WÃÃRE MA DE CÕÕRE MAGA LUG YER NE MONO 2 - Tupuri Bible

Biŋgi Yeso

¹ Le de ngar ngel maga à biŋ Jaŋ mokay, Sesar Oguste waŋ Rom ma kluu raw hã wããre le ga kee jar ma ɓi sir maga Rom de wãã re ɓe mo ɓuy no.

² Kee ge sen diŋ kee ge ma taŋgu no, ti kal sen Kriniyus diŋ waŋ sir ma Siri no.

³ Jar ɓuy raw wo raw ge yer ɗúu ɓaara, wosela ɓi leege ɓe ɓi leege ɓe.

⁴ Josef raw urgi le ɓi leege Nasared ma ti prog Galile, kal rawge ɓi sir Jude ɓi leege maga Dafid waŋ biŋ ni, à ɗen ga Betlehem, werga á ti ɓĩĩni mani Dafidn no.

⁵ Á raw wo yer ɗúu ɓaara de Mari maga á hay yãã ne go, á go de deʼ ge nen biŋgi.

⁶ Á wo le ni lag ɗa mokay, wur biŋ gi ɓe raw age.

⁷ Á raw biŋ jag mbarga ɓen go mokay, á raw kuu gi ɓe de õõben raw ɓoʼ ge ɓe ti ngel lag hoo ne horog wo, werga á daʼ wo ngel suuli ɓi tiŋ waaren ni gà.

Je peele Baa á se jar koɗ horog wo

⁸ Jar koɗ horog yaŋ wo ɓi sir sen de lagge ti puuli koɗ horog ɓaaran wo de suŋ.

⁹ Je peele Waŋkluu raw naa nen see ɓe ne hara, woore Baa Waŋkluu raw ler ngel go ne hara ti, á raw wo joŋ hẽẽne debaŋ.

¹⁰ Je peele Waŋkluu raw riŋ rage ga : Joŋ we hẽẽne wa, coʼ we sug ɓay, ndi á de Wããre ma de Cõõre ne nday, maga joŋ ge ɓil yaŋ go ne jar feh ɓuy debaŋ.

¹¹ Je yãã jar go biŋ we ne naa wara ɓi leege mani Dafidn la, á diŋ Kris, á diŋ Waŋkluu.

¹² Coʼ we sug ɓay, nday wo yaŋ daʼ wel fur de kuu gi de õõbe de ɓoʼ ge ti ngel lag hoo ne horog wo tiʼ i.

¹³ Ni tuuseŋ jar peele Baa raw wo age le ciŋ se lan ni ngaɓa debaŋ pa, á raw wo ʼwaa siŋ togoɗ Baa ga :

¹⁴ Naa togoɗ Baa ma ciŋ no, Á hã jam we ne jar maga á da rage gesiŋ la mono.

Jar koɗ horogn raw wo Betlehem

¹⁵ Jar peele Baa raw wo men rage, raw wo ferge ciŋ, jar koɗ horogn raw wo riŋ kããra ga : naa see we Betlehem, da ga naa mo wo ko fen maga joŋ wo ni, ga Baa Waŋkluu riŋ naa wo ti ɓe mono.

¹⁶ Á raw wo raw ge deparday, wo wo daʼ Mari wo de Josef wo de mbargan de ɓoʼ ge ti ngel lag hoo ne horog wo tiʼ i.

¹⁷ Á wo wo ko ge ɓe mokay, á raw wo riŋ jar de wããre maga je peele Baa hay riŋ ra de ɓe ti weln mono.

¹⁸ Jar maga laa wo wããre sen mo ɓuy, raw wo ngrisgi wer wããre maga jar koɗ horogn riŋ ra wo de ɓe mono.

¹⁹ Ama ma Mari raw ɗaw wããre sen ɓuy ti ɓe, ɗig wer wããre sen jiili ɓe tum lay.

²⁰ Blam sen jar koɗ horogn raw mbaara ferge so, raw wo ʼwaa siŋ togoɗ Baa go ɓil feh wer wããre maga á laa ne wo, á kon wo mo ɓuy lay, wããre sen doo maga je peele Baa hay riŋ ra nono.

Á kaŋ ɗúu Yeso

²¹ Wo day ge ti wur síilí ma de nenmaʼn mokay, á raw wo raw ge caa ɓĩĩni wel no, raw wo kaŋ ɗúu ne hẽn ga Yeso, diŋ ɗúu maga je peele Baa hay kaŋ de maga ni man ɓe hay bay maŋ ɓiili ɓe ɗa mono.

Á wo de Yeso ɓi tiŋ Baa

²² Naw maga Josef wo de Mari fãã wo see ɓaara go wer jag liŋgi wo go baa jag mokay, á raw wo raw ge de Yeso Jerusalem ɓi tiŋ Baa kaŋ nen Baa Waŋkluu ti ɓe.

²³ Werga á go de yerge ɓil kefder Baa ga : Wosela maga biŋ wetwar we taŋgu, á mo hã sen go ne Baa Waŋkluu.

²⁴ Á raw wo hã fẽẽre siɗ jag ne Baa doo ga wããre Baa wãã nono, Kurgudu ɓog noga weere kurgudu ma liŋ ɓoge.

²⁵ Bloo po yaŋ Jerusalem ni ɗúu ɓe ga Simeyoŋ, je sen see wer wããre Baa de deele, hoo sug ti Baa debaŋ lay. Nenterse ma bay ɗag de ɗaw ge ɓe doo ɓe, se le ɓaa tum gor naw a ge je maga Baa ɓoʼn ge le yãã jar Israyeln wo go mono.

²⁶ Nenterse ma bay ɗag hay riŋ Simeyoŋ go taŋgu ga á huu go bay ko Mesi maga Baa Waŋkluu ɓoʼn ge le mo ga hase.

²⁷ Nenterse raw nduugi de Simeyoŋ ɓi tiŋ Baa. De ngar ngel maga pan Yeso wo de man ɓe wo wo a ge de wel ɓaara ma kleen joŋ ge doo maga wããre Baa wii no mo lay,

²⁸ Simeyoŋ raw maŋ weln doo ɓe, raw joŋ suseʼ ne Baa, kal ga :

²⁹ Waŋ ɓi no, wããre ɓo maga ndo hay wãã me leʼ jag we go patala so. Men wejõõ ɓon mbo huu gi jam so.

³⁰ Werga ndi ko je yãã jar go ɓo maga ndo ɓoʼn le we de nen ɓi so,

³¹ je maga ndo maŋ ne go ma yãã jar ɓuy mono.

³² Á diŋ je maga á ler ngel go ga wer jar ɓuy mo ko wo ndo. Á diŋ je maga grag ge weere Israyel jar ɓon wo de woore debaŋ mo so no.

Simeyoŋ sii wããre

³³ Pan ɓe wo de man ɓe raw wo ngrisgi ti maga Simeyoŋ riŋ ti weln doo sen mono.

³⁴ Simeyoŋ raw kaŋ bosaʼ ne hara ti, raw riŋ Mari man weln ga : Ko nen ɓo, Baa maŋ weln mokay ma bas jar po wo go debaŋ, ma yãã jar Israyel po wo go debaŋ lay. Á diŋ je maga jar ko joŋre Baa see ɓe, day jar raw yaŋ giŋgi ɓe de faare.

³⁵ Á ndar nen ɗig gi maga jar yoŋ wo jiili ɓaara yaŋ go tinoo poɗage. Ma ɓon mo lay no, jiili ɓo cee mo yaŋ ti re maga daʼ ge ndo mono, doo ga á ɓeʼ mo de moslam nono.

Ane wãy ma ndar nen wããre Baa go

³⁶ Wãy ma ndar nen wããre Baa go yaŋ ni ɗúu ɓe ga Ane, may ma Fanweel, ti ɓĩĩni mani Aser. Á go de tããbe debaŋ. Á joŋ kiŋgi wer war ɓe renam.

³⁷ Blam sen á raw gwaʼ ge go dwuri, ti wur sen kiŋgi ɓe go de baa jag doo nenmaʼ ti naa, á bay men tiŋ Baa go wa, wo mbe tum tum goŋ Baa de suŋ de cege lay, hẽɗ bii lay tos lay.

³⁸ Á raw age le de ngar ngel sen ni lay, raw joŋ suseʼ ne Baa, raw sii wããre weln ne jar maga wo de gor ge ga Baa á yaŋ yãã jar Jerusalem wo go mo lay.

Yeso fer wo le Nasared

³⁹ Pan Yeso wo de man ɓe wo wo taw joŋre fẽẽre ma ti jag liŋgin go mokay raw wo ferge le de ɓe Galile ɓi leege ɓaara Nasarede.

⁴⁰ Weln raw gẽẽ ge go, kol de egre, joŋ de ko re debaŋ lay, Baa raw wooge ɓe.

Kiŋgi Yeso hwal ti ɓog ga á kal woge ɓi tiŋ Baa

⁴¹ Pan Yeso wo de man ɓe wo wo Jerusalem ti few Pag ti kiŋgi tum.

⁴² Kiŋgi Yeso wo joŋ ge go hwal ti ɓog mokay, á raw wo raw ge ti few Pag doo ga á wo wo tum no pa.

⁴³ Few sen wo go taw ge mokay, á raw wo ferge le. Yeso raw gwaʼ ge le go Jerusalem, pan ɓe wo de man ɓe kon wo gà.

⁴⁴ Á hay wo ɓaaran ga á yaŋ bà yoo jar maga saara sii le seege wer kããra mo ɓuy no. Á raw wo kiɗ gi ɓe yoo kããre ɓaaran wo de kawre ɓaaran wo.

⁴⁵ Ama á laa wo daʼ ge ɓe ga : á raw wo ferge le kiɗ gi ɓe Jerusalem.

⁴⁶ Á sii wo kiɗ gi ɓe swaʼ blam sen á raw wo daʼ ge ɓe ɓi tiŋ Baa de hayle yoo jar ma de ko wer wããre bag ge keɗeg keɗeg wo yeʼ coʼ sug wããre ɓaara, wiɗ jag ɓaara lay.

⁴⁷ Jar maga wo de laa wããre ɓen mo ɓuy raw wo ngrisgi wer koge re ɓen wo de ferge wããre ɓe no.

⁴⁸ Man ɓe wo de pan ɓe wo wo ko ge ɓe mokay, á raw wo ngrisgi, man ɓe raw riŋgi ɓe ga : Hih, naʼã, ndo joŋ wùr no maʼ le la? Ko wùr go de caa jiili de pan ɓo mo lag kiɗ moge ɗa la.

⁴⁹ Yeso raw riŋ rage ga : Nday kiɗ me gahãyne? Nday bay de koge ga ndi joŋ bà de hay ge ɓil tiŋ mani Pan ɓin wa yawla?

⁵⁰ Ama á laa wo wer wããre maga á riŋ ra de ɓe mo ga,

⁵¹ Yeso kal ferge mbe le wer ɓaara Nasared so, yãã jag ɓaara lay. Man ɓe raw ɗaw wããre sen ɓuy ɓil ɓe, ɗig wer ɓe ti ɓe lay.

⁵² Yeso raw yaɗ wer ko re wo pel ni debaŋ, gẽẽ debaŋ lay, co jag Baa, co jag jar téebeere wo lay.