Sofonías 1 - Biblia Wichi

¹ Häp täja Lhawuk lhämet tä ifwenho Sofonías häp ifwalas p'ante Josías, Amón lhäs, tä häpe Judá laka rey. Wet Sofonías häpe p'ante Cusi lhäs, wet Cusi lajcha häp Gedalías, wet Gedalías lajcha häp Amarías, wet Amarías lajcha häp Ezequías.

Lhawuk itäyhthila nilhokej m'ak tä i'pe honhat

² Lhawuk lhämet yok: “Oyämla nofwej nilhokej m'ak tä i'pe honhat tä otäyhat.

³ Otäyhthila wichi lhäy'e itshätäy, wet äp otäyhthila afwenchey lhäy'e w'ahat. Otihiyeja lewit'äyhyaj häp wichi tä ni'isahen, wet otifwiyeja nilhokej wichi tä i'pe honhat.”

Lhawuk lhämet tä itiyej Judá lheley

⁴ “Oneyhthiphäla otkwey wet otasnhila häp Judá lheley, lhäy'e nilhokej wichi tä ihi Jerusalén. Ohämthila lhamel tä kamaj n'okwiyej häp dios tä kamatache tä lhey Ba'al, wet wichi nemla yen tichunhayaja Ba'al laka sacerdotes.

⁵ Oyämlat nofwej wichi tä i'pe lewukwey tä n'okwiyej katetsel, lhäy'e häp iyhäj tä itsinen lakamchetey tä n'okwi n'oyej tä äp hip'ajtej tä n'okwiyej n'ocheyä tä lhey Milcom.

⁶ Wet äpte otäyhthila wichi tä ile n'oyej, häp wichi tä nemhit t'u n'okwe wet nemhit tay'ätshan n'oye.”

⁷ ¡Is chik amel lhok tam tä lhehi tä Lhawuk tatache, tsi Lhawuk laka ifwala atott'a alhoho! Lhawuk lhaiwaklhat häpkhilek ilänhen laka wichi, tet iwoye tä lhamel ilänhen itshätäy tä iwo t'awayhata häp lham. ¡Matche, t'änhiyela lhamel tä pajche iniwhatlä n'olänyaj!

⁸ Lhawuk yok, “Chik nichäte ifwalatso, otasnhila niyatey lhäy'e rey leles, lhäy'e nilhokej wichi tä taw'uyhiche wichi iyhäj tä w'enha lhamej lew'uyis tä iwo len'okhayaja, tä lhamel n'okwiyej lecheyälis tä w'enha lhamejen.

⁹ Ifwalatso otasnhila lhamel tä iten wichi tä w'enha lhamejen lakeyis tä lhamel n'okwiyej lecheyälis. Wet ohämthila wichi tä hich'atchehen lakeyis tä iwoye, lhäy'e tä akantses, lhamel yen ch'isukyajw'eta laka niyat lew'et.”

¹⁰ Lhawuk yok: “Chik nichäte ifwalatso, pitsajiyela n'ot'änyajay tä tume Jerusalén lelafwek tä tuntey lepe tä w'ahat kotses len'äyhitaj. Äpte wichi tä ihi Jerusalén lhip tä nech'ayek iwohla lhafwyhayaja, wet nech'e äp pitsajiyela hupuy tä nichätche kanhi, lepak äytaji, tumhiyela tachenhas.

¹¹ ¡Amel tä haw'et Jerusalén lhip tä lhey Fwelhek, afwchehchä, ämetchehen afwyhayajay! ¡Tsi häp tä wichi tä ifwellhi lakäywet tä wuj tä hiw'en y'inhihena t'at, lhamel nofwiyeja t'at tä y'inhen!

¹² “Chik nichäte ifwalatso, otchumhiyela ochäkw wet ohutunhiyeja'pe Jerusalén tsi oyahnhila'pe. Wet otasnhila wichi tä iwo t'elakw'eta tä letichunhayaj yok, Matche tä otamsek ihi. Lhamel tet iwoye hat'es tä õ'tsäyho n'olhäthi tä õkniyäyayej tä äp õknitsäyaho elh n'olhäthi. Matche tä letamsekis ihi lhamel wet yok, Mathichet'a chik Lhawuk iwohiyela m'ak chik häpe.

¹³ “Häp tä tamenej tä wichi iyhäj isohiyeja lakäywet wet iwasthihichela lewukwey. Lhamel yenhichelhila lewukwey mat ihichet'alachufwi. Lhamel tutcheyhihena, itihlahchä uvas, mat tek iyähiyeja t'i tä hat'es.”

Lhawuk laka ifwala tä wuj tä iwo lewäkwa

¹⁴ Atott'a alhoho Lhawuk laka ifwala tä wuj, nek t'at, pajiyejt'a chik näm. Häpkhila ifwala tä wuj tä ni'isa, tehlat iwoye m'ak chik tapay. Tejlak häpe wichi tä n'oka'tshayajchal, tha lhamel tafwiyejchelahchä lenowayhyaj.

¹⁵ Häpkhila ifwala tä Lhawuk wuj tä iwo lewäkwa. Häpe ifwala tä n'oteläythayaj wet lhäy'e tä häpe n'olhakli. Wasihila honhat, wuj lewit'äyhyaj tä ihi. Tehlat iwoyek honatsi i'pe honhat, wujla pule lhayis tä näm, ichalajilahchä.

¹⁶ Ifwalatso õyafwuthichehena n'ofwolis trompetas, wet sip'älis t'änhihena, tatayhlä honhates tä õyen lelafweka tuntey, lhäy'e laka hupuy tä atoschephä tä i'pe n'olafwek tselhäs tä sip'älis ihiche tä iyahinpe honhat.

¹⁷ Lhawuk yok: “Ow'enhihola lelhakli häp wichi. Lhamel tachasichehenat tä inukwe, tehlat iwoyek asnamis, tsi häp tä lhamel tatayej n'ohlä lech'isukyajay. Wet lew'oyis nitsäyhichelahchä, tehlat inät, wet lep'itseyhay lhahila'pe honhat, tehlat iwoye y'amhuy.”

¹⁸ Chik näm ifwala tä Lhawuk iwo lewäkwa, niwohit m'ak chik isiyeja, chik plata wok oro. Tsi häp tä Lhawuk lewäkw häpe itäj wet iwunhiyeja nilhokej lhamel laka honhat. Wet nilhokej wichi tä i'pe honhat thahya tä nofwiyeja.