MARK 16 - Tupuri Bible

Yeso fer go kal ge ciŋ tenen

¹ De ngar ngel maga wur de leʼ ge go gesiŋ ga wur Saban taw go de sen mono, Mari ma Magdala wo de Mari man Jag, wo de gee Salome raw wo yee trusa ma woge kagge ne húulí Yeso ti.

² De jag toŋ crum wur dimasi, de maga wur le de kalge mono, á raw wo rawge ti tipaale no.

³ Á riŋ wo kããra ga : Wose lagad ge húulì ma jag tuun go ne naa wara so la?

⁴ Á wo wo ko nen ɓaara wo mokay, nen ɓaara raw ko húulì ma kluu maga hay jag tuun go de lagadge ti jeŋ tiʼ i.

⁵ Á raw wo laage ɓi tuu no, raw wo ko wejõõ po de hayle ti ɓaŋ war yeʼ de õõbe ti depuy, hẽẽne raw joŋ rage debaŋ.

⁶ Á raw riŋ rage ga : Joŋ we hẽẽne wa. Ndi de koge ga nday kiɗ Yeso ma Nasared, je maga à hay ɓaln go ciŋ ti koo mono, á fer we go birgi, á bay la wa so. Ko we nen ɓay, ngel maga à hay ɓoʼn la ni mo taʼ no.

⁷ Patala see we siigi ɓe ne jar ma wer ɓen wo, siin we go ne Piyer pah ga á raw wo wo pel ɓay Galile, nday wo yaŋ ko nen ɓe go ni, doo ga á hay riŋ we nono.

⁸ Á raw wo laage go, kal wo daŋ ge de ɗeere, men wo tipaalen go, werga see ɓaara daɗ ra doo hẽẽne debaŋ, laa wo wãã wããre ne jobo gà has werga hẽẽne joŋ ra debaŋe. [

Yeso naa nen see ɓe ne Mari ma Magdala

⁹ De jag toŋ crum, wur dimasi, blam maga Yeso fer go birgi mono, á raw naa nen see ɓe taŋgu diŋ ne Mari ma Magdala, diŋ wãy se maga Yeso hay nii sõõre wo go ne hẽn ti renam mono.

¹⁰ Á kal rawge siigi ɓe ne kããre Yeso maga hay wo seege wer ɓe mono. Á wo daʼ rage go de hrag see ti roo lagge.

¹¹ Á wo wo laa wããre maga wãyn wãã ga Yeso bir we go, se kon we mokay, á laa wo yãã wããre ɓen gà.

Yeso naa nen see ɓe ne jar ma wer ɓe wo ɓoge

¹² Blam sen jar po wo yoo jar ma wer ɓen wo ɓog raw wo raŋge, Yeso raw naa nen see ɓe ne hara nen sara pa.

¹³ Á raw wo le ferge siigi ɓe ne jar lan wo, á laa wo yãã wããre sen gà ɓuy pa.

Yeso naa nen see ɓe ne jar ma wer ɓe ma hwal ti boŋn wo

¹⁴ Blam sen ɓuy, Yeso fer naa nen see ɓe ne jar ma wer ɓe ma hwal ti boŋ wo de maga á lag wo rege mono. Yeso raw ruu rage ti debay hãge see ɓaara ne hẽn no, de higgi jiili ɓaara maga á hig wo go debaŋ ga laa wo yãã wããre jar maga kon wo go de birgi tenen, saara laa yãã ge ɓe gà mono.

¹⁵ Á raw riŋ rage ga : See we raŋ jar ma ti tamsir wo go krub ɓuy, siɗ we Wããre ma de Cõõren go ne wer jar wo ɓuy.

¹⁶ Je maga yãã wããre sen we, day à joŋ batem ɓe we go no, je sen daʼ ge pẽẽge yaŋ. Ama je maga yãã wããre ɓin we gà no, á daʼ ge bone.

¹⁷ Coʼ we sug wããre fẽẽre mbuɗgi maga jar ma de yãã wããre ɓin joŋ ge wo ra mokay no. Á niɗ gi wo sõõre wo go de ɗe ge ɗúu ɓi, á wãɗ ge wo jag ma defay yaŋ,

¹⁸ á horge wo cwe yaŋ de doo ɓaara, á mo jo bà wo guur-koo ma id see, sen ɓuy kãã ma joŋ rage de mopo gà hase. Á kaŋ ge wo doo ne jar cegè wo ti, jar sen pẽɗ ge wo go lay.

Yeso fer ciŋ se Baa

¹⁹ Blam maga Yeso Waŋkluu wo fer wããre sen go ne hara fer fer mono, á raw urgi wo go ciŋ, wo hayge ti ɓaŋ war Baa.

²⁰ Jar ma wer ɓen raw wo rawge siɗ Wããre ma de Cõõren go ti ngel ɓuy. Yeso Waŋkluu kay ra joŋ joŋre se no, kaŋ nen jar go ga siigi wããre ɓaaran ti cwãy ɓe, wer fẽẽre mbuɗgi maga de joŋge wer wããre ɓaaran wo mono.]