KEFDER MAGA POL ƁOʼ NE TID MONO 2 - Tupuri Bible

Hadge ma ti ngel ɓe no

¹ Ma ɓo mono, wãã ne jar diŋ fen maga de tayge de hadge ma de deelen mono.

² Riŋ jar ma de tããreben wo ga á mo hay wo de ko ɗaw see ɓaara, mo joŋ see ɓaara maga à mo horge sug ti ɓaara, mo hay wo de kore, mo hay wo bay ɗag ti hãge ɓil ɓaara no, ti dage jarn wo de ɗawge see ɓaara no.

³ Riŋ naare ma de tããreben wo ga seele ɓaara go nen faale la mo hay diŋ seele jar maga wo de koɗ see ɓaara de el nono. Á mo joŋ wo nen lag jar ne kããra ti wa, á mo hay wo gebeere yii wa. Á mo hay wo bag yaŋ ne jar de el de ele,

⁴ nen maga á mo had wo naare ma kleeren wo ga á mo da wo werpiiri ɓaara wo de weere ɓaara wo,

⁵ á mo ɗig wo de el ti ngel ɓe bay dage, mo hay wo joŋ joŋre ɓaara naaren de ele, mo hay wo horge sug ti werpiiri ɓaara wo, nen maga jobo mo ɗar wããre Baa wa.

⁶ Wii weere ma jõõren wo lay ga á mo hay wo de ko re ti fẽẽren wo buy.

⁷ Ndo de see ɓo, joŋ see ɓo de el ti fẽẽren ɓuy, maga jar mo ko see ɓo. Had hadge ɓon de el ti cwãy ɓe ti ngel ɓe.

⁸ Wãã diŋ wããre ma de deele maga jobo kãã ma giŋgi ɓe gà mono, nen maga sõõre mo joŋ je hee no, day á mo daʼ ngel ɗar naa wa hase.

⁹ Wii gebeeren wo ga á mo yãɗ wo jag waŋre ɓaaran wo ti fẽẽren ɓuy, á mo hay wo nen ɓaara de el ti fẽẽren ɓuy, day mo faɗ wo jag ɓaara wa.

¹⁰ Á mo horge wo fẽẽre ɓaara freŋ wa, ama, de el ɓen á mo hay wo tum de deele bay ndar goge, ma togoɗ hadge mani Baa Je yãã naa go no.

¹¹ Baa hay naa nen ɓil de el ɓe maga yãã jar téebeeren wo go we go.

¹² Ɓil de el ɓen had naa ga naa mo men seele ma de ɓlaggen wo go de dage fẽẽre ma ti tamsir la no, naa mo lag ti tamsir la de ɗiggi ma de el de deele yãɗ jag Baa ti ngel ɓe keɗede.

¹³ Á had naa ga naa mo lag gor wur ma de woore debaŋ maga ɗiggi naa de kaŋge ti ɓe mono, wur maga Je yãã naa Yeso Kris, Baa naa ma kluun naa ge nen le wur sen de togoɗge mono.

¹⁴ Á hay hã see ɓe go ti bol naa, ma yãã naa go jag ɓlaggen wo ɓuy, ma kol naa go diŋ jar ɓe, diŋ jar ma de fãɗge go, maga naa mo hay de baa wùu ma joŋ joŋre ma de eln wo ɓuy.

¹⁵ Mokay diŋ fen maga ndo nen wããge ne jar mo so no, coɓ nen jare, ruu ra go de egre ɓo ɓuy. Daga jobo yoo ɓaara mo mbuɗ sõõre ɓo wa.