KEFDER MAGA JAG YER NE MONO 2 - Tupuri Bible

Hoo sug ti jar po wo daŋ kããra wa

¹ Hẽẽre ɓi no, nday hã ɓil ɓay go ne Yeso Kris Waŋkluu, Yeso je ma de gragge de woore daŋge ɓuy no, nday mo horge sug ti jar de daŋ kããra taɗ taɗ wa.

² Ma po nday de tayge kaʼa, je horog po ma de laa õõbe ma de woore ti, de hee boo biŋni ti wedoo ɓe, kal kal ge wo yoo ɓay, je coo po ma de laa õõbe ma de ngar ge ti ɓe raw kalge wo yoo ɓay lay.

³ Nday raw hoo sug ti bloo ma de õõbe ti de woore no, raw riŋgi ɓe ga : A ɓon le go hay ge ti koo ma de woore la. Ma je coocoo la, nday raw riŋ sen ga : Ndo oo see ɓo deele ni layblaʼ, noga : Ndo hay gesiŋ jeŋ ɓaale ɓi layblaʼ, ndo mbo so.

⁴ Nday joŋ doosen no mokay, nday nà de horge sug ti jar taɗ taɗe, nday de ɗig ɗiggi ma de ɓlagge ɗar jar po wo ga?

⁵ Hẽẽre ɓi no, coʼ we sug ɓay de ele, Baa de hoo jar ma de coocoo ma ti tamsir lan wo go ga hãge ɓil ɓaara ne Kris mo hay diŋ horog ɓaara, á mo daʼ wo ngel maga se hay Waŋ ni doo ga á hay riŋ jar dage ɓen wo no mono.

⁶ Ama ma ɓay, nday raw mbuɗ gi diŋ foo jar ma de coocoon wo yaw le? Jar horog wo de joŋ bon ɓay, wo de kog we ge wo pel jar cag wããren wo mo deŋ, nday bay de ko ge ɓe wa yawla?

⁷ Jar horog wo de ɗar ɗúu Yeso Waŋkluu maga a ɗen we ti mono.

⁸ Kidolgi, hayga nday lag we ti jag liŋgi waŋ doo maga á de yerge ga : Ndo mo da je ma ɓiŋ ɓo mbaŋ doo ga ndo da see ɓo no lay, ni nday yaŋ joŋge diŋ fen ma de woore.

⁹ Ama hayga nday yaŋ horge sug ti jar po wo werga á wo de horog debaŋ, horge sug ti jar la wo gà werga á wo de coocoo no, ni nday de joŋ ɓlagge, nday go cwãy cwãy diŋ jar cegaɗ jag liŋgi day re go de baw weege.

¹⁰ Werga, je maga hoo sug ti te jag liŋgin wo daŋge ɓuy day cegaɗ we go ti maapo boŋ no, je sen cegaɗ go nà ti ɓaara ɓuy tuu.

¹¹ Werga je maga wãã ga : joŋ figliw wa, wãã ga ii húulí wa diŋ se pa. Jobo mo joŋ bà figliw gà day raw ii húulí we no, je sen bay hoo sug ti liŋgin wa.

¹² Wããre ɓay wo de joŋre ɓay mo hay doo ma jar po maga a wo ge cag re ɓaara de jag liŋgi ma pog naa go ti see ɓaara nono.

¹³ Je maga bay we ko decoo jar wa no, Baa ko ge decoo ɓe ga has lay, ama je ma ko decoo jar mo caw, wããre leʼ ge ne hẽn ti gà.

Hãge see ne Kris wo de joŋre

¹⁴ Hẽẽre ɓi no, je maga wãã go jag ɓe la tawa ga : Se de hã ɓil se ne Kris, ama day joŋ ge doo ga Baa wãã no ga pa mono, hãge ɓil maga á hã ne Kris diŋ de jag ɓe tawa yãã je sen go gà.

¹⁵ Ma po jar ma ti jag Baa wo, je twar bla noga wãy layblaʼ, õõbe ma lagge ti ɓaara bay wa doo coo, fẽẽre rege ɓaara bay wa doo coo lay,

¹⁶ nday hã fẽẽre se kaʼn wo ne hara ga yaw, jobo yoo ɓay raw riŋ jar coo sen wo so gana, day we woore, daɗ we õõbe wo de rege maga see ɓay mo hay de bag wùu, koŋne mo cee we wa mono. Wããre se de jag tawan mokay maŋ mopo ne hara ga has has ɓuy.

¹⁷ Hãge see maga jobo hã go ne Kris doosen no lay so no, je maga hã ɓil ɓe de jag ɓe tawa, day joŋ ge doo ga Baa wãã no ga mono, wããre ɓen go de húulí.

¹⁸ Hayga jobo raw wãã ge we ga : Ndo de hã ɓil ɓo ne Kris, ma ɓi ndi de joŋ joŋre ne Kris lay no, blam sen ndi raw fer wããre ge ne hẽn ga : Kaŋ nen ɓi ti wer hãge ɓil ɓo ne Krisn bay joŋre mo ɗa, ni ndi kaŋ nen ɓo ti wer hãge ɓil ɓi ne Kris ma de joŋren mo lay.

¹⁹ Jobo joŋ de koge ga Baa yaŋ boŋ, mbe de ele, sõõre wo de ko ge doosen no lay, ama á wo de daɗ ge doo hẽẽne ɓe pag page.

²⁰ Ndo je se de loɗ ge no, ndo da ga ndo mo daʼ wer re ma kaŋ nen jar go ga hãge ɓil ne Kris ma bay joŋren de el ɓe bay wa lay mono?

²¹ Baa kee ga moo naa Abraham diŋ je ma de deele nen se diŋ wer may? Diŋ wer joŋre maga á joŋ ne mono, á baa wel ɓe Isag, raw ga se sii jag go de ɓe ne Baa.

²² Ndo ko we ga? Hãge see ɓe ne Kris wo de joŋre ɓen see wo wer kããra ɓog ɓuy, day hãge ɓil ɓe ne Kris raw joŋge go ti ngel ɓe keɗed, diŋ wer joŋre ɓe maga á joŋ ne mono.

²³ Wersen wããre la raw leʼ ge go ti jag wããre maga á go de yerge ɓe mono ga : Baa raw kee Abraham de deele wer hãge ɓil ɓe ne hẽne, Baa raw ɗe ge ɓe bar se.

²⁴ Nday ko we so ga Baa kee jobo ga á de deele nen se diŋ wer hãge ɓil ɓe go ne hẽn mo koɗ ga, ama á kee ne wer joŋre maga á joŋ ne mo lay.

²⁵ Nday mo ɗig ti Rahab, wãy figliw maga Baa kee ne mo ɗa. Jar maga jar Jwif laa ra wo wo ko ngel wo wo a ge ni ɓe mokay, á raw yãã rage liŋ ni ɓe de ele, raw kaŋ nen ɓaara ti faage maga á mo daŋ ge wo wo go ni, wersen Baa raw kee ge ɓe ga á de deele nen se.

²⁶ Egre jobo hoo we go ga á bay ɓoɗ egre wa so no, ni je sen go de húulí. Hãge see ne Baa doosen no lay. Je maga hã ɓil ɓe go ne Baa, day day ge joŋ joŋre doo ga Baa wãã no ga mono, hãge ɓil ɓe ne Kris go de húulí.