّرَوْه بِقِي الْحَجَرْ الْمُهِمّ فِي بُنَى الْبَيْت.>

⁸ وَ بَتَّانْ بُقُولْ: <أَسْمَعَوْا، أَنَا نُخُطّ حَجَرْ فِي صَهْيُون. بِسَبَبَهْ، النَّاسْ يِنْطَقَّوْا وَ يَقَعَوْا.> وَ يِنْطَقَّوْا فَوْقَهْ أَشَانْ أَبَوْا مَا يِتَابُعُوا كَلَامْ اللّٰهْ وَ دَا مُقَدَّرْ لَيْهُمْ.

⁹ لَاكِنْ كَنْ لَيْكُو إِنْتُو، بِقِيتُوا الْقَبِيلَةْ الْاللّٰهْ عَزَلَاهَا وَ رُجَالْ دِينْ هَنَا الْمَلِكْ الْكَبِيرْ وَ أُمَّةْ مُخَصَّصَةْ لِلّٰهْ وَ شَعَبْ اللّٰهْ ذَاتَهْ. هُو نَادَاكُو أَشَانْ تَمُرْقُوا مِنْ الضَّلَامْ وَ تَدْخُلُوا فِي نُورَهْ الْعَجِيبْ وَ خَلَاصْ تِبَلُّغُوا خَبَرْ هَنَا أَعْمَالْ اللّٰهْ الْكُبَارْ.

¹⁰ وَ مَكْتُوبْ فِي الْكِتَابْ: <أَوَّلْ إِنْتُو مَا شَعَبْ اللّٰهْ لَاكِنْ هَسَّعْ إِنْتُو بِقِيتُوا شَعَبَهْ. أَوَّلْ رَحْمَةْ اللّٰهْ مَا جَاتْ فَوْقكُو لَاكِنْ هَسَّعْ رَحْمَتَهْ جَاتْ فَوْقكُو خَلَاصْ.>

عبيد اللّه أجانِب في الدُنْيا

¹¹ يَا أَخْوَانِي النِّحِبُّكُو الْعَايْشِينْ فِي الدُّنْيَا مِثِلْ أَجَانِبْ وَ ضِيفَانْ، نُقُولْ لَيْكُو أَنْقَرْعُوا. شَهْوَاتْ الْإِنْسَانْ عَدُو. آبَوْا مَا تِتَابُعُوهُمْ.

¹² خَلِّي حَالْكُو فِي أُسْط النَّاسْ الْمَا مُؤمِنِينْ تَبْقَى عَدِيلَةْ. وَ بِمِثِلْ دَا، كَنْ يَكْدُبُوا فِيكُو وَ يُقُولُوا إِنْتُو نَاسْ فَسْلِينْ كُلَ، يِشِيفُوا عَمَلْكُو السَّمَحْ وَ فِي الأَخِيرْ، يِمَجُّدُوا اللّٰهْ فِي يَوْم الْفَرَجْ.

¹³ فِي شَانْ رَبِّنَا، تَابُعُوا كَلَامْ هَنَا أَيِّ نَادُمْ الْعِنْدَهْ سُلْطَةْ. تَابُعُوا كَلَامْ الْمَلِكْ، كَبِيرْ الْبَلَدْ،

¹⁴ وَ الْحُكَّامْ الْهُو خَطَّاهُمْ لِيَحْكُمُوا الْمُجْرِمِينْ وَ يَشْكُرُوا النَّاسْ الْيِسَوُّوا الْخَيْر.

¹⁵ وَ دَا الْيِدَوْرَهْ اللّٰهْ لَيْكُو. بِالْخَيْر التِّسَوُّوهْ، تِوَقُّفُوا الْكَلَامْ الْبَاطِلْ الْيُقُولُوهْ فَوْقكُو النَّاسْ الْجُهَّالْ.

¹⁶ عِيشُوا بِحُرِّيَّةْ لَاكِنْ مَا تِشِيلُوا الْحُرِّيَّةْ دِي فُرْصَةْ لِتِسَوُّوا بَيْهَا الْفَسَالَةْ وَ مَا تَنْسَوْا كَدَرْ إِنْتُو عَبِيدْ اللّٰهْ.

¹⁷ كَرُّمُوا كُلَّ النَّاسْ. حِبُّوا كُلَّ أَخْوَانْكُو الْمُؤمِنِينْ. أَخَافَوْا اللّٰهْ. كَرُّمُوا الْمَلِكْ.

وصايا للعبيد

¹⁸ وَ لَيْكُو إِنْتُو الْعَبِيدْ، أَسْمَعَوْا كَلَامْ سِيَادْكُو بِكُلَّ إِحْتِرَامْ. كَنْ هُمَّنْ زَيْنِينْ وَ كَلَامْهُمْ بَارِدْ وَلَّا كَنْ كَلَامْهُمْ مُرّ كُلَ، أَسْمَعَوْا كَلَامْهُمْ.

¹⁹ وَ أَعَرْفُوا أَيِّ نَادُمْ الْيَحْمَلْ التَّعَبْ بِصَبُرْ فِي شَانْ اللّٰهْ وَكِتْ النَّاسْ يَظُلْمُوهْ، النَّادُمْ دَا اللّٰهْ يِبَارِكَهْ.

²⁰ وَ كَنْ تِسَوُّوا خَطَا وَ بِسَبَبَهْ يُدُقُّوكُو وَ إِنْتُو تَحْمَلَوْه بِصَبُرْ، شُنُو الْفَايْدَةْ؟ لَاكِنْ كَنْ إِنْتُو تِسَوُّوا الْخَيْر وَ يِتَعُّبُوكُو بِسَبَبَهْ وَ إِنْتُو تَحْمَلَوْه بِصَبُرْ، خَلَاصْ اللّٰهْ يِبَارِكُّو.

²¹ دَا بَسْ الدَّرِبْ وَ اللّٰهْ نَادَاكُو لِتِشِيلُوهْ. أَشَانْ الْمَسِيحْ كُلَ تِعِبْ فِي شَانْكُو وَ بِقِي لَيْكُو مَثَلْ أَشَانْ تِتَابُعُوهْ.

²² <هُو مَا أَذْنَبْ وَ فِي خَشْمَهْ مَا فِي غَشّ.>

²³ وَكِتْ عَيَّرَوْه، هُو مَا رَدَّ لَيْهُمْ بِمُعْيَارْ. وَكِتْ تَعَّبَوْه، هُو مَا هَدَّدَاهُمْ. فِي بَدَلَهْ، هُو أَتْوَكَّلْ عَلَيْ اللّٰهْ الْيِحَاسِبْ بِالْحَقّ.

²⁴ وَ فِي الصَّلِيبْ، هُو بِنَفْسَهْ حَمَلْ ذُنُوبْنَا فِي جِسْمَهْ أَشَانْ نِخَلُّوا الذُّنُوبْ مَرَّةْ وَاحِدْ وَ نِعِيشُوا بِحَالْ صَالْحَةْ. وَ بِوَاسِطَةْ جِرَاحَهْ، إِنْتُو لِقِيتُوا الشِّفَاءْ.

²⁵ أَشَانْ أَوَّلْ إِنْتُو مِثِلْ غَنَمْ مُوَدِّرِينْ لَاكِنْ هَسَّعْ قَبَّلْتُوا لِرَاعِيكُو الْيَحْفَضْكُو.