සලමොන්ගේ ප්‍රඥාව 19 - Sinhala New Revised Version 2018

රතු මුහුද මහා මාවතක් වීම

¹ අභක්තිකයෝ අන්තීමය දක්වා දයා විරහිත කෝපය මඟින් පහර ලැබූ හ. මන්ද, ඔවුන් කරන්නට යන දේ දෙවිඳාණෝ කල්තියා දැන සිටි සේක.

² එතුමන්ගේ සෙනඟට යන්නට අවසර දී ඔවුන් කඩිනම් කළ පසු, මිසර වාසීන් ඔවුන්ගේ සිත් වෙනස් කොට ඉශ්රායෙල් ජනයා ලුහුබැඳ යන බව එතුමාණෝ දැන සිටි සේක.

³ ඔවුන්ගේ අවමංගල්‍ය සිරිත් විරිත් ඔවුන් පවත්වමින්, සොහොන් කොත් ළඟ තමන්ගේ මියගිය අය ගැන ඔවුන් වැලපෙද්දී තව අනුවණ දෙයක් කිරීමට ඔව්හු සිතට ගත්හ. එනම්, තමන්ගේ දේශයෙන් පිටත් ව යන ලෙස බැගෑපත් ව ඉල්ලුම් කළ ජනතාව පලායන්නන් මෙන් සළකා ඔවුන් ලුහුබැඳ යාමට පිටත්වීම යි.

⁴ මෙවැනි අන්ත පරාජයකට ඔවුන් පොළඹවන ලද්දේ ඔවුන්ට ම ගැළපෙන ඉරණමක් මඟිනි. ඔවුන්ගේ දුක්කම්කටොලුවලට තව විශේෂ දඬුවමක් එකතු වන ලෙස ඒ ඉරණම ඔවුන්ට ඒ තාක් සිදු වූ දේ අමතක වෙන්නට සැලසී ය.

⁵ එහෙත්, ඔබේ සෙනඟ පුදුම ලෙස ගමන යන විට මිසර වැසියෝ පුදුමකාර මරණයකට මුහුණ දුන් හ.

⁶ එහෙත්, සියලු අනතුරින් ඔබේ ජනතාව ගළවාලනු පිණිස මුළු මැවිල්ල ම ඔබේ අණට කීකරු වී සොබා දහමේ නවතාවකින් හැඩගැසුණේ ය.

⁷ කඳවුරට ඉහළින් වලාකුළක් මතු විය. ජලය තිබූ ස්ථානයේ වියළි ගොඩබිම හටගැනිණි. රතු මුහුද බාධා විරහිත මාර්ගයක් විය. බිහිසුණු මුහුදු ජලය පලාවන් තණ බිමක් විය.

⁸ ඔබේ හස්තයෙන් ආවරණය ලැබ මුළු ජාතිය ම මේ අරුමපුදුම හාස්කම් දෙස බල බලා මුහුද මැදින් ගමන් කළෝ ය.

⁹ ජනතාව තණ බිමේ සිටින අසුන් මෙන් වූ හ. සමිඳුනි, ඔවුන්ගේ විමුක්තිදායකයාණන්ගේ පසස් ගී ගය ගයා ඔව්හු බැටළු පැටවුන් මෙන් පැන පැන ගියහ.

සොබා දහම වෙනස් වීම

¹⁰ ඔවුන්ගේ වහල් ජීවිත කාලයේ දී වූ සිද්ධි ඔවුන්ට මතක් විය. සතුන් වෙනුවට මදුරුවන් රට තුළ බෝවෙන හැටිත් මත්ස්‍යයන් වෙනුවට ගඟින් විශාල ගණනාවක් මැඩියන් පිට වූ හැටිත් ඔවුන්ට මතක් විය.

¹¹ ඉන්පසු පක්ෂීන් බෝවුණ පුදුමාකාරය ඔව්හු දුටහ. එනම්, සාගින්නෙන් පෙළී ඔවුන් රසවත් ආහාරයක්

¹² ඉල්ලූ විට ඔවුන්ට තෘප්තිය දෙනු සඳහා මුහුදින් පක්ෂීහු නික්ම ආහ.

මිසර වාසීන්ගේ බරපතල වරද

¹³ එහෙත්, කලින් කරන අනතුරු ඇඟවීමක් මෙන් බිහිසුණු ගිගුරුම් සහිත ව පවිටුන් පිට දඬුවම් පැමිණියේ ය. ඔවුන් විදේශීන් කෙරෙහි දැඩි ද්වේෂයක් පෑ නිසා ඒ අපරාධවලට දුක් විඳීම යුක්ති සහගත විය.

¹⁴ සමහරෙකු විසින් කරන ලද්දේ නාඳුනන අය පැමිණි විට ඔවුන් සාදරයෙන් නොපිළිගැනීම යි. එහෙත්, මිසර වාසීන් විසින් කරන ලද්දේ අමුත්තන් සහ හිතවතුන් වහලුන් කිරීම යි.

¹⁵ ඉහත කී නුවර වැසියන් මුල පටන් ම විදේශීන්ට වෛර කළ බැවින් නිසි කල ඔවුන්ට දඬුවම් දෙනු ලැබේ.

¹⁶ එහෙත් මිසර වැසියන් කෙළේ එවැන්නක් නොවේ. ඔව්හු උත්සවාකාරයෙන් ඔබේ සෙනඟ පිළිගත්හ. ඔවුන්ට සමාන අයිතිවාසිකම් දුන් පසු වහල් සේවයෙන් ඔවුන්ට දුක් දුන්නෝ ය.

¹⁷ දැහැමියාගේ දොරකඩ දී පෙර කී අයට වූවාක් මෙන් ඔවුන්ගේ ඇස් අන්ධ විය. අන්ධකාරය ඔවුන් වටේට ම කට අයාගෙන සිටිද්දී සැම කෙනෙකුට ම තමාගේ දොරින් යාම සඳහා අතපතගාන්නට සිදු විය.

නික්මයාමේ දී සොබා දහම වෙනස් වීම

¹⁸ වීණාවක ධ්වනිය නිරතුරු රැකගෙන ස්වර හඬ මඟින් තාලය වෙනස් වෙන්නාක් මෙන් ලෝක මහා භූතයන්ගේ ලක්ෂණ ද වෙනස් විය. සිද්ධීන් ගැන පරීක්ෂා කරන විට මෙය පැහැදිලි ව පෙනේ.

¹⁹ ගොඩබිම වසන සත්තු ජලචර සත්වයෝ වූ හ. පීනන සත්තු ගොඩබිමට පැමිණියාහ.

²⁰ ජලය තුළ ගින්නේ රශ්මිය වැඩි විය. යමක් නිවන ගුණය ජලයෙන් නැති විය.

²¹ තවද, ගින්න ඒ මැදට පැමිණි, දුර්වල සතුන්ගේ මාංසයට කාවැදුණ නමුත්, එය නොදැවුණේ ය. හිම කැට පහසුවෙන් දිය වී යන නමුත්, එබඳු ස්වර්ගික ආහාරය ගින්නෙන් දිය වී නො ගියේ ය.

අවසානය

²² සමිඳුනි, සැබැවින් ම ඔබ ඔබේ සෙනඟ සැම අතින් ම ශ්‍රේෂ්ඨ කළ සේක; මහිමයට පත් කළ සේක. ඔබ වහන්සේ ඔවුන් කිසි දා අත් නොහැර, නිරතුරු සැම තැන්හි ඔවුන් හා සිටිමින් ඔවුන්ට ආධාර කළ සේක.