JONAS 2 - Tupuri Bible

Cẽẽ lig Jonas go, se raw tosge, cẽẽn dugn go

¹ Manwur raw ɓoʼ cẽẽ ma kluu le maga a mo lig Jonas go. Jonas joŋ síilí swaʼ de naw swaʼ ɓil cẽẽn ni.

² De maga se ɓil cẽẽn ni mono, Jonas raw tos Manwuri, Baa ɓe no.

³ Se kal ga : Nen gayre ɓin mono, ndi hay ra de Manwuri day se raw yiŋ jag ne ndi. De maga ndi le yoo jar húulí wo mono, ndi ʼwaa ware day ndo hay laa gẽẽge ɓi.

⁴ Ndo hay ɓoʼ me wo wer tuu cããge maaroge. Yuuri bii hay wo go de cir ti ɓi ɓuy. Kaŋngaw ma kleere de ma kluuri hay kol wo wer go me ti ɓuy.

⁵ Ndi ɓin ndi hay ɗig ga : Ndo nii mbo ndi wo go see ɓo hãã so. Ama ndi ko ge mbi tiŋ ɓo ma bay ɗagn yaŋ ɗa pa.

⁶ Bii hay ɓoʼ doo go me ti nen woge de ɓi jag húulí. Ngel ma kuɗum hay yoŋ me go. Gusur hay klew wo doo go me ti.

⁷ Ndi hay cwaa we wo go gesiŋ wer kããge húulì wo yaw. Sir hay kuɓ jag we go me ti ma tum yaw. Ama ndo fer le go naa ndi tenen ɓi tuu ma kluu no, Manwuri, Baa ɓi no.

⁸ De maga maysee ɓi hay le go de gayre ɓil ɓi mono, Ndi hay ɗig ti ti Manwuri, Day tosge ɓin raw dayge wo see ɓo ɓil tiŋ ɓo ma bay ɗagn no.

⁹ Jar maga saʼ wo see ɓaara de sõõre ma de koɗn wo mono, Sen maŋ wo jag de el wo go ti see ɓaara.

¹⁰ Ama ndi ma ɓin ndi joŋ ge siɗgi jag wo yaŋ ne ndo de war jag ma joŋ suseʼ ne ndo. Hãge jag maga ndi hay hãn go pel ɓo mono, ndi taw jag ɓe yaŋ go. Pẽẽgen diŋ doo Manwuri.

¹¹ Manwur raw wii cẽẽ no, day cẽẽn raw dug Jonas go ciŋ ti ngel ma de heege.