DANYEL 1 - Tupuri Bible

À raw de Danyel Babilone

¹ Nen kiŋgi ma de swaʼ maga Yehoyakim waŋ Juda hay joŋ waŋ mono, Nebukadnesar waŋ Babilon raw urgi wo leʼ Jerusalem day raw kaŋge ne hẽn jag go de cir ti ɓe go de soode wo.

² Manwur raw hã Yehoyakim waŋ Juda go ne hẽn doo de te fẽẽre ma ɓil tiŋ Baa no. Se kal rawge de ɓaara ɓil sir Sineyar, ɓil tiŋ mani baa ɓe no.

³ Waŋ Babilon raw riŋ Aspenas waŋ jar ɓe ma de ndar ɓayn wo ga á mo hoo jar Israyel po ma ti wer mani waŋn wo de ma ti moobe ma tinoo po wo mbage,

⁴ mo hoo weere ma jõõre ma bay ɗarge wo see ga wo de woore lay, wo de ko re lay, wo de ti ngel lay, car wo ɓil fẽẽre go lay day wo de kããge ma joŋ peele liŋ ni waŋ lay mono, nen maga à mo had ra de fẽẽre ma de yerge mani jar Kalden wo lay, de jag ɓaaran lay.

⁵ Waŋ raw ngaɓ rege ne hara maga á wo nen rege ɓe tum nen naw see rege mani ɓe waŋ no, see yii maga se hay joge ɓe mono nen maga se mo had ra nen kiŋgi swaʼ day blam ɓe á mo a wo pel waŋ joŋ peele ne hẽne.

⁶ Yoo jar sen wo ti ɓĩĩni mani Judan mono, Danyele, Hananiya, Mikayel wo de Asariya hay wo ni lay.

⁷ Waŋ jar ma de ndar ɓayn raw coo ɗúu ɓaara go de waŋ : Kaŋ ne Danyel ga Belsatsar, ne Hananiya ga Sadrag, ne Mikayel ga Mesag, ne Asariya ga Abed-Nego.

⁸ Danyel raw bag jag ɓe le go ɓil ɓe ga se mo glub see se go de rege mani waŋn wo de yii maga á hay joge ɓe mo wa. Se raw kem waŋ jar ma de ndar ɓayn wo ga á mo kaŋ wer se go glub see se ɓegdeʼ wa.

⁹ Baa raw joŋge nen maga Danyel mo coo jag waŋ jar ma de ndar ɓayn wo day á mo ko decoo ɓe lay.

¹⁰ Waŋ jar ma de ndar ɓayn kal wii Danyel ga : Ndi joŋ hẽẽne nà doo waŋ, je wãã re ɓi maga hay ngaɓ fen maga nday nen rege, nen joge go mono. Werga, á wo ge we ko nday de ngogre de daŋ weere jõõre maga kiŋgi ɓay boŋ mono, sen mo taʼ kaŋ ge taw ɓi ge nà kaŋge.

¹¹ Day Danyel raw wii je maga waŋ jar ma de ndar ɓayn hay wããre rege mani Danyel, Hananiya, Mikayel wo de Asariya ne hẽn doo ga :

¹² Kam kam ɓo, lam mbo weere ɓon wo nen naw hwal boŋ, day hã mbo ne wùr ma rege diŋ sug fẽẽre wo de bii ma joge tawa

¹³ day ni ndo ko ge nen wùr lay, ko nen weere jõõre maga re wo rege mani waŋ mo lay day ni ndo joŋ ge mbo doo maga ndo kon ge no so no.

¹⁴ Se raw yãã jag ɓaara ti fen maga á hay wiin wo mono day se raw lam rage nen naw hwale.

¹⁵ Naw se hwaln taw go mono, see ɓaara raw koge de el sar daŋ jar lan wo no, day saara hay de goɓre de daŋ weere jõõre maga hay wo re rege mani waŋn mo ɓuy no.

¹⁶ Go blam sen mono, je wãã re regen hay go herge de rege wo de yii maga hay diŋ ma ɓaara mbe go kar kar so, hay mbe hãge ne hara diŋ sugnee mbe ceɓ so.

¹⁷ Ne weere jõõre ma naan wo mono, Baa raw hã koge, ti ma car ɓil fẽẽre ma de yergen wo mo ɓuy wo de koge re ne hara, day Danyel hay go ndar wer fẽẽre maga mbuɗ wo nen jar wo go de lwaʼge wo ɓuy.

¹⁸ De maga wur maga waŋ hay ngaɓn go ga fer le de ɓaara pel se a mono, waŋ jar ma de ndar ɓayn raw woge de ɓaara pel Nebukadnesar so.

¹⁹ Waŋ kal wãɗ wããre de ɓaara day yoo weere jõõren wo mono, je ma doo Danyel, Hananiya, Mikayel wo de Asariya bay wa. Á raw lag rage joŋ peele ne waŋ so.

²⁰ Ti fẽẽre maga wii wo diŋ koge re wo de ti ngel ga waŋ wiɗ wer ɓaara mono, waŋ hay daʼ Danyel wo de daŋ jar ko wer fẽẽre wo de jar ndar wer fẽẽre ma nen ngel ma ciŋ maga hay wo ti sir waŋ ɓen mo ɓuy ɓaale hwale.

²¹ Danyel joŋ doosen nono hãã wo go nen kiŋgi ma taŋgu maga waŋ Sirus kol ti waŋ mono.