Левито 1 - Biblija - Pe Baltitko Romani čib (Romanes) 2019

Pal Céla Shačkiribena

¹ I khardiá Raj Devél Mojzás, i phendiá léske skedyibnaskire šatratyr, phení:

² “Phen Izrailjoskire čhavénge i phen lénge: kiéli vari-kon tuméndyr kaméla te janel svénto dyibén (žértva) Ráske-Devléske, tedy, kóli kheritkoné murdaléndyr (skotóstyr), to sob (kaj) te janén tumé tumaró svénto dyibén ĥurtostyr ci stadatyr:

³ kóli léskiro svénto dyibén isyn célo shačkiribnaskiro dyibén baré kheritkoné murdaléndyr, mek te janel les murškané rodóstyr, te javél jov bidošéngiro; mek te janel les ke vudará skedyibnáskiri šátra, sob (kaj) léske te lathel láska angíl Raste-Devléste;

⁴ i čhuvéla péskiro vast pe šeró vaš célo shačkiribnaskiro svénto dyibén, i lathéla jov láska, te žužakirel jov pes grehéndyr;

⁵ i začhinela guruvóres (tiel'cos) angíl Raste-Devléste. Aaronóskire čhavé, rašaja, mek te janén rat, i mek te bryzginen ratésa saré rigéndyr pe altárjo, savó isyn pašýl zagiibén dre skedyibnáskiri šátra;

⁶ i zlela cýpa celoné-xačkiribnaskire sventoné dyibnástyr, i rosčingirela les pe pašá;

⁷ Aaronóskire čhavé, rašaja, čhuvéna pe altárjo jag, i pe jag rosčhuvena kaštá;

⁸ i rosčhuvena Aaronóskire čhavé, rašaja, pašá, šeró i túko (čekén) pe kaštá, savé isyn pe jag pe altárjo;

⁹ a sventoné dyibnaskire pašá andrypnastyr (bukore) i lákire ĥerá vymorela jov paniésa, i shačkiréla rašáj saró pe altárjo: davá isyn célo shačkiribén, svénto dyibén, gudló thuv Ráske-Devléske.

¹⁰ Kóli léskiro celoné-xačkiribnaskiro svénto dyibén tykné kheritkoné murdalestyr, bakréndyr ci buzniendyr, mek te janel jov murškané rodóstyr, te javél jov bidošéngiro,

¹¹ i začhinela les angíl Raste-Devléste pe paš-ratítko (sievierno) altarjoskiri rig, i Aaronóskire čhavé, rašaja, mek te bryzginen dalé ratésa pe altárjo saré rigéndyr;

¹² i rosčingirena les pe pašá, otdena davá šeró i davá túko (čekén), i rosčhuvela len rašáj pe kaštá, savé isyn pe jag, pe altárjo,

¹³ a pašá andrypnastyr (bukore) i ĥerá vymorela paniésa, i saró janéla rašái, i pe altárjo shačkiréla, davá isyn célo shačkiribén, svénto dyibén (žértva), gudló thuv, Ráske-Devléske.

¹⁴ Kóli jov janéla Ráske-Devléske čirikliendyr célo shačkiribén, mek te janel péskiro svénto dyibén gorlicendyr ci terné golumbendyr;

¹⁵ rašáj les janéla ke altárjo, i phagiréla léske šeró, i shačkiréla pe altárjo, a rat vytasavela ke altarjoskiri vánta;

¹⁶ léskiro valjo lákire porenca otlela i čhurdéla la pašýl altárjo pe vastokoskiri rig, kaj isyn pieplo (práska);

¹⁷ i phagiréla la (čirikliá) dre lákire phaká (kryly), na otlyi len, i shačkiréla la rašáj pe altárjo, pe kaštá, savé isyn pe jag: davá isyn célo shačkiribén, svénto dyibén, gudló thuv, Ráske-Devléske.