SOFONI 2 - Tupuri Bible

Fer we ti see ɓay gesiŋ

¹ Tay we see ɓay ni nday ɗig we ɗa, Nday wer jar se maga sõõre ɓay go de húulí mono.

² Sen nà taŋgu maga reen leʼe, Day wur sen raw go deparday doo leege no mono. Go taŋgu maga baage põõ ma de baa wùu ngil mani Manwurn a ti ɓay, Go taŋgu maga wur sõõge ɓil mani Manwurn a we ti mono.

³ Kiɗ we Manwuri, Nday ɓuy maga nday fer ti ɓay gesiŋ ti tamsir lam no! Nday maga nday joŋ diŋ mo ma ti faage ɓen mono! Kiɗ we diŋ keɗed no, kiɗ we diŋ ferge ti gesiŋ no! Tiga nday daŋ yaŋ bà go ti wur baage põõ mani Manwurn layblaʼ no.

Re ti jar sir Filistẽẽ wo

⁴ À tob ge Gasa yaŋ go. À men ge Askaloŋ yaŋ go nen lawge. À nii gi Asdod wo yaŋ go de ceg kãge. À naa ge kããge Ekron yaŋ go ciŋ.

⁵ Re ti ɓay jar ma ti sir ma jag maarog no, Nday wer jar Keretiyẽẽ no. Wããre mani Manwurn wo de yam ndo, Kanaan sir jar Filistẽẽn wo. Ndi ɓlag ge ndo ge go, jobo joŋ ge ɓil ɓo gà so hase.

⁶ Jag maarogn kol ge yaŋ go diŋ ngel rege horog wo, Go diŋ ngel hõõ jar koɗ horog wo, ngel cor kaw horog wo.

⁷ Jag maarog sen joŋ ge yaŋ go diŋ ma jar Maga gwaʼge wo ti tiŋ mani Judan mono. Á koɗ ge wo horog ɓaaran wo ge nà ni. Ngel iggi ɓaara ma de lawn joŋ ge nà ɓil tiŋ ma Askaloŋn wo. Werga, Manwuri, Baa ɓaaran caa ge war ɓaara yaŋ, Day fer ge jar maga à hoo ra wo go daŋgay wo yaŋ le liŋ.

Re ti sir Mohab wo de Amoŋ

⁸ Ndi yaŋ mbi de laa ɗarge ma jag jar sir Mohabn wo, De mbuɗgi fuy maga jar Amoŋ mbuɗ wo fuy jar ɓin wo, Day gẽẽ wo sir ɓaaran go ciŋ de sir jar ɓin wo mono.

⁹ Ndi Baa ndi yaŋ tenene! Lag we mbay ngiŋ! Kay diŋ jag Manwur Pantway, Baa ma Israyel no. Doo kay nono, Mohab joŋ ge yaŋ go doo Sodom nono, Jar Amoŋ joŋ ge wo go doo Gomor nono. Á joŋ ge wo go diŋ ngel tĩɗ fíi ma bay blam wo, Go diŋ laale law, go diŋ ngel coocoo ma tum. Jar ɓi maga gwaʼ ge wo, frum gi wo ra go. Jar maga hwel ge wo ti wer jar mani ɓin koln ge wo yaŋ go tway ɓaara.

¹⁰ Sen a ge ne hara ti nà wer farge ti ciŋ ɓaara no, Wer maga a feg wo ti jar mani Manwur Pantwayn wo, Day hoo wo de ɓaara mono.

¹¹ Manwur maŋ ge re yaŋ nen ɓaara, Werga a caa ge wer baa ma ti tamsirn wo go. Kaali mani wer jar wo ɓuy leɗ ge wo monɗra yaŋ pel ɓe, Wosela ɓuy mbe le ti ngel ɓen yeʼ yeʼ tuu tuu.

Re ti sir Etiyopi wo de Asiri

¹² Nday jar sir Etiyopi no, Moslam ɓin kaf ge nen ɓay yaŋ go lay.

¹³ Manwur maŋ ge doo ɓe yaŋ ciŋ see jar ma ɓaŋ gloŋhweden wo. Á taw ge sir Asiri go day kol ge Ninif yaŋ go nen lawge, Go diŋ sir ma ti koɗ doo puuli nono.

¹⁴ Á koln ge yaŋ go diŋ kaw horogre wo de wer nàyre ma hon la wo ɓuy. Tukturu wo de gecemcem draʼ nà ge wo yaŋ go ciŋ Ti cõõ koore ɓaara ma de wooren maga gwaʼ ge wo go tabul mono. Fẽẽre suŋ rag ge wo yaŋ jag fenedern wo. À kal ge wo jag tiŋ no kay à ko ge mbe fẽẽren go de ɓlagge deŋ tuu, werga à ndar ge gefay koore sedern wo go.

¹⁵ Ko we mbay ɓi leege ma de hragge ɓiln ga go de hayle de yõõ ti, Day wãã le jiili ɓe ga : Ndi, diŋ ndi mbi boŋ tuu mo ɗala! Joŋge joŋge ga a kol go diŋ lawge, Kol go diŋ ngel iggi nàyre wo mo la! Jar maga hee wo ti jeŋ ɓe mo ɓuy ʼwad wo flew day waɗ wo doo.