MATIU 1 - Ngowili Yekpei Numu Kpɛlɛɛ Va

Yesu Le-Gbambii

¹ Ndeblei nasia Yesu Kristi gbuani ti hu, Mahɛi Devidi na i gbuani Ebraham le gbaambii hu, ti lɛisia yeekɔlɛi lɔ.

^2-5 Ebraham lɔ i Aisaki leni, Aisaki i Jekɔpi le, Jekɔpi i Juda le tia ngi ndewengeisia, Juda tia Tema ti Pɛrɛsi le kɛɛ Sira, Pɛrɛsi i Hɛsrɔn le, Hɛsrɔn i Ram le, Ram i Aminadab le, Aminadab i Naasɔn le, Naasɔn i Salmɔn le, Salmɔn tia Rehab ti Boasi le, Boasi tia Ruti ti Obɛd le, Obɛd i Jɛsi le, Jɛsi i Mahɛi Devidi le.

^6-11 Devidi tia Yuraya nyahɛi ti Sɔlɔmɔn le, Sɔlɔmɔn i Rɛhoboam le, Rɛhoboam i Abaija le, Abaija i Esa le, Esa i Jihosafat le, Jihosafat i Joram le, Joram i Ɔzaya le, Ɔzaya i Jotam le, Jotam i Ehas le, Ehas i Hɛsikaya le, Hɛsikaya i Manasɛ le, Manasɛ i Emɔs le, Emɔs i Josaya le, Josaya i Jɛkonaya le tia ngi ndewengeisia a watii na ti Juubleisia houni a kɔhoungaa ti li a tie Babilɔn.

^12-16 Ti lingɔi wooma Babilɔn Jɛkonaya i Sialtiɛl leilɔ, Sialtiɛl i Sirubabɛl le, Sirubabɛl i Abiud le Abiud i Ɛliakim le, Ɛliakim i Ezɔ le, Ezɔ i Sedɔki le, Sedɔki i Asim le, Asim i Ɛliud le, Ɛliud i Ɛlisa le, Ɛlieza i Matan le, Matan i Jekɔpi le, Jekɔpi i Josɛfi le, Meri hinii, Meri na i Yesu leni, ta toli a Ngewɔ Maha Heingɔi.

¹⁷ Faale, i lɔto Ebraham ma i to Devidi ma, mbondɛi kpɛlɛɛ mbonda puu mahu naani yɛla lɔ ti leweni tao i hiye Devidi ma i to Juubleisia ti hou gbelei ma ti lini a tie Babilɔn, mbonda puu mahu naani lɔ ti leweni tawao i hiye ti lingɔi ma Babilɔn i to Ngewɔ Maha Heingɔi ma, mbonda puu mahu naani lɔ ti leweni.

Yesu Kristi Lelei

¹⁸ Hii Yesu Kristi lelei i wieni: Ti yɛ ngi nje Meri vema Josɛfi lɔ wɛ, kɛɛ pɛiŋ heinyɔuya a wuaa ti luahu ma i tɔilɔ kɛ i koo wumbunga a Ngewɔ Yafei hu we.

¹⁹ Jifa ngi hinii Josɛfi i yɛni wɔɔ a pɔɔnamɔ lɔ tawao ii loni i Meri yawufe kpawama, i ngi lii huyiliilɔ gbeleva ngi ma yɛlɛŋ.

²⁰ Kɛɛ kia i yɛ ji magaama, Ndemɔi malikei i gɛilɔ a ngie hengei hu yɛ, “Josɛfi, Devidi bɔɔsɔɛi, baa luwa a bi nyahɛi Meri wumbula, ajifa na i yeekoi wumbunga i gbuanga Ngewɔ Yafei gama lɔ.

²¹ A hindolo lelɔ tawao ba ngi la hei a Yesu lɔ, ajifa a ngi nungeisia bawolɔ ti jumbuisia yeekpalɛi yeya.”

²² Ji kpɛlɛɛ i wielɔ aako na la i hou Ndemɔi i puni ngi lutuisia laa yɛ,

²³ “Nyaha lo gbelangɔ yila a goolɔ, i hindolo le, tawao ta yeendoi lolilɔ a Imanuɛl” (yeembui lɔ a Ngewɔ lɔ mu lia).

²⁴ Ji Josɛfi i wuni njii hu, i pieilɔ kia Ndemɔi malikei i ndeni la ngi ma; i ngi nyahɛi wumbuilɔ.

²⁵ Kɛɛ ii ngi lani gbla haaŋ i hindolo le, Josɛfi i ngi laa hei a Yesu.