Lucas 1 - Biblia Wichi

^1-4 Teófilo: Ochen ame olhämetna tä ahäpe elh tä lewujyaj ihi. Ot'uhläk wuj tä lehanej tä matche t'at häp m'ayhay p'ante in'oyejen tä pajche õ'chufwen amej. Wujpe iyhäj tä t'uhläk ikalelhätchä m'ayhaytso, wet lhamel itihi lelesaynhay häp m'ak tä wichi tä hiw'enpe ifwenho olhamel. Tsi wichina matche tä hiw'enpe nilhokej m'ayhaytso, tälhe tä iwo tesa, wet yen at silätyaja. Tä mälhyejtso, tä olham pajche lhäy'e lhip tä olhaichufwenej tähestso, ow'en tä is che olhamtej olesayen m'ak tä kalelhäj, tälhe tä ichun pajtha nichäte lepes. Wet häp täja m'ak tä ochen amena.

Ángel yäme Juan Bautista tä nech'e ihichela

⁵ Häp lewhäy p'ante hin'o tä lhey Herodes niyatej honhat tä Judea, iche p'ante sacerdote tä lhey Zacarías, lham häpe t'at sacerdotes tä Abías lhayis elh p'ante. Wet lech'efwa lhey Elisabet, tälhe Aarón lhayis p'ante.

⁶ Häp lham lhäy'e lech'efwa inukwe t'at Dios len'äyij, lhamel iwoye nilhokej Lhawuk lhämtes wet nehit katsik ihanej iwoyneje che yen tesayej m'ak at che häpe.

⁷ Mat leles ihihit'a, tsi tälhe tä Elisabet lhutsha, sufwnaj t'at, yäk wuj tä thänhäy lhamel.

⁸ Wet nichäte p'ante lewhäy tä sacerdotes tä Abías lhayis tachumhilhi Dios Lew'et tä ihi Jerusalén.

⁹ Wet lhamel lakey tä iwo sorteaya, wet yiwete Zacarías yämlek ihochufwi Lech'o Elh tä N'ot'amajchet häpkhilek iwunho incienso.

¹⁰ Wet tä iwunho, nilhokej wichi i'alhoye tä iwo let'alhyaja.

¹¹ Wet ángel tä tälhe Lhawuk lhain'ältej Zacarías, takasit tä ihi lhip tä lefwomkat häp altar tä incienso lew'et tä õ'wun.

¹² Tä Zacarías hiw'en, inuhat lhamho, wuj tä nowaye.

¹³ Mat ángel tahuyej wet yok: –Zacarías, yej noway, tsi Dios iläte t'at alhyaj tä lewoyepej, wet hach'efwa Elisabet iwohla lhäsa. Ena lheya Juan.

¹⁴ Akäjyaj tapohla amej, wet wujla'pe wichi che akäjejlhi che nech'e iche,

¹⁵ tsi Lhawuk yenhiyela hin'o tä len'ohyaj ihi. Iyähiyejt'ala vino wok hat'es che häpe, wet Espíritu tä Dios T'amajchet tapohiyeja tälhe tä ihi lako kachowej.

¹⁶ Wet inachajiyela wujpe Israel lhayis häp Lewuk Dios.

¹⁷ Wet hätehlat iwoye profeta Elías p'ante, n'okhajyhayaj p'ante iyej häpkhilek iyej, wet ichunlach'oye Lhawuk, häpkhilek inityenej wichi yämlek lha'isyene leles wet kachuhantses iwoye m'ak tä wichi tä isen iwoye. Mälhhiyejatso Juan lechumet, tä iwaklhat wichi yämlek ichumlä Lhawuk.

¹⁸ Zacarías tay'ätshane ángel wet yok: –¿Chiwoye, atsi m'ak tä tach'ot n'oye yämlek ohanej tä matche täjtso? Tsi olham och'ut, och'efwa häte hich'ut t'at.

¹⁹ Ángel nichulho wet yok: –Olham ohäpe Gabriel, otch'ote Dios lechumet. Lham t'at tä ichenn'o ame yämlek ofwel amho lesilätyaj tä isilatajna.

²⁰ Mat tä lekachu olhämet, nemla letahuy pajla'tha nichäte lewhäy che lhayäm matche tähestso.

²¹ Wet wichi tä i'alhoye tä iniwhihlä Zacarías, lhamel tay'ätshan lhamehen tä yok: –¿Atsi m'ak tä tamenej tä pajlä Zacarías che inuphä tä ichufwi Lhawuk Lew'et?

²² Tä paj wet inuphä t'at, mat nemhit tahuy, wet wichi nitäfwelej tä lew'enek ihin'e tä ichufwi Lhawuk Lew'et. Wet ichumyenlhi takweyey tä yämhoplhi lhamel, tsi nemhit lepak ihi.

²³ Wet tä nichäte ifwala tä ileyej ayej lechumet tä ihi Lhawuk Lew'et, yäple lew'et.

²⁴ Tä tajyäme ifwalastso, nech'e hich'otshan häp lech'efwa Elisabet, wet cinco meses tä ninuyaphä tä ichufwi lewukwe. Wet letichunhayaj yok,

²⁵ “Häp Lhawuk hip'altsenn'o athana, häpkhilek wichi nemhit iläkwlhin'o.”

Ángel yäme Jesús tä nech'e ihichela

²⁶ Tä tajyäme seis meses p'ante tä hich'otshan Elisabet, Dios ichene laka ángel Gabriel häp hupuy tä lhey Nazaret tä ihi honhat lhip tä Galilea,

²⁷ ne'tek ihoye atsinha lhutsha tä lhey María. Lham kamaj lhakn'ajayej hin'o che häpe, mat pajche kalelhäj tä yenla lech'efwaya hin'o tä lhey José, häp rey David p'ante leles tä lepes lhele elh.

²⁸ Wet ángeltso tiyäjchufwi hup tä María ichufwi, wet tahuyej tä yok: –¡Amtena! ¡Lhawuk i'amej! ¡Dios tatshupiyej ame lep'altsenyaj!

²⁹ Tä lhutsha iläte lhämtestso, wuj tä t'iseltej wet inuhat lhamho, wet itichunejlhi tä yok, “¿Atsi m'ak tä tamenej tä iwoynejetso lhämet tä n'okwi n'oyej?”

³⁰ Mat ángel yok: –María, yej noway, tsi i'amej Dios lakäpfwayaj tä is tä itshupyenej ame.

³¹ Ofwel amho tä lech'otshanhila wet lewohla äsa, lhenla lheya Jesús.

³² Häpkhila hin'o tä len'ohyaj ihi wet õyenla lheya Dios tä N'owujtaj Lhäs. Wet Lhawuk Dios yenla häpeya Niyat tä wuj, mälhhiyejat iwoye letes David p'ante,

³³ häpkhilek niyatej Israel lhayis yämlek tiyäj'attsiy, najit lepese Leniyatyaj.

³⁴ María tay'ätshaneje ángel wet yok: –Mat ¿chiwoye che mälhhiyejatso, tä n'am newej hin'o?

³⁵ Lham nichulho wet yok: –Häp Espíritu tä Dios T'amajchet nämla atape, wet Dios tä N'owujtaj lakhajyhayaj lepeyak takasthila atape. Häp tä tamenej tä han'äfwaj tä nech'e ihichela, lheyla N'ot'amajchet, Dios Lhäs.

³⁶ Häte aelh Elisabet hich'otshan, tej tä häpe atsinha tä hich'ut t'at wet wichi yäme tä sufwnaj, athana nech'e seis meses tä hich'otshan.

³⁷ Tsi niwohit m'ak che athaho häp Dios.

³⁸ Tä María iläte, wet yok: –Is, ohäpe t'at Lhawuk kwenek. Is che iwoyej at n'oye m'ak tä lhämetso. Häpet tä mälhyejtso, ángel yikch'oye.

María t'isiyakaye Elisabet

³⁹ Wet häp ifwalastso María nakeltshi tä ihoye hupuy tä ihi chenhas tä ihi honhat tä Judea.

⁴⁰ Tä nichäte, wet ihochufwi Zacarías lewukwe wet n'okwiyej Elisabet.

⁴¹ Tä Elisabet iläte María tä n'okwiyej, wet lhäsaj tä ihi lakachowej w'ahuye. Wet nech'e Espíritu tä Dios T'amajchet tapoyej Elisabet,

⁴² wet ifwitsenej lechos wet yok: –¡Am lenu'pe nilhokej atsinhay iyhäj tä Dios takäpfway ame, wet takäpfwaye häp äs!

⁴³ ¿Atsi tä ohäpe tä Owuk lako t'isiyakay n'oye?

⁴⁴ Tsi tä olät ame tä len'okwi n'oyej, wet olhäsaj tä in'ohi w'ahuye tä lakäjyaj ihi.

⁴⁵ ¡Lhawuk lakäpfwayaj tä is i'amej, tä lechaye tä lhayämla matche m'ayhay tä ifweln'aj amho!

María iwunit Dios

⁴⁶ Wet nech'e María yok: “Olham owujyen Lhawuk,

⁴⁷ wet ohusek akäjejlhi Ofwayhthi Dios.

⁴⁸ Tsi hip'altsenn'o tä ohäpe lakawo tä p'elitsajfwaj t'at, wet tälhe athana yämlek tiyäj'attsiy nilhokej wichi yämhipeja n'oye tä lakäpfwayaj tä is in'oyej.

⁴⁹ Tsi lakhajyhayaj ihi, wet iwoyej n'oye m'ayhay tä wus. Lham häpe t'at N'ot'amajchet,

⁵⁰ wet hip'altsen häp lhamel tä ihumin wet iwoye lhämtes yäk nichäte leles tä lepes lheley.

⁵¹ Lhaikhajyenej lakhajyhayaj tä wuj, wet itsatkatpe honhat lhamel tä lhaichäjejwethä letichunhayajay.

⁵² Isoyej leniyatyajay häp niyatey, wet hiw'enho lewujyaj häp iyhäj tä w'et m'ayhayhas t'at.

⁵³ Iteskanyenejen m'ak tä isej häp iyhäj tä nichuyuhen, wet ichen iyhäj tä hiw'en m'ayek, niwohit m'ak che hiw'enhomche lhamel.

⁵⁴ Tach'ote lakawos tä Israel lhayis, wet tek hip'ethatlä tä itiyej lep'altsenyaj,

⁵⁵ mälhyej p'antetso tä pajche ifwenho lhatetsel, Abraham lhäy'e leles tä lepes lheley yämlek tiyäj'attsiy.”

⁵⁶ María iyej ayej Elisabet pajtha tres meses, wet nech'e yäple lew'et.

Juan Bautista nech'e iche p'ante

⁵⁷ Tä nichäte p'ante lepes lewhäy tä Elisabet hich'otshan, wet iwo p'ante lhäsa.

⁵⁸ Wet iyhäj, lhäy'e iyhäj tä lew'etfwas, tä ihanej tä Lhawuk wuj tä itiyej lep'altsenyaj, lhamel ihoye yämlek iwo lakäjyaja lhamejen.

⁵⁹ Tä tajyäme p'ante ocho ifwalas, wet õ'tiyej n'otetnek tä n'olhijtsek häp han'äfwaj. Wet lhamel t'uhläk õyen lheya lajcha lhey Zacarías,

⁶⁰ mat lako Elisabet yok: –Kha, lhey Juan.

⁶¹ Lhamel nichulho wet yok: –Mat ihichet'a elh amel che lhey n'olheytso.

⁶² Wet lhamel ichumyenlhi takweyey tä tay'ätshaneje Zacarías häp lhey tä lham ihuminche yämlek itiyej.

⁶³ Wet Zacarías t'alhe hal'ä t'äj lhip, wet ilesayen tä yok, “Lhey Juan.” Wet nilhokej wichi tä iyej t'iseltejen.

⁶⁴ Häpet tä mälhyejtso, Zacarías nech'e yachajo tä tahuy, wet iwujyen Dios.

⁶⁵ Wet nilhokej wichi tä lew'etfwas lhäy'e lhip tä leselthayaj ihi, lhäy'e lenowayhyaj, wet toyehi imälhewek honhat tä chenhas tä ihi Judea m'ak tä mälhyejtso.

⁶⁶ Wet nilhokej lhamel tä ihanch'oye wuj tä yen tichunhayaja wet yok: –¿Atsihila tä häpe han'äfwajtso? Tsi n'äl tä Lhawuk matche tä iyej häp lham.

Zacarías iwunit Dios

⁶⁷ Wet han'äfwaj lajcha Zacarías nech'e Espíritu tä Dios T'amajchet tapoyej, wet yämyenlhi tä yok:

⁶⁸ “¡Lewujyaj ihi Lhawuk, Israel laka Dios, tsi näme laka wichi yämthilek ifwayhat!

⁶⁹ Ichen n'amehen N'ofwayhthi tä takhajay, tä häpe lakawo David p'ante leles tä lepes lhele elh.

⁷⁰ Häp täja m'ak tä pajche p'ante ifwel, tä laka profetas tä t'amajchetes yen lhämeta,

⁷¹ tä lham ifwayhthila n'amejen lhatayhfwas lhäy'e nilhokej wichi tä n'äyi n'amhomche.

⁷² Tä nip'ethatahlä lhämet tä t'amajchet tä iwoyeje lhatetsel p'ante, wet häp tä hip'altsenhen lhamel.

⁷³ Wet häpe t'at täja lhämet p'ante hit'unhatche tä ifwenho häp lhajcha Abraham,

⁷⁴ tä ifwayhthilat n'amejen lhatayhfwas, häpkhilek y'atch'ote lham, wet newache lhanowayhyaj,

⁷⁵ wet n'alhayen t'amajchetesa wet y'äm is alhoho m'ak tä y'awoye tä y'ehi tä lham tatache, nilhokej ifwalas tä y'e honhatena.

⁷⁶ Wet am, yäsaj, eyla Dios tä N'owujtaj laka profeta, tsi lechunlach'oye häp Lhawuk yämthilek lewaklhatchehen len'äyhäy,

⁷⁷ wet lefwenho laka wichi tä Dios itäyhthen lesukyajay wet hiw'enhomche lefwayhyaj.

⁷⁸ Tsi häp lhaka Dios wuj tä lep'altsenyaj ihi, wet ifwala tä nech'ayek hin'älthila lhatapehen

⁷⁹ häpkhilek ihutunpe lhamel tä ilech'oye honataj tä häpe n'ot'ilek lehupel, yämthilek ipäyenche lhapach'ol häp n'äyij tä itaye lhatamsek.”

⁸⁰ Wet tä lhaichihelit han'äfwaj, takhajay lehusek. Wet yen lew'eta honhat tä ts'anis, pajtha nichäte ifwala tä lhaitäfwnhatej Israel lhayis.