ESDRAS 1 - Tupuri Bible

Sirus hã faage booge tiŋ Baa ma Jerusalem no

¹ Ti kiŋgi ma taŋgu ga Sirus waŋ Perse kol ti waŋ mono, Manwur raw bag jag wããre ɓe maga se hay wããn ne Jermi jag go. Manwur raw buŋ ti Sirus waŋ Perse go, se raw wããge wo go ɓil sir ɓen ɓuy ga ʼwaa ɓay de jag lay, yer lay ga :

² Mokay diŋ fen maga Sirus waŋ Perse wããn mono : Manwuri, Baa ma ciŋn hã waŋre ma ti tamsirn wo go ne ndi ɓuy, day se raw riŋ ndi ga ndi mo boo tiŋ ne se Jerusalem wo ti prog ma Juda no.

³ Wose yoo ɓay diŋ je ma yoo jar ɓen wo la? Daga Baa ɓen mo hay de ɓe day á mo raw wo Jerusalem maga wo ti prog Juda mono, mo wo boo tiŋ mani Manwuri, Baa ma Israyel no. Á diŋ Baa maga wo Jerusalem mono.

⁴ Ti ngel ma honla ɓuy maga jar ɓen wo de gwaʼge ni mono, jar ma ti ngel sen ni mo hã wo solay, boo biŋni, fẽẽre ma de el wo de horog de fũy wo de hãge de dage wo ne hara ma joŋre tiŋ mani Baa maga wo Jerusalem mono.

⁵ Mo so no waŋre ma ti ɓĩĩni mani Judan wo de Benjamen wo, jar siɗ jagn wo de jar Lefidn wo, jar maga Baa pũy ɗiggi ɓaara go mo ɓuy raw wo hooge ma woge boo tiŋ mani Manwur ma Jerusalem no.

⁶ Jar leege ɓaara wo ɓuy raw wo kay rage, hã wo fẽẽre ma de joŋge de boo solay, de boo biŋni wo de fẽẽre ma de eln wo de horog de fũy wo, hã wo fẽẽre ma de woore wo ne hara debaŋ ciŋ ti hãge de dagen wo ni pa.

⁷ Waŋ Sirus raw fer fẽẽre ma ɓil tiŋ mani Manwur maga Nebukadnesar hay hoo ra le Jerusalem day hay laa ra go ɓil tiŋ mani baa ɓen mono.

⁸ Sirus waŋ Perse raw wii Mitredad je ɗaw horogn ga á mo hoo ra le go siigi. Se raw kee rage go, hã ra ne Sekbasar, waŋ ma pel jar Judan wo doo.

⁹ Mokay no diŋ ngaɓa fẽẽre sen wo : Tasa boo biŋni doo swaʼa, tasa boo solay ndare, mbegre wo doo ɓog ti kaawaʼa,

¹⁰ kob boo biŋni doo swaʼa, kob boo solay ma ɓil ɓogɓog wo kiskis naa ti ɓe hwale, fẽẽre ma tigriŋ wo ni ndar lay.

¹¹ Fẽẽre ma de joŋge de boo biŋni wo de boo solay hay wo ɓuy ndar dwee ti ɓe kiskis naa, Sekbasar raw rawge de ɓaara wer jar maga hay wo le go ti daŋgay ga men wo Babilon go, fer wo Jerusalem mono.