OSE 2 - Tupuri Bible

Wur naw ma kluu ma Jisreyel no

¹ Ama ti wurpo ngaɓa jar Israyel joŋ ge wo yaŋ doo deguɗgi ma jag maarog nono. Maga à kãã ma ngaɓge ɓe gà kãã ma keege ɓe gà. Ti ngel maga à hay wããge ne hara ni gano : Nday bay diŋ jar ɓi wa mono, À wãã ge yaŋ ne hara ni ga : Jar ni Baa ma tenen wo no!

² Jar ma ɓaŋ Juda wo de jar ma ɓaŋ Israyel joŋ ge wo yaŋ go de tayge. Á baa ge wo waŋ ɓaara yaŋ go boŋ tuu, Day laa ge wo yaŋ go ɓi sir no, Werga síilí ma Israyeln joŋ ge yaŋ kluu.

³ Wii weregeman ɓayn wo no : Ammi! Wo de mayregeman ɓayn wo no : Ruhama!

Ga Israyel diŋ wãy ma ndar goge

⁴ Ngar we jag ne man ɓay ti ga, á joŋ ni gà Werga á bay diŋ wãy ɓi wa Day ndi de see ɓi ndi bay diŋ war ɓe wa lay! Daga á mo ndar fẽẽre figliw ma nen ɓen wo go, Day mo ndar fẽẽre figliw ma jiili ɓen wo go!

⁵ Hayga bay we wa no, ndi naa ge õõbe ma ti ɓen go fẽd ɓuy, Ndi menn ge go doo maga se biŋ le go nono, Ndi koln ge go de maŋ puuli

⁶ Ndi koln ge go doo sir maga bay joŋ mopo wa nono, Ndi laɓn ge go de jwaale, Day ndi ko ge decoo ti jar ni ɓe wo gà Werga á wo diŋ weere maga biŋ wo ɓil figliw

⁷ Man ɓaara hay joŋ figliw Wãy maga hay soɗ ra mono go de mbuɗ sõõre see ɓe De maga á hay wãã ga : Ndi maŋ ge mbi blam ndeere ɓin wo Maga hã wo hoole ɓin wo me de bii ɓin mono, Maga hã wo õõbe fũy fǐiri ɓin wo me de õõbe lẽẽ ɓin mono, Noo ɓin wo de yii ɓin wo no.

⁸ Ko ɗa, diŋ wersen so ga, Ndi tẽg faage ɓon go de Kesme. Ndi maʼ làɓ go ne hẽn pele. Á daʼ ge faage ɓen wo gà so.

⁹ Á baa ge blam ndeere ɓen wo yaŋ, Á day ge go see ɓaara gà Á kiɗ gi ra yaŋ, day daʼ ge ra gà. Blam ɓe á wãã ge yaŋ ga : De ele! Ndi fer see war ɓi ma taŋgu no, Werga ti wur sen ndi hay de daʼ see ɓi dedaŋ ma patalan lam no.

¹⁰ Á hay bay de koge gano : Hay hã coore ble de yii ma de defay, De noo wo ne se la diŋ ndi wa. Ndi hay koln go de horoge, koln de boo Solay wo de boo biŋni. Day se yaʼ go kol rage fẽẽre hãge ne Baale.

¹¹ Diŋ wersen ga ndi fer ge yaŋ Hoo coore ble ɓin ti wur ɓe, Day, yii ɓi ma defayn ti naw ɓe, Ndi fer ge yaŋ go de õõbe fũy fǐi ɓin wo de õõbe lẽẽ ɓi no. Maga de hay yoŋ glog koɗ ɓen mono.

¹² Day patalam so no, ndi menn ge yaŋ go glog Koɗ nen ndeere ɓen wo no. Day jobo yããn ge go doo ɓi gà

¹³ Ndi taw ge fruygi ɓen yaŋ go ɓuy Few ɓen wo no, few ɓe ma defay wo no, Saba ɓen wo no, de few ɓe ma kluurin wo ɓuy.

¹⁴ Ndi ɓlag ge tlalum ɓen wo go de figiye ɓen wo, Maga á hay wããge ti ɓaara ga : Diŋ poɗge maga ndeere ɓin hãn wo me mono! Ndi fer ge ra go doo yoo koo nono, Day này ma mbásga re ge wo ra go,

¹⁵ Ndi joŋ ge nen yiŋgi ɓe maga á mo Poɗ go ti wur maga á hay hãn go ma Roɗ fen fõõre aŋsaŋs ne Baal wo de baa ma de maŋ sen wo mono Ti ngel maga á hay her kelelew ɓen wo de redew ɓen wo mono. Á hay seege diŋ wer ndeere ɓen wo, Day ma ɓin, se yõõ ti go ti ɓi Kay diŋ jag Manwuri.

¹⁶ Diŋ wersen ga ndi jãɗn doo kay no mono, Ma ɓin, ndi raw ge de ɓe ti puuli Day ndi ndaln ge yaŋ de wããre ma leʼge ne hẽn jiili.

¹⁷ Le ni mono, ndi hã ge tlalum ɓen wo yaŋ ne hẽne De log ma Akor no Doo jag tiŋ maga à de kaŋ ɗiggi ti ɓe nono Ti wur maga se hay tigli ɗa nono. Day de ngaɓge doo ga ti wur maga se hay Kal le go ɓi sir Ejipte no mono.

Wur naw ma joŋ tayge jag no

¹⁸ Ti wursen mono, Kay diŋ jag Manwuri Ndo ɗe ge ndi yaŋ ga : War ɓi! Day ndo ɗe ge ndi ga : Baal ɓin gà so hase!

¹⁹ Ndi naa ge ɗúu Baal wo yaŋ go ne hẽn jage À ɗig gi ti ge bà ti ɗúu ɓaaran draʼ gà so ɓuy yaw.

²⁰ Ti wursen mono, ndi joŋ ge tayge jag yaŋ ma ɓaara De horog ma mbásga wo De weere dweere ma ciŋ wo De fẽẽre ma seɗge de ɓil ti sir wo Ndi harag ge mantoŋwaa yaŋ wo go ɓi sir no, De jaw, de durgi wo, Day ndi joŋ ge yaŋ ga á mo suɗ wo go de yõõ ti

²¹ Ndi joŋ ge nday yaŋ de ɓo ma tum. Ndi joŋ ge nday yaŋ de ɓo ti keɗed ɓe wo de deele ɓe, Ti jag liŋgi ɓe wo de koge decoo ɓe

²² Ndi joŋ ge nday yaŋ de ɓo bay ndar gogge Day ndo ko ge Manwur yaŋ.

²³ Ti wursen mono, ndi yiŋ jag yaŋ ne ndo Kay diŋ jag Manwuri

²⁴ Ndi yiŋ jag yaŋ ne ngel ma ciŋ yaŋ Day á yiŋ jag yaŋ ne tamsir lay Tamsir yiŋ jag yaŋ ne coore ble lay Yiŋ gi jag yaŋ ne yii ma defay wo de noo Day á yiŋ gi jag yaŋ ne Jisreyele.

²⁵ Ndi dus gi mbèere fẽẽre wo yaŋ ɓi sir no Day ndi ko ge decoo yaŋ ti Lo-Ruhama Ndi wii gi Lo-Ammi yaŋ ga : Jar ɓin wo diŋ ndo Day á wãã ge yaŋ ga : Baa ɓi no!