JOŊRE 1 - Tupuri Bible

Yeso ga se ɓoʼ Nenterse ma bay ɗag yaŋ le ne jar peele sen wo ti

¹ Hẽn ɓi Tewfil, ndi sii wo ne ndo ɓil kefder ɓi ma taŋgun diŋ re maga Yeso joŋ ra, had ra mono,

² le ti tĩĩgi wer ɓe kaʼ hãã go ti wur maga á maŋn wo go ciŋ mono. Taŋgu maga á bay raw ge ciŋ ɗa, se wãã wããre ɓen ne jar peele ɓe maga se hay hoo ra go de Nenterse ma bay ɗagn mono.

³ Blam húulí ɓe se dog ɓaale pur ndar nen see ɓe ne hara naw doo naa, ga á mo ko wo se, ga se yaŋ tenene. Se raw wãɗ wããre ne hara ti twaywaŋ mani Baa no.

⁴ Ti wur maapo á raw hayge re hoole yoo ɓaara, kal riŋ rage ga : Yaʼ we go se Jerusalem hãã wa, gor we fen maga Baa hay riŋ ti ɓe mono, fen maga ndi hay riŋ nday ti ɓe ga Baa ɓoʼn yaŋ le ne nday mono.

⁵ Werga Jaŋ joŋ batem jar diŋ de bii, ama ma ɓay naw gwaʼ rab koɗe, á joŋ ge batem ɓay yaŋ diŋ de Nenterse ma bay ɗage.

Yeso raw ciŋ

⁶ De maga á wo de tayge mo taʼ, jar ma wer Yeson raw wo ɗe ge ɓe ga : Ɓa Waŋkluu, ndo baa ge waŋ jar Israyeln wo ne hara diŋ de wur sen la soge?

⁷ Yeso raw fer wããre ne hara ga : Sen bay diŋ re ɓay ma ko naw wo de wur maga a ge mo wa, werga ngaɓ naw sen diŋ Baa de egre ɓe no.

⁸ Nday daʼ ge egre yaŋ ti wur maga Baa ɓoʼ ge Nenterse ɓen le ti ɓay mo ɗa ane. Blam sen nday kol ge diŋ jar siɗ re ɓin go Jerusalem, go ɓi sir Jude ɓuy, go Samari, hãã go ti jag sir taw ge ɓuy lay.

⁹ Blam wããre sen Yeso kal rawge wo ciŋ, á raw wo lagge ko raw ge ɓe wo ciŋ lagge, swaare raw yoŋ ge ɓe go nen ɓaara.

¹⁰ De maga á caa wo waŋ wo de nen ɓaara ciŋ wer Yeso mo lag, ko la, jar po wo ɓog de õõbe ti depiiri see ɓaara la lagge.

¹¹ Á raw wo wii rage ga : Nday jar Galile no, nday lag ɓay ko nen ɓay wo ciŋ le la? Yeso je maga hay wo yoo ɓay la, day raw wo ciŋ mo caw no, á fer ge yaŋ le doo maga nday de ko ge ɓe wo raw ge ciŋ no caw pa no.

Á kol jobo go ti ngel joŋre mani Juda no

¹² Jar peele Yeso hay wo le ti húulì maga koore Olif wo ti ɓe, raw wo ferge Jerusalem, húulì sen ɓiŋ Jerusalem mbaŋ ɗawa.

¹³ Á wo wo nduu gi Jerusalem mokay, raw wo ɗiigi ɓi tiŋ ma ciŋ ti kẽẽ no. Jar maga ɗii wo wo ciŋ ni, diŋ Piyer, Jaŋ, Jag, Aŋdre, Filip, Toma, Bartelemi, Matiye, Jag wel mani Alfe, Simoŋ wel ma de baa wùu ti kawre ɓe no, Juda wel mani Jagn lay.

¹⁴ Á raw wo tay jag ɓaara ɓuy ga saara mo lag tos Baa tum tum, naare po wo ni lay, Mari man Yeso wo de hẽẽre Yeso wo ni lay.

¹⁵ Naw wo nà ge blam sen meʼ jar ma de hã ɓil ɓaara ne Yeso wo kis ti ɓe doo ɓog, raw wo tay ti see ɓaara, Piyer raw urgi go ciŋ yoo ɓaara, raw riŋ rage ga :

¹⁶ Nday hẽẽre ɓi no, hay bà ẽẽ ẽẽ ne, wããre maga kefder Baa wããn go taŋgu jag Dafid de Nenterse egn ti Judas leʼ we go ti jag ɓe, Nenterse ma bay ɗagn hay wãã go diŋ ti Judas se ga kaŋ nen jar ma baa Yeson wo ti faagen mono.

¹⁷ Á hay de kee ge yoo naa, á hay de daʼ nen mo ma ɓe ti joŋre peele sen mokay lay.

¹⁸ (Je sen mokay la raw yee pay de solay maga á hay poɗn de ɓe ti re ɓlagge ɓen mono. Á raw leʼ ge gesiŋ, á raw ngar ge go, weere ɓiiri ɓe laa go lay.

¹⁹ Re sen mokay jar Jerusalem wo ɓuy de ko ge ɓe, á hay wo ɗe pay sen de jag ɓaara ga Hakeldama, wer ɓe ga pay cíi).

²⁰ Werga á hay de yerge go ɓil Siŋ wo ga : Tiŋ ma ɓen mo gwaʼ go tway, Jobo mo hay ni wa. Á de yerge pa ga : Je tigriŋ mo kol go ti ngel joŋre ma ɓe no.

²¹ Wersen jar maga hay wo le seege wer naa de maga Waŋkluu Yeso hay ɓiŋ naa bay raw ge ciŋ ɗa,

²² le de batem maga Jaŋ hay joŋge ɓe mo hãã go de maga á wo men naa go raw ciŋ, dagabaa jobo ɓiŋ naa ni boŋ, ma wãã ge go ti bir gi maga Yeso fer bir gi go mono.

²³ Á raw wo lag jar pel ɓaara ɓoge, Josef maga à ɗen ga Barsabas, togoɗge ɓe ga Justus, lan diŋ Matiyas lay.

²⁴ Á raw wo tos ge ga : Waŋ wùr no, ndo je ko jiili jar go ɓuy no, yoo jar se ɓogn wo mo lag no, kaŋ nen wùr ti je maga ndo maŋ sen go mo ɗa la,

²⁵ ma kol ge ti ngel joŋre mani Juda wejõõ ɓo maga leʼ go gesiŋ mono.

²⁶ Á raw wo naa wãywáale ti ɓaara, wãywáale raw leʼ ge ne Matiyas ti, jar peele Yeson fer wo tayge hwal ti ɓog tigriŋ pa so.