උපදේශකයා හෙවත් සිරාක් 21 - Sinhala New Revised Version 2018

විවිධ පාප

¹ මාගේ පුත්‍රය, ඔබ පව් කෙළෙහි ද? නැවත එසේ නොකරන්න. ඔබේ පසුගිය පව්වලට සමාව අයැදින්න.

² සර්පයෙකුගෙන් පලා යන්නාක් මෙන් පාපය කෙරෙන් පලා යන්න. ඔබ කිට්ටු වුවහොත් ඌ ඔබට දෂ්ට කරනු ඇත. උගේ දත් සිංහයෙකුගේ දත් වැනි ය; ඒවා මිනිසාගේ ප්‍රාණය පැහැර ගන්නේ ය.

³ නීති කඩ කිරීම දෙමුවහත් කඩුවකි; එයින් සිදු වන තුවාළ සුව කළ නොහැකි ය.

⁴ භීතිය හා බලහත්කාරය මාලිගා වනසන්නේ ය. එසේ ම කාලකණ්ණිකම අහංකාරිකයන්ගේ ගෘහය විනාශ කරන්නේ ය.

⁵ දුප්පතාගේ යාච්ඤාව දෙවියන් වහන්සේගේ සවනෙහි වැදෙන්නේ ය. උන් වහන්සේගේ විනිශ්චය අප්‍රමාද ව පැමිණෙන්නේ ය.

⁶ තරවටුව අප්‍රිය කරන්නා පව්කාරයාගේ අඩි පාරේ ගමන් කරන්නේ ය. සමිඳුන් හට ගරුබිය පාන්නා තම හෘදයෙන් මනස්ස්ථාප වන්නේ ය.

⁷ මුඛරි කථිකයා හැම තැන ම ප්‍රසිද්ධ ය. එහෙත්, කල්පනා කරන මිනිසා ඔහුගේ කතාවෙහි අඩු පාඩු දන්නේ ය.

⁸ තමාගේ ගෙය අනුන්ගේ මුදලින් ගොඩනැඟීම තමාගේ සොහොන් ගෙයට ගල් එකතු කිරීමක් වැනි ය.

⁹ නීතිගරුක නොවන මිනිසුන්ගේ එකතුව කොහු ගොඩක් වැනි ය. එය ඇවිලෙන ගින්නෙන් අවසන් වන්නේ ය.

¹⁰ පවිටුන්ගේ මාර්ගය සුමුදු ලෙස සකස් කර ඇත්තේ ය. එහෙත්, එහි කෙළවර පාතාල ලෝකයෙන් අවසන් වන්නේ ය.

ඥානවන්තයා සහ අඥානයා

¹¹ නීතිය පිළිපදින්නා තමාගේ හැඟීම් පාලනය කර ගන්නේ ය. සමිඳුන් කෙරෙහි පාන ගරුබිය ප්‍රඥාවෙන් සම්පූර්ණ වන්නේ ය.

¹² බුද්ධිය නැත්තෙකුට කිසිවක් ඉගෙනගත නොහැකි ය. එහෙත්, බුද්ධිය නිසා දොම්නස වැඩි විය හැකි ය.

¹³ ප්‍රඥාවන්තයාගේ දැනුම ගංවතුරක් සේ වැඩි වෙයි. ඔහුගේ උපදේශ ගලන ගඟක් වැනි ය.

¹⁴ මෝඩයාගේ හෘදය බිඳුණු භාජනයක් වැනි ය. දැනුම එහි නොරඳන්නේ ය.

¹⁵ වැදගත් මිනිසෙක් පණ්ඩිත කියමනක් අසන්නේ නම්, ඔහු එය අගය කර, එයට තවත් එකතු කරන්නේ ය. ළාමක තැනැත්තා එය අසා සිනාසෙයි; ඔහු එය තමා පිටුපසට විසිකරයි.

¹⁶ මෝඩයකුගේ කතාව ගමනෙහි දී ගෙනයන බරක් මෙනි. එහෙත්, නැණවතාගේ වදන් ඇසීම ප්‍රසන්නකර දෙයකි.

¹⁷ නැණවතාගේ කතාව සභාව නොඉවසිල්ලෙන් බලාපොරොත්තු වන්නේ ය. ඔහු කියන දේ ගැන සියලුදෙන දැඩි අවධානය යොමු කරන්නෝ ය.

¹⁸ මෝඩයාගේ ප්‍රඥාව ගෙයක නටබුන් වැනි ය. මෝඩයාගේ දැනුම එකටෙක නොගැළපෙන කතාව ය.

¹⁹ අඥානයාට ශික්ෂණය වනාහි පාදයෙහි දමන ලද විලංගු වැනි ය; දකුණතෙහි දමන ලද මාංචු වැනි ය.

²⁰ මෝඩයා මහ හඬින් සිනාසෙන්නේ ය. නැණවතා නිසල ව සිනාසෙන්නේ ය.

²¹ නැණවතාට උපදෙස් රන්මුවා අබරණයකි. එය ඔහුගේ දකුණතෙහි ලූ වළල්ලක් මෙනි.

²² අධම මෝඩයා කඩිසර ලෙස ගොස් ගෙයකට වදින්නේ ය. පළපුරුදුකම් ඇති මිනිසා විනීත ලීලාවක් දක්වන්නේ ය.

²³ අඥානයා දොර ළඟ සිට ඇතුළට එබී බලන්නේ ය. විනීත මිනිසා පිටත නැවතී සිටින්නේ ය.

²⁴ දොරවල් ළඟ සිට ඇහුම්කන් දීම අශික්ෂිත මිනිසෙකු බවට ලකුණකි. නැණවත් මිනිසා එබඳු දෙයක් කිරීමට ලජ්ජා වන්නේ ය.

²⁵ වාචාලයන්ගේ තොල් අනුන්ගේ වචන යළිත් කියන්නේ ය. නැණවතුන්ගේ වචන පරීක්ෂාකාරී ව කියනු ලබන්නේ ය.

²⁶ මෝඩයන්ගේ හදවත ඔවුන්ගේ වචනවලින් ප්‍රකාශ වන්නේ ය. නැණවතුන්ගේ වචනවලින් ඔවුන්ගේ හදවත ප්‍රකාශ වන්නේ ය.

²⁷ සතුරාට සාප කරන දුෂ්ට මිනිසා තමාට ම සාප කරගන්නේ ය.

²⁸ අනුන්ගේ දොස් පතුරුවන්නා තමාට ම හානියක් සිදු කර ගන්නේ ය. ඔහු අසල්වැසියන්ගේ පිළිකුලට භාජන වන්නේ ය.