1 كُرُنْتُس 10 - الكتاب المقدس بالعربي الدارجي هنا تشاد

أمْثال من زمن مُوسَى

¹ يَا أَخْوَانِي، نِدَوْر إِنْتُو تَعَرْفُوا مَعَنَى الشَّيّءْ الْبِقِي فِي زَمَنْ مُوسَى. فِي الْوَكِتْ دَاكْ، كُلَّ جُدُودْنَا كَانَوْا تِحِتْ السَّحَابَايْ وَ كُلُّهُمْ شَقَّوْا الْبَحَرْ.

² وَ كُلُّهُمْ بِقَوْا شَعَبْ مُوسَى بِغَطِّسِينْ فِي السَّحَابَايْ وَ الْبَحَرْ.

³ وَ كُلُّهُمْ أَكَلَوْا الْأَكِلْ الْوَاحِدْ الْاللّٰهْ أَنْطَاهْ لَيْهُمْ.

⁴ وَ كُلُّهُمْ شِرْبَوْا نَفْس الشَّرَابْ الْاللّٰهْ أَنْطَاهُمْ. أَيْوَى اللّٰهْ أَنْطَاهُمْ أَلْمِي مِنْ الْحَجَرْ. وَ الْحَجَرْ دَا، مَشَى مَعَاهُمْ وَ هُو الْمَسِيحْ.

⁵ وَ لَاكِنْ نَعَرْفُوا كَدَرْ فِي الأَخِيرْ اللّٰهْ مَا رِضِي بِكَتِيرِينْ مِنْهُمْ. وَ أَشَانْ دَا، كَتِيرِينْ مِنْهُمْ مَاتَوْا فِي الصَّحَرَاء.

⁶ وَ دَا كُلَّ كَيْ بِقِي أَشَانْ يَبْقَى لَيْنَا مَثَلْ. وَ خَلِّي مَا نَبْقَوْا مِثِلْهُمْ أَشَانْ هُمَّنْ حَبَّوْا الشَّرّ.

⁷ وَاحِدِينْ مِنْهُمْ بِقَوْا عَابِدِينْ أَصْنَامْ وَ مَا وَاجِبْ تَبْقَوْا مِثِلْهُمْ. وَ مَكْتُوبْ فِي الْكِتَابْ: <الشَّعَبْ قَعَدَوْا أَشَانْ يَاكُلُوا وَ يَشَرْبَوْا وَ قَمَّوْا يَلْعَبَوْا.>

⁸ وَاجِبْ مَا نَزْنَوْا مِثِلْ وَاحِدِينْ مِنْهُمْ زَنَوْا. وَ فِي يَوْم وَاحِدْ بَسْ، 23 000 نَاسْ مَاتَوْا.

⁹ وَ مَا وَاجِبْ نِجَرُّبُوا الْمَسِيحْ مِثِلْهُمْ. وَاحِدِينْ مِنْهُمْ جَرَّبَوْه وَ الدَّبِيبْ جَوْا دَمَّرَوْهُمْ.

¹⁰ وَ مَا وَاجِبْ نَشْكُوا لِلّٰهْ. وَاحِدِينْ مِنْهُمْ شَكَوْا وَ خَلَاصْ، مَلَكْ الْمَوْت جَاءْ دَمَّرَاهُمْ.

¹¹ وَ دَا كُلَّ كَيْ جَاءْ فَوْقهُمْ أَشَانْ يَبْقَى لَيْنَا مَثَلْ وَ أَنْكَتَبْ أَشَانْ يِعَلِّمْنَا أَنِحْنَ الْعَايْشِينْ فِي الزَّمَنْ الْأَخِيرْ.

¹² وَ فِي شَانْ دَا، خَلِّي كُلِّ نَادُمْ الْيُقُولْ هُو ثَابِتْ فِي الْإِيمَانْ يِنْقَرِعْ أَشَانْ مَا يَمْرُقْ مِنْ الدَّرِبْ.

¹³ مَا فِي تَجْرِبَةْ جَاتْ فَوْقكُو الْمَا جَاتْ فِي كُلَّ النَّاسْ. وَ اللّٰهْ هُو صَادِقْ وَ بِالتَّجْرِبَةْ دِي، هُو يَفْتَحْ لَيْكُو دَرِبْ أَشَانْ تَمُرْقُوا بَيَّهْ وَ يَنْطِيكُو الْقُدْرَةْ أَشَانْ تَصْبُرُوا فِي التَّجْرِبَةْ دِي.

¹⁴ يَا أَخْوَانِي النِّحِبُّكُو، فَكُّرُوا فِي كُلَّ الْكَلَامْ دَا وَ أَنْقَرْعُوا مِنْ عِبَادَةْ الْأَصْنَامْ.

¹⁵ أَنَا قَاعِدْ نِحَجِّي كَلَامْ عَدِيلْ لِلنَّاسْ الْعَاقْلِينْ. فَكُّرُوا فِي كَلَامِي وَ مَيُّزُوهْ.

¹⁶ فَكُّرُوا فِي عَشَاءْ الْمَسِيحْ وَ فِي كَاسْ عَصِيرْ الْعِنَبْ النَّشَرْبَوْا مِنَّهْ وَ نَشْكُرُوا اللّٰهْ. وَ وَكِتْ نَشَرْبَوْا مِنَّهْ، أَنِحْنَ مَا مُشْتَرِكِينْ فِي دَمّ الْمَسِيحْ وَلَّا؟ وَ فَكُّرُوا فِي الْخُبْزَةْ النَّكْسُرُوهَا. وَكِتْ نَاكُلُوا مِنْهَا، أَنِحْنَ مَا مُشْتَرِكِينْ فِي جِسِمْ الْمَسِيحْ وَلَّا؟

¹⁷ أَيْوَى، أَشَانْ الْخُبْزَةْ دِي وَاحِدَةْ وَ أَنِحْنَ الْكَتِيرِينْ كُلَ بِقِينَا جِسِمْ وَاحِدْ بِأَكِلْنَا لِلْخُبْزَةْ الْوَاحِدَةْ دِي.

¹⁸ فَكُّرُوا فِي عِبَادَةْ هَنَا بَنِي إِسْرَائِيلْ. النَّاسْ الْيَاكُلُوا مِنْ لَحَمْ الضَّحِيَّةْ الْقَدَّمَوْهَا فِي الْمَدْبَحْ مُشْتَرِكِينْ فِي الضَّحِيَّةْ دِي.

¹⁹ وَ مَالَا أَنَا قُلْت لَيْكُو الْكَلَامْ دَا؟ هَلْ أَنَا قُلْت اللَّحَمْ الْيِقَدُّمُوهْ ضَحِيَّةْ لِلْأَصْنَامْ عِنْدَهْ قُدْرَةْ وَلَّا؟ هَلْ أَنَا قُلْت الصَّنَمْ عِنْدَهْ قُدْرَةْ وَلَّا؟

²⁰ لَا، أَبَداً! لَاكِنْ نِدَوْر نُقُولْ لَيْكُو كَدَرْ الضَّحِيَّةْ دِي، قَدَّمَوْهَا لِلشَّوَاطِينْ مَا لِلّٰهْ. وَ أَنَا مَا نِدَوْر إِنْتُو تَبْقَوْا مُشْتَرِكِينْ مَعَ الشَّوَاطِينْ.

²¹ مَا وَاجِبْ تَشَرْبَوْا مِنْ كَاسْ رَبِّنَا الْمَسِيحْ وَ بَتَّانْ مِنْ كَاسْ الشَّوَاطِينْ كُلَ. مَا وَاجِبْ تِشْتَرُكُوا فِي عَشَاءْ رَبِّنَا الْمَسِيحْ وَ بَتَّانْ فِي عَشَاءْ الشَّوَاطِينْ كُلَ.

²² وَلَّا نِدَوْرُوا نِزَعُّلُوا رَبِّنَا؟ لَا! أَنِحْنَ قَادْرِينْ مِنَّهْ هُو وَلَّا؟ لَا!

هل كُلِّ شيّء حلال؟

²³ إِنْتُو تُقُولُوا: «كُلِّ شَيّءْ حَلَالْ.» وَ لَاكِنْ نُقُولْ مَا كُلِّ شَيّءْ عِنْدَهْ فَايْدَةْ. تُقُولُوا: «كُلِّ شَيّءْ حَلَالْ.» لَاكِنْ مَا كُلِّ شَيّءْ يِقَوِّي الْإِيمَانْ.

²⁴ خَلِّي أَيِّ وَاحِدْ يُخُطّ بَالَهْ فِي الشَّيّءْ الْيِجِيبْ فَايْدَةْ لِأَخُوهْ وَ مَا فِي الشَّيّءْ الْيِجِيبْ فَايْدَةْ لَيَّهْ هُو وِحَيْدَهْ بَسْ.

²⁵ اللَّحَمْ الْيِبِيعُوهْ فِي السُّوقْ دَا، آكُلُوهْ بَلَا شَكَكْ.

²⁶ أَشَانْ مَكْتُوبْ فِي الْكِتَابْ: <لِلّٰهْ الْأَرْض وَ كُلَّ شَيّءْ الْفَوْقهَا.>

²⁷ كَنْ نَادُمْ مَا مُؤمِنْ يَعَزِمْكُو أَشَانْ تِعَشُّوا مَعَايَهْ وَ كَنْ عِنْدُكُو نِيَّةْ، أَمْشُوا وَ عَشُّوا مَعَايَهْ. آكُلُوا كُلِّ شَيّءْ الْيِقَدُّمُوهْ لَيْكُو بَلَا شَكَكْ.

²⁸ لَاكِنْ كَنْ نَادُمْ وَاحِدْ يُقُولْ لَيْكُو: «اللَّحَمْ دَا هَنَا الضَّحِيَّةْ الْقَدَّمَوْهَا لِلْأَصْنَامْ»، فِي الْبَكَانْ دَا بَسْ، مَا تَاكُلُوهْ. فَكُّرُوا فِي النَّادُمْ الْأَوْرَاكُو بَيَّهْ وَ فِي الشَّكَكْ الْهُو عِنْدَهْ فِي شَانْ اللَّحَمْ دَا.

²⁹ أَنَا مَا نُقُولْ إِنْتُو عِنْدُكُو شَكَكْ لَاكِنْ النَّادُمْ الْأَوْرَاكُو، هُو بَسْ عِنْدَهْ شَكَكْ. أَنَا مَا نِحَدِّدْ الْحُرِّيَّةْ الْعِنْدِي فِي شَانْ شَكَكْ هَنَا نَادُمْ آخَرْ.

³⁰ أَنَا شَكَرْت اللّٰهْ فِي شَانْ الْأَكِلْ النَّاكُلَهْ وَ خَلَاصْ، مَا نِدَوْر نَاسْ يُقُولُوا كَلَامْ فَسِلْ فَوْقِي أَشَانْ الْأَكِلْ الشَّكَرْت اللّٰهْ فِي شَانَهْ.

³¹ وَ خَلَاصْ، فِي كُلِّ شَيّءْ التَّاكُلُوهْ وَ تَشَرْبَوْه وَ تِسَوُّوهْ، مَجُّدُوا اللّٰهْ. مَجُّدُوهْ فِي كُلِّ شَيّءْ.

³² مَا تَبْقَوْا سَبَبْ لِأَيِّ نَادُمْ لِتَمُرْقُوهْ مِنْ الدَّرِبْ، وَ لَا لِلْيَهُودْ وَ لَا لِلْيُونَانِيِّينْ وَ لَا لِنَاسْ اللّٰهْ أُمَّةْ الْمَسِيحْ.

³³ سَوُّوا مِثْلِي أَنَا. أَنَا نِدَوْر دَايْماً نِسَوِّي الشَّيّءْ الْكُلَّ النَّاسْ يَرْضَوْا بَيَّهْ. وَ مَا نِفَتِّشْ الشَّيّءْ الْيِجِيبْ لَيِّ أَنَا بَسْ فَايْدَةْ لَاكِنْ نِفَتِّشْ الشَّيّءْ الْيِجِيبْ فَايْدَةْ لِكُلَّ النَّاسْ أَشَانْ نِدَوْر هُمَّنْ يَنْجَوْا.