KEFDER MAGA POL ƁOʼ NE TID MONO 3 - Tupuri Bible

Seele jar ma wer Kris wo

¹ Fer ɓoɗ sug jar ɓuy ga á mo yãɗ wo jag jar wãã re sirn wo de jar ma de egren wo, á mo yãɗ wo jage, mo hay wo go de gragge ma joŋ joŋre ma de eln wo ɓuy.

² Á mo wãɗ wo ɓlagge ti jar wa, á mo hay wo jam de jare, mo hay wo de tayge de jar de ele, mo hay wo desãy see jar tum ɓuy.

³ Werga naa hay le ɓaa bay ko re, naa hay bay yãɗ jag wa, naa hay go de yeɗge. Naa hay gebeere dage wo de ɗiggi wer fẽẽre ma honla wo ɓuy. Naa hay diŋ jar hãyhãy ma lig koŋne fẽẽre wo, naa hay joŋ meyeɗe ne jare, day naa hay car hee de kããra ti holaŋ naa lay.

⁴ Ama, de maga Baa je ma yãã naan raw naa nen ɓil de el ɓen wo de dage ɓen go see jar mokay,

⁵ se raw yãã naa go, bay wer joŋre ma de el po ga naa joŋn wa, ama diŋ werga á ko decoo naa. Á yãã naa go diŋ de yogge maga Nenterse ma bay ɗag fer biŋ naa defay, fer kol naa tigriŋ defay mono.

⁶ Baa hã Nenterse ɓen go ne naa debaŋ debaŋ wer Yeso Kris Je yãã naa no,

⁷ maga naa mo kol de deele pel Baa wer ɓil de el ɓe no, maga naa mo kol ge go tenen tiʼ tum, kolge tenen se ga ɓil naa de kaŋge ɗiggi ti ɓe gorge mono.

⁸ Mokay diŋ cwãy wããren so, day ndi da ga ndo mo oo ti wããre sen mokay ngiŋ debaŋ, nen maga jar maga hã wo ɓil ɓaara ne Baa mo had wo see ɓaara ma joŋ joŋre ma de eln de pel de pel ciŋ daŋge. Mokay diŋ fen maga see jar téebeere de woore lay, day maŋ mopo ne hara lay mo so no.

⁹ Ama faare ma de loɗgen wo, de keege mooreben le hãã hãã no, leɗge kããran wo de durgi ti wããre jag liŋgi no, sen mo deŋ ɓuy, men sen wo go werga sen bay wo de el wa lay, maŋ wo mopo ne jobo gà lay.

¹⁰ Je maga kiɗ car ɓil jar mo caw no, dog riŋgi ɓe go ɓaale ɓoge, blam sen ni ndo ɗee see ɓo go see ɓe, men go,

¹¹ de kaŋ ɗiggi ɓo ga je ma doosen mo caw go de mbuɗ faale ne faage ma de deele no, ga á diŋ je joŋ ɓlagge day ɓoʼ re ne see ɓe ti diŋ se de see ɓe.

Bagge wããre ma blam taw no

¹² De maga ndi ɓoʼ ge Artemas layblaʼ noga Ticig ge wo see ɓo no, ni ndo a le deparday yiŋgi de ɓi Nikopolis, werga ndi taw ge ngel yaale go ni.

¹³ Oo ti fen ma kay Senas je had jag liŋgin wo de Apolos ti raŋge ɓaara no, nen maga mopo mo pẽẽ ra wa hase.

¹⁴ Nen daga jar naan mo had wo ma joŋ joŋre ma de eln de pel de pel ciŋ daŋge nen maga á mo kay wo joŋre maga ndar wo doo mo lay no, day mo hay wo de lagge de koɗ gà lag bay leɗ mbèere wa.

¹⁵ Jar maga wo ɓiŋ ɓi lam ɓuy her wo jag wo mo. Her jag ne jar dage naa ma de hã ɓiln wo no. Daga Baa mo woo we ɓuy.