Markose 1 - BIBELE

Tša Johane Mokolobetši. Jesu o a kolobetšwa, o a lekwa, o bitša barutiwa, o fodiša balwetši

¹ Mathomo a Ebangedi ya Jesu Kriste Morwa wa Modimo.

² A bile bjalo ka ge go ngwadilwe ke baporofeta ba itšego: Tseba, ke roma motseta wa ka a go ete pele, gore a go lokišetše tsela.

³ Lentšu la segoeledi lešokeng le re: Lekelelanyang tsela ya Morena, le lokiše mebila yagwe.

⁴ Johane a tšwelela lešokeng a kolobetša, a goelela kolobetšo ya tshokologo e išago tebalelong ya dibe.

⁵ Naga yohle ya Juda, le bohle ba Jerusalema ba tšwelela go yena, ka moka ba kolobetšwa ke yena nokeng ya Jorodane, ba bola dibe tša bona.

⁶ Mme yena Johane o be a apere kobo ya boya bja kamela, a itlemile matheka ka lerala, a eja ditšie le dinose tša naga.

⁷ A goelela a re: E a mphetago ka maatla o ntšhetše morago, yo ke sa swanelwago ke go inama pele ga gagwe ka hunolla lerala la dieta tša gagwe.

⁸ Nna ke kolobetša ka meetse; mme yena o tlo le kolobetša ka Moya o Mokgethwa.

⁹ Mehleng yeo Jesu a tla a etšwa Natsaretha kua Galilea, a kolobetšwa ke Johane nokeng ya Jorodane.

¹⁰ Ya re a sa tšwa meetseng a bona magodimo a ahlama mme Moya o mokgethwa o mo theogela bjalo ka leeba.

¹¹ Lentšu le etšwa legodimong la re: O Morwamoratwa wa ka yo ke kgahlwago ke yena.

¹² Moya wa tloga o mo gapeletša wa mo iša lešokeng.

¹³ Gona moo lešokeng a dula matšatši a masome a mane a lekwa ke Sathane, a le gare ga dibata; barongwa ba mo direla.

¹⁴ Mola Johane a golegilwe, Jesu o ile Galilea, a goelela Ebangedi ya mmušo wa Modimo.

¹⁵ A re: Lebaka le tlile; mmušo wa Modimo o batametše; sokologang le dumele Ebangedi.

¹⁶ Ya re ge a šika le lewatle, a bona Simone le Andrea ngwanabo, ba rea malokwa a bona lewatleng, gobane e be e le barei ba dihlapi.

¹⁷ Jesu a bolela nabo a re: Tlang le ntatele; ke tlo le dira barei ba go phutha batho.

¹⁸ Bona ba napa ba tlogela malokwa a bona, ba mo latela.

¹⁹ Ge a fetetše pejana, a hwetša Jakobo morwa wa Tsebedeo, le Johane ngwanabo, ba hunaganya malokwa a bona ba le leselawatleng;

²⁰ A napa a ba bitša; bona, e sa le semeetseng, ba tlogela tatabo Tsebedeo gona moo leselawatleng a na le bathwalwa, ba tloga le Jesu ba mo šetše nthago.

²¹ Ba tsena Kaperenaume; ba sa tšo fihla, a ya phuthegong a ruta ka Sabatha.

²² Batho ba tlabega ka thuto ya gagwe, gobane o be a ba ruta boka e a nago le maatla, e sego bjalo ka bamangwalo.

²³ Gona moo phuthegong ya bona go be go na le motho wa moya wa ditšhila; yena yoo a goa a re:

²⁴ O na le taba mang le rena. Wena Jesu wa Natsaretha? A o tlile go re fediša? Nna ke a go tseba; o Mokgethwa wa Modimo.

²⁵ Jesu a mo kgalema a re: Homola! Tšwaa go motho yo.

²⁶ Moya wa ditšhila wa mo akgaakga, wa goa ka lentšu le legolo, wa tšwa go motho yoo.

²⁷ Bohle ba tšhoga, ba botšišana ba re: Ke dilo mang tšeo? Ke thuto e mpsha e maatla. O buša meoya ya ditšhila, gomme e a mo kwa.

²⁸ Gomme tumo ya gagwe ya akgofa ya tšwela thoko tšohle tša naga ya Galilea.

²⁹ Ge ba tloga moo phuthegong, ba ya ngwakong wa Simone le Andrea, ba na le Jakobo le Johane.

³⁰ Mme mogwegadi wa Simone o be a le dilaong a swerwe ke letadi; a sa fihla, ba tla ba mmolela.

³¹ Jesu a ya a mo tsoša a mo swere ka seatla; letadi la mo tloga, mme a ba apeela.

³² E šetše e le mantšiboa, letšatši le diketše, ba tliša balwetši bohle go yena, le ba ba nago le meoya e mebe.

³³ Motse ka moka wa ba wa bokana moo mojakong.

³⁴ Jesu a fodiša ba bantši ba ba babjago ka malwetši a mehutahuta, a leleka meoya e mebe e mentši, a se dumele ge meoya e mebe e bolela e re e a mo tseba.

³⁵ Ka la ka moswana a tsoga e sa le bošego, a tšwa a ya felo mo gongwe lešokeng, a rapela gona.

³⁶ Simone le ba ba bego ba na nae, ba mo šala nthago.

³⁷ Ba mo hwetša ba re: Batho bohle ba a go nyaka.

³⁸ Jesu a fetola a re: A re yeng metsaneng e lego fa kgauswi, ke yo ruta le gona, ka gobane ke sona se ke se tletšego.

³⁹ A tšama a ruta diphuthegong tša bona nageng ka moka ya Galilea, a leleka meoya e mebe.

⁴⁰ Gwa tla motho wa lephera, a mo kgopela, a mo khunamela ka matolo, a re: Morena, ge o ka rata, o ka kgona go mphodiša!

⁴¹ Jesu a mo kwela bohloko, a iša seatla a mo swara a re: Ke rata fao; fola!

⁴² A sa realo ke ge lephera le mo tloga, a fola.

⁴³ Jesu a mo laela ka thata, a mo phegelela,

⁴⁴ A re: O bone gore o se ke wa botša motho. Sepela o yo ipontšha go moperisita, o iše seleboga sa ba ba fodilego se se laetšwego ke Moshe, gore e be bohlatse go bona.

⁴⁵ Motho yoo, ge a tloga moo, a tšama a bolela a gaša taba yeo gohle; Jesu a ba a šitwa go tsena motseng a bonwa; a dula ntle lešokeng, batho bona ba tla go yena ba etšwa thoko tšohle.