Prov 1 - Biblia Wichi

M'ak tä häpe n'ohanyaj

¹ Häp tähesna David lhäs Salomón lhämtes, häp lham tä häpe Israel laka rey.

² Iwoye lhämtesna yämthilek letäfwelej m'ak tä häpe n'ohanyaj lhäy'e n'ochufwenyaj, wet äp lehanej n'olhämtes tä yäme m'ak tä wuj tä laha ihi,

³ yämthilek i'amej n'ochufwenyaj tä aisej, wet lewoye t'at m'ak tä t'uhawetej wet is alhoho.

⁴ Häp n'olhämtesna ihanej iwoyneje chik ichufwenhen wichi, yämthilek hin'olwethä häp lhamel tä nihn'olawethä, wet mamses yen tichunhayaja yämthilek lehanyaj ihi.

⁵ Elh tä ahantsaj tach'ahuye n'olhämtesna wet lhäy'epej lhip lehanyaj. Wet elh tä letäfwnhayaj ihi isej n'olhämtesna wet lhäy'e lhip tä ihanej iwoyneje m'ak tä iwoye,

⁶ häpkhilek ihanej m'ak tä ahantses yäme, lhäy'e m'ayhay tä itech'aynej, lhäy'e m'ayhay tä õhn'ältehen.

⁷ Oyok, humin Lhawuk wet woye lhämtes, tsi häp tä n'ohanyaj tälhe. Wichi tä kachuhantses yen w'et m'ayeka n'ochufwenyaj lhäy'e n'ohanyaj.

M'ak tä õne'tek mamses iwoye

⁸ Yäs, ch'ahuye ajcha tä aichufwen, wet yej leyej m'ak tä ako itäfwnhat amej,

⁹ tsi häpkhilek asilatyaj, hätehlat iwoye amis wok n'olhetek t'ak tä wuj tä isilataj.

¹⁰ Yäs, chik wichi tä lech'isukyajay ihi fwetaj ikan amej, yej alewahnej.

^11-12 Elat lhamel yok, “¡Nek n'okwehen! ¡Is chik y'aniwhi hin'o chik häpe wet n'alän! ¡Tej chik newache m'ak chik tamenej wet lakäjyajay ihi, mat n'alänhen t'at!

¹³ ¡Wet n'ahäpkhihena hin'ol tä wuj lakäywet tä hiw'en! ¡Lhat'etantes tapohikwela lhawukwey!

¹⁴ ¡Lhu, häte am lew'enla m'ak tä alewuk, häte iwoye olhamel, wet ihla n'amejen chinaj t'äj tä y'awatlä!”

¹⁵ ¡Yäs, yej lhekche lhamel tä lhämtes mälhyej'attso! Atontehlä lakeyis,

¹⁶ tsi lhamel nakele m'ak tä ni'isa tä iwoye, nakele yämthilek itsäy w'oyis.

¹⁷ Laha ihihit'a n'otkanyaj tä õyenlhi chik afwenchey hiw'en.

¹⁸ Mat hin'oltso yenlhit lhamhohen t'akanyaj, wet yenlhit lhamhohen lewit'äyhyaj.

¹⁹ Häp täjtso lepes häp hin'ol tä t'uhläk wuj m'ak tä hiw'en. T'akänyaj tä ni'isa ilänhen.

¿Atsi m'ak chik in'oyej chik n'am watlä n'ohanyaj?

²⁰ N'ohanyaj t'än tä tumche hupuy kawayhil, ifwitsenej lechos tä ihiche lhipey tä ischephä.

²¹ T'äne wichi tä wuj tä ilunhen, wet iwo lhämetayej lhamel tä lhaihutwek tä ihi hupuy lepelis.

²² Yok, “Amel tä kahanache m'akejen, ¿atsihila ifwalak lehan m'akejen? Amel tä alhen aläkwyhantsesa, ¿atsihila ifwalak leleyej tä lhen akäjyaja täjtso? Amel tä laj ahuseya, ¿atsihila ifwalak leleyej tä lhen w'et m'ayeka n'ohanyaj?

²³ Ch'ahuyaye ofwonyaj wet otihla amejen ohusek, wet itäfwnhatla amejen otichunhayaj.

²⁴ Ot'än amehen, mat letach'ahuhit'a n'oye. One'tek leho n'oye, mat lewohiyet'a.

²⁵ Lewohiyet'a olhämet tä one'tek lewoyaye, wet tek letach'ahuye ofwonyaj.

²⁶ Tä mälhyejtso, olhamlak ot'ischey amejen chik nichät amehen awit'äyhyaj. Olhamlak oailäkwethä chik let'ilejen anowayhyaj,

²⁷ chik näm amehen m'ak tä tanhoch'ay lhäy'e m'ayhay tä ni'isa wet ailhaklitwethä, hätehlat iwoye pelhay tä fwitsaj, iwasthiche nilhokej m'ayhay.

²⁸ “Wet chik mälhhiyejatso, lefwetajla let'än n'oye, mat tek onchulhla amho. Lefwetajla let'u n'okwe, mat tek lelhokla n'oye,

²⁹ tsi lhen w'et m'ayeka n'ohanyaj, lehuminhit'a Lhawuk wet lewohiyet'a lhämtes.

³⁰ Tek lewatlä ochufwenyaj wet lhen w'et m'ayeka ofwonyaj.

³¹ ¡Lekathiyeja laha m'ak tä ni'isa tä lewoye, hätehlat iwoyek letshatejen ämtes tä ni'isachehen!

³² Tsi tä kahanache m'akejen, lewetahen wet let'inhen, wet tä laj ahuseya, letekm'ahatwethä wet attäy t'at.

³³ Mat häp elh chik tach'ahuhila n'oye, letamsek ihihila, wet tek nowayhlahläk lewit'äyhyaj ihichela.”