HIBUBLƐISIA 1 - Ngowili Yekpei Numu Kpɛlɛɛ Va

¹ Ngewɔ yɛlɔ wɔɔ a yɛpɛ watii gboto kɛɛ a pele gboto hu wee mu maadani gama a ngi lutuisia hu wee,

² kɛɛ kiahuna na kɛlɛma voloi jisia ma, i yɛpɛnga mu gama a ngi Hindoloi hu wee. Ta lɔ Ngewɔ i hani gbi gbatɛni a ngi loko, tawao ta lɔ Ngewɔ i loko longa ngi ma hani kpɛlɛɛ yɛva a ngi woo.

³ Ta lɔ numu a Ngewɔ gabandeyii lɔ ngi hu tawao i gbuailɔ a Ngewɔ a pelei gbi, ngi laayia gbayangɔ wai a pie hani gbi ti yɛ na kia ti na. Kia i pieni Ngewɔ i manu nuuvungaa ti jumbuisia ma, i heiilɔ ngelegoohu Ngewɔ yejahui, Ngewɔ na kpayei gbi i ngi wɛ.

Ngewɔ Hindoloi Wɔlɔyii

⁴ Ngewɔ i pieilɔ ngi Hindoloi i lewe malikeisia ma, kia lɔɔ tomɛi na Ngewɔ i yeembiyei veni ngi wɛ tewengɔ ti ndɛi ma.

⁵ Ajifa Ngewɔ ii ndeni wɔɔ gba ngi malikei yeengila bɛɛ ma aa yɛma, “Bia lɔ nya Hindoloi a bie; folei ji lɔ ngi yɛnga a bi Kɛkɛ.” Tawao Ngewɔ ii ndeni kɔloongɔ malika gbi ma aa yɛma, “Nga yɛlɔ a ngi Kɛkɛ tawao a yɛlɔ a nya Hindoloi.”

⁶ Kɛɛ kpelei na Ngewɔ i yɛ ngi gbla-loi yoyoma dunyei hu, i ndeilɔ yɛ, “Ngewɔ malikeisia kpɛlɛɛ ta mawɛɛlɔ ngi gɔɔbu ti ngi vɛli.”

⁷ Kɛ Ngewɔ ndeilɔ malikeisia va yɛ, “Ngewɔ a pielɔ ngi malikeisia ti wie kia fɛfɛi i na, kɛ ngi yengebleisia kia ngɔmbuvoi i na.”

⁸ Kɛɛ Ngewɔ ndeilɔ kɔloongɔ ngi Hindoloi ta ngi ma yɛ, “Aa Ngewɔ, bi mahayɛi a yɛlɔ na kunafɔ va! Ba yɛlɔ bi nungaa mahu tawao ba kiti lewe ti ma a pɔɔna.”

⁹ “Bi longɔ a na lɔ pɔɔnangɔ, tawao bi lolongɔ a na ii wɔnani; na vamia Ngewɔ, bi Yewɔɛi, i loko longa bi ma i bi gɔnga a koohunɛɛ mbɛlɛhei na majɔɔva tewengɔ polouŋ na ma i feni bi mbaangɛisia wɛ.”

¹⁰ I ndeilɔ gbɔma yɛ, “Bia bi Ndemɔi bi dunyei gbatɛilɔ hindei gbi lɔtomɛi, tawao bi lokoisia vulii lɔ bi ngelegoohu gbatɛni la.

¹¹ Ta lolɔ hu, tɛɛ yaa yɛ na, kɛɛ bia ba yɛlɔ na; ti gbi ta hawalɔ kia kulɛi a pie.

¹² Ba ti gotolɔ kia ndoma, tawao ti maa a luvelɔ kia kula wovei maa a luve a kula ninɛi. Kɛɛ bia bi maa ɛɛ luve, tawao kɛlɛma gbi ii bi lɛɛvui ma.”

¹³ Ngewɔ ii ndeni wɔɔ gba ngi malika gbi ma aa yɛma, “Hei mbei nya yejahui, haaŋ ngi bi gɔnyɔuisia wuaa bi gɔɔbu, bi gɔwɔ lo ti ma.”

¹⁴ Yeeni lɔ hɔɔ a malikeisia? Ngafangaa mia a tie ta yenge Ngewɔ wɛ, a ti lo gbɔva nungei nasia ma Ngewɔ i wama ti bawoma.