උපදේශකයා හෙවත් සිරාක් 2 - Sinhala New Revised Version 2018

කම්කටොලු මැද දේව ගරුබිය

¹ මාගේ පුත්‍රය, ඔබ සමිඳුන් හට සේවය කිරීමට අදහස් කරන්නෙහි නම්, කරදර හිරිහැර විඳීමට සූදානම් වන්න.

² අවංක හෘදයක් ඇති ව සිටින්න; ධෛර්යවත් වන්න; විපත් කාලයේ දී බිය නොවී සිටින්න;

³ සමිඳුන් හට ඇලුම් ව සිටින්න; එතුමන් අත් නොහරින්න. එවිට ඔබේ අන්තිම දවසෙහි දී ඔබ ගරුබුහුමන් ලබන්නෙහි ය.

⁴ ඔබට සිදු වන සියලු දේ පිළිගන්න. ඔබේ අසරණ තත්ත්වයෙහි වරින් වර ඇති වන වෙනස්කම්වල දී ඉවසිලිමත් වන්න.

⁵ රත්රන් ගින්නෙන් උරගා බලනු ලැබේ. තෝරාගත් අය නින්දාව නමැති උදුනෙහි පරීක්ෂා කරනු ලබන්නෝ ය.

⁶ ඔබේ විශ්වාසය එතුමන් තුළ තබන්න. එතුමන් ඔබට උපකාරී වනු ඇත. අවංක මාර්ගය ඔස්සේ යන්න: එතුමන් කෙරෙහි බලාපොරොත්තුව තබන්න.

⁷ සමිඳුන් හට ගරුබිය දක්වන ඔබ එතුමන්ගේ දයාව, බලාපොරොත්තු වන්න. ඔබ නොවැටෙන පිණිස මාර්ගයෙන් ඉවත් ව නොයන්න.

⁸ සමිඳුන් හට ගරුබිය දක්වන ඔබ එතුමන් කෙරෙහි විශ්වාසය තබන්න. ඔබේ විපාකය නිසැක ය.

⁹ සමිඳුන් හට ගරුබිය පාන ඔබ එතුමන්ගෙන් යහපත් දේ බලාපොරොත්තු වන්න. සදා ප්‍රීතිය ද දයාව ද බලාපොරොත්තු වන්න.

¹⁰ යටගිය පරම්පරාවන් ගැන සිතා බලන්න; සමිඳුන් කෙරෙහි විශ්වාසය තැබූ කවරෙක් ලජ්ජාවට පත් වූයේ ද? එතුමන්ට ස්ථිර ලෙස ගරුබිය පෑ කවරෙක් අත්හරිනු ලැබුයේ ද? එතුමන්ගෙන් පිහිට පැතූ කවරෙක් පිළිතුරු නොලැබ සිටියේ ද?

¹¹ සමිඳාණෝ අනුකම්පා සහගත ය, දයාවන්ත ය; එතුමාණෝ පව් කමා කර විපත් දවසේ දී ගැළවීම දෙන සේක.

¹² අධෛර්යට පත්වන්නන් හට ද වීර්යය නැති අයට ද වන විපතක මහත! දෙබිඩි මාවතක පා නඟන පව්කරුවාට ද එසේ ම සිදුවේ.

¹³ විශ්වාසය නැති උදාසීන හෘදයට වන විපතක මහත! මෙබඳු අයට ආරක්ෂාවක් නැත්තේ ය.

¹⁴ සටනෙහි පරාජිත වූ ඔබට වන විපතක මහත! සමිඳාණන් ඔබ බැලීමට වඩින විට ඔබ කුමක් කරන්නට යන්නෙහි ද?

¹⁵ සමිඳුන් හට ගරුබිය පාන්නෝ එතුමන්ගේ අණට අකීකරු නොවේ. එතුමන්ට ප්‍රේම කරන්නෝ එතුමන්ගේ මාර්ග ආරක්ෂා කරන්නෝ ය.

¹⁶ සමිඳුන් හට ගරුබිය පාන්නෝ එතුමන් ප්‍රසන්න කිරීමට සොයන්නෝ ය. එතුමන්ට ප්‍රේම කරන්නෝ එතුමන්ගේ ව්‍යවස්ථාවෙන් තෘප්තිය ලබාගන්නෝ ය.

¹⁷ සමිඳුන්ට ගරුබිය පාන්නෝ සූදානම් හෘදයක් ඇති ව සිටින්නෝ ය; ඔව්හු එතුමන් ඉදිරියෙහි යටහත් පහත් වන්නෝ ය.

¹⁸ අපි මිනිසුන්ගේ අත්වලට නොව සමිඳුන්ගේ අත්වලට බාර වෙමු. එතුමන්ගේ තේජස යම් සේ ද, එතුමන්ගේ කරුණාවත් එසේ ම ය.