JOWEL 1 - Tupuri Bible

¹ Wããre maga Manwur wãã ne Jowel je ni Petuweln mono.

Maapoɗ wo de kay kaŋ wo go ti sir no

² Laa we wããre ma kay no, nday jar kluuri no! Coʼ we sug ɓay, nday ɓuy jar ma ɓi sir Juda no! Re ma doosen no kay joŋ mbe we ti boŋ nen ɓay, Noga nen pããre ɓay wo yawla?

³ Fern we ne weere ɓay wo nen maga á mo fern wo ne weere ɓaara wo, Day weere ɓaara mo siin wo ne jar ni ɓaara wo lay.

⁴ Coore maga gwaʼ jag degornog ni mono, magalga reen go. Maga gwaʼ jag magalga ni mono, gejer reen go lay. Maga gwaʼ jag gejer ni mono, maapoɗ reen go ɓuy lay.

⁵ Pũy we go, nday jar taɗge de yii no, laa we roo! Law we see ɓay, nday jar jo yii no! Werga, à naa ge yii yaŋ go we jage!

⁶ Jar po wo de leʼ Israyel sir mani ɓi no. Á wo de egre debaŋ, wo ngaɓa debaŋ lay. Saŋ ɓaara doo saŋ mingir nono. Way ɓaara doo ma man mingir no lay.

⁷ Á ɓlag wo pay tlalum ɓin go, Á caa wo koo hõõ mani ɓin go, geɗeb wo nen ɓe go lay. Jag doo tlalumn hig wo go ɓuy lay.

⁸ Law see ɓe doo may tigli maga lag tãy õõbe go ti ɓe Ma raa je maga hay go de yããge ɓe nono.

⁹ Jobo bay age de fẽẽre hãge noga de yii ma sii jag ɓil tiŋ mani Manwurn wa so. Jar siɗ jag maga wo de joŋ peele ne Manwur wo go nen lawge.

¹⁰ Payren ɓlag wo go, sirn go nen lawge. Coore bay wa, coore blen hig go. Yii ma defayn taw go, noo draʼ caa wer go lay.

¹¹ Jar jeegen gay wo go, jar peɗ tlalum wo go nen lawge lay, Wer coore blen wo de orje no, Werga jobo we mopo le doo ɓil pay gà hase.

¹² Tlalumn lwaɗ go, koo hõõn hig go lay. Koo grenadiyen hig go doo gomon wo de koo pomiyen no lay. Koore ma ɓil payren hig wo go ɓuy. Fruygi bay ɓil je tabay po wa so.

Jowel ga jar Juda mo hẽẽ wo bii

¹³ Nday jar siɗ jag no, lag we tãy õõbe ti ɓay day law we! Law we, nday jar joŋ peele ti ngel siɗ jag no! Á we le, day nà we de tãy õõbe see, nday jar joŋ peele ne Baa ɓi no! Werga, fẽẽre hãge wo de yii ma sii jag bay wo ɓil tiŋ mani Baa ɓayn wa so.

¹⁴ Tay we le go sagsag ma hẽẽ bii! ʼWaa we ɓay ɓe wo go ne jar ɓuy. Tay we jar kluuri wo de jar ma ɓil sirn wo le ɓuy ɓil tiŋ mani Manwuri, Baa ɓay no, Day ni nday ɗe we Manwuri, maga á mo caa war ɓay le!

Wur baage põõ mani Manwur no

¹⁵ Sen nà diŋ wur ma ẽ no la! Sen nà werga wur mani Manwurn go maŋ. Á le de age de baage põõ mani je ma de egren ɓuy no.

¹⁶ Naa bay ko rege de nen nà wa so. Ɓil tiŋ mani Baa naa draʼ fruygi wo de feg caa wo wer go lay.

¹⁷ Coore maga à joʼ ra taw wo wo go gesiŋ ni. Boolen wo go ɓil koɗe, pulin leɗ wo go gesiŋ lay. Coore ble bay wa so.

¹⁸ Horogren wo nen coocoo ɗala! Deeren wo go de gayre werga hõõ bay wa. Fǐirin wo de sããren wo draʼ wo ti bon lay.

Jowel tos Baa

¹⁹ Manwuri, ndi joŋ kuuwuy wo mo, werga wùu roɗ fíi ma mbásgan wo go mono. Á saw koore ma ɓil payn wo go lay.

²⁰ Nàyre ma mbásga wo de rage nà diŋ mo ti, werga gloŋren õg wo go ɓuy, Day wùu roɗ fíi ma mbásgan go ɓuy lay.