ཡོ་ནཱ། 1 - Tibetan Old Testament 2011

ཡོ་ནཱས་གཙོ་བོ་དཀོན་མཆོག་གི་བཀའ་ལ་མ་ཉན་པ།

¹ ཉིན་ཞིག་ཨ་མི་ཏེའི་བུ་ཡོ་ནཱ་ལ་གཙོ་བོ་དཀོན་མཆོག་གི་བཀའ་ཕེབས་ཏེ།

² ཁྱོད་གྲོང་ཁྱེར་རླབས་ཆེན་ནི་ན་ཝཱེ་ལ་ཕྱིན་ནས་དེར་ཡོད་པའི་མི་རྣམས་ལ་སྐྱོན་བརྗོད་དྲག་པོ་བྱོས་ཤིག གང་ལགས་ཟེར་ན་ངས་ཁོ་ཚོའི་བྱ་སྤྱོད་ངན་པ་ཚང་མ་མཐོང་བྱུང་ཞེས་གསུངས་མོད།

³ འོན་ཀྱང་ཡོ་ནཱ་ནི་གཙོ་བོ་དཀོན་མཆོག་ལ་གཡོལ་ནས་ས་ཕྱོགས་གཞན་ཞིག་ཏུ་སོང་བ་དང་ཡོ་པ་རུ་བསླེབས་ནས། དེར་ཨིསི་པེན་ཡུལ་དུ་འགྲོ་བའི་གྲུ་གཟིངས་ཤིག་མཐོང་ནས་གྲུ་གཟིངས་ཀྱི་གླ་སྤྲད་དེ་གྲུའི་ལས་བྱེད་པ་རྣམས་དང་མཉམ་དུ་གྲུའི་ནང་འཛུལ་ལོ། ཡང་ཁོ་གཙོ་བོ་དཀོན་མཆོག་ནས་ཐག་རིང་བྱུང་བའི་ཕྱིར། ཨིསི་པེན་ཡུལ་དུ་ཕྱོགས་ཐོན་བྱས་སོ།

⁴ འོན་ཀྱང་གཙོ་བོ་དཀོན་མཆོག་གིས་མཚོ་རླུང་དྲག་པོ་ཞིག་བཏང་བ་གནང་ནས་མཚོ་ཧ་ཅང་འཁྲུགས་པས་རྐྱེན་གྲུ་གཟིངས་དེ་ལ་ཆག་སྐྱོན་ཤོར་བའི་ཉེན་ཁ་ཆེན་པོ་བྱུང་བ་དང་།

⁵ གྲུ་པ་རྣམས་དངངས་སྐྲག་ཆེན་པོ་སྐྱེས་ནས་རང་རང་སོ་སོའི་ལྷ་ལ་སྨོན་ལམ་འདེབས་པ་དང་། གྲུ་གཟིངས་ཡང་རུ་གཏོང་ཕྱིར་དོད་པོ་རྣམས་ཆུ་ལ་དབྱུགས་སོ། འོན་ཀྱང་ཡོ་ནཱ་གྲུ་གཟིངས་ཀྱི་ཁང་མིག་ཤོད་ལ་ཕྱིན་ཏེ་གཉིད་འཁུག་ནས་བསྡད་ཡོད་པ་དང་།

⁶ གྲུ་དཔོན་གྱིས་ཁོ་ལ་དེར་མཐོང་ནས། ཁྱོད་གཉིད་འཁུག་ནས་བསྡད་པ་དེ་གང་ཡིན་ནམ། ཡར་ལངས་ནས་རང་གི་ལྷ་ལ་སྐྱབས་གྲོགས་གནང་རོགས་གནང་ཞེས་སྨོན་ལམ་འདེབས་ཤིག གཅིག་བྱས་ན་ཁོང་གི་སྙིང་རྗེས་ང་ཚོ་འཆི་བའི་ཉེན་ཁ་འདི་ནས་ཐར་བར་སྲིད་ཅེས་སྨྲས་སོ།

⁷ དེ་ནས་གྲུ་པ་རྣམས་ཕན་ཚུན་སྨྲས་པ། སུའི་རྐྱེན་གྱིས་ང་ཚོར་རྐྱེན་ངན་འདི་འདྲ་བྱུང་བ་ཡིན་པ་དེ་བརྟག་དཔྱད་བྱེད་ཕྱིར་ང་ཚོས་རྒྱན་ཤོག་བླུགས་དགོས་ཅེས་སྨྲས་ནས། དེ་བཞིན་བྱས་པས། ཡོ་ནཱའི་མིང་ལ་རྒྱན་ཤོག་བབས་སོ།

⁸ དེ་ནས་ཁོ་ཚོས་ཡོ་ནཱ་ལ། ད་རྐྱེན་འདི་སུའི་སྒོ་ནས་བྱུང་འདུག་ཤོད་ཅིག་ཁྱོད་ཀྱི་འཚོ་ཐབས་གང་ཡིན་པ། ཁྱོད་རང་ལུང་པ་ག་ནས་ཡིན་ནམ། ཁྱོད་རང་མི་རིགས་ག་རེ་ཡིན་ནམ་ཞེས་འདྲི་བ་ལེན་པ་དང་།

⁹ ཡོ་ནཱས་ལན་དུ་སྨྲས་པ། ང་ནི་མི་རིགས་ཨིབ་རི་པ་ཞིག་ཡིན་སྟེ། ས་གཞི་དང་རྒྱ་མཚོ་བཀོད་པ་གནང་མཁན་མཐོ་རིས་ཀྱི་དཀོན་མཆོག་གཙོ་བོ་དཀོན་མཆོག་ལ་བསྙེན་བཀུར་ཞུ་མཁན་ཞིག་ཡིན།

¹⁰ ཡོ་ནཱས་མུ་མཐུད་ནས་ཁོ་རང་གཙོ་བོ་དཀོན་མཆོག་ནས་བྲོས་གི་ཡོད་པའི་སྐོར་ལའང་བཤད་པ་དང་། གྲུ་པ་རྣམས་ཧ་ཅང་ཞེད་ནས་ཁོ་ལ། དེ་ནི་ཁྱོད་ཀྱིས་ཉེས་པ་ཚབས་ཆེན་ཞིག་བྱས་བཞག་ཅེས་སྨྲས་པ་རེད།

¹¹ ད་དུང་རླུང་འཚུབ་ཤུགས་ཆེ་རུ་ཕྱིན་པས་གྲུ་པ་ཚོས་ཁོ་ལ། ད་རླུང་འཚུབ་ཞི་བར་བྱེད་པའི་ཕྱིར་ང་ཚོས་ཁྱོད་ལ་གང་བྱེད་དགོས་ཅེས་དྲིས་པའི་ལན་དུ།

¹² ཡོ་ནཱས་ངས་ཉེས་པ་བྱས་པའི་རྐྱེན་གྱིས་ཁྱོད་ཚོ་རླུང་འཚུབ་དྲག་པོ་འདི་ལྟ་བུའི་ནང་དུ་ཚུད་དགོས་བྱུང་བས་ད་ཁྱོད་ཚོས་ང་ལ་མཚོའི་ནང་དུ་དབྱུགས་ཤིག་དང་མཚོ་ཞི་བར་འགྱུར་རོ་ཞེས་སྨྲས་པས།

¹³ འོན་ཀྱང་དེ་ཚོས་ཁོས་སྨྲས་པ་ལྟར་མ་བྱས་པར་གྲུ་པ་ཚོས་ད་དུང་གྲུ་སྐྱ་ཤུགས་ཆེན་པོ་བཏང་ནས་གྲུ་དེ་སྐམ་སར་སླེབས་ཐབས་བྱས་ཀྱང་། རྒྱ་མཚོའི་རྦ་རླབས་ད་དུང་ཤུགས་ཆེར་འཁྲུགས་པའི་རྐྱེན་གྱིས་དེ་ཚོ་རྒྱ་མཚོའི་འགྲམ་དུ་སླེབས་མ་ཐུབ་པ་རེད།

¹⁴ དེ་ནས་ཁོ་ཚོས་གཙོ་བོ་དཀོན་མཆོག་ལ་སྐད་ཤུགས་ཆེན་པོས། ཀྱེ་གཙོ་བོ་དཀོན་མཆོག། ང་ཚོས་མི་འདིའི་སྲོག་ལེན་པའི་ཉེས་ཆད་དུ་ང་ཚོ་རང་སྲོག་དང་བྲལ་དགོས་པ་ཞིག་མ་གནང་རོགས་གནང་། ཀྱེ་གཙོ་བོ་དཀོན་མཆོག་ང་ཚོས་གང་བྱས་པ་དེ་ནི་ཁྱེད་ཀྱི་ཐུགས་དགོངས་བཞིན་དུ་བྱས་པ་ཡིན་ནོ།

¹⁵ དེ་ནས་ཁོ་ཚོས་ཡོ་ནཱ་ལ་བླངས་ནས་མཚོའི་ནང་དུ་དབྱུགས་པ་དང་། དེ་མ་ཐག་ཏུ་རྒྱ་མཚོ་ཞི་བར་འཇམ་པ་རེད།

¹⁶ དེ་ནས་ཁོ་ཚོ་གཙོ་བོ་དཀོན་མཆོག་ལ་ཧ་ཅང་ཞེད་ནས་དམར་མཆོད་ཅིག་འབུལ་ཞིང་ཁོང་ལ་བསྙེན་བཀུར་ཞུ་རྒྱུའི་དམ་བཅའ་བྱས་པ་རེད།

¹⁷ དེ་ནས་གཙོ་བོ་དཀོན་མཆོག་གི་བཀའ་གནང་བ་བཞིན་ཉ་ཆེན་པོ་ཞིག་ཡོང་ནས་ཡོ་ནཱ་ཁྱུར་མིད་བཏང་ཞིང་ཁོ་ཉ་དེའི་ཁོག་པའི་ནང་དུ་ཉིན་མཚན་གསུམ་བར་དུ་གནས་པ་རེད༎