FAILIMƆN 1 - Ngowili Yekpei Numu Kpɛlɛɛ Va

¹ Nya Pɔɔl, ngi kpindi-wɛlei bu Yesu Kristi wooma, mua mu ndewei Timoti mia mu kɔlɛi ji yoyoma bi gama, mu ndiamɔi kɛɛ mu mbaa ngengemɔi Failimɔn,

² kɛɛ Kristimablei nasia ta gomɛ bi yeepɛlɛbu, kɛɛ mu ndewenyahaloi Afia kɛɛ mu mbaa ndapimɔi Akipɔs:

³ Mu Kɛkɛ Ngewɔ taa mu Lemɔi Yesu Kristi ti ngauwanda ve wu wɛ kɛɛ ndiilɛli.

Failimɔn Loyii Kɛɛ Ngi Layii A Kristi

⁴ Nya ndewei Failimɔn, watii gbi ngi yaa Ngewɔ vɛlima, nga bi laa gɛlɔ ngi siɛgbua Ngewɔ na ma nga ngi vɛli.

⁵ Ajifa ndomɛi na bi piengɔ a Ngewɔmableisia kɛɛ bi layii a mu Lemɔi Yesu yeetɔwɔi lɔ foma nya ma.

⁶ Nyaa Ngewɔ vɛlima aako mbaayɛi na mua wueni mu hu jifa mu langɔ a Kristi i pie mu kpekpeyei na kpɛlɛɛ gɔɔ pandawanda mu majɔɔnga ji mua Kristi-ni mu wilingɔ hu.

⁷ Nya liima ndewei, ndomɛi na bi piengɔ a mu mbaa Kristimableisia, i koohunɛɛ waa venga nya wɛ kɛɛ ndiigba! Bi Ngewɔ nungeisia gbi ti lii nɛnga.

Pɔɔl Lɔ Onɛsimɔsi Manɛnɛ Wuaama

⁸ Sabui ji va lɔ, jifa bi ndewei a nge mua Kristi-ni mu wilingɔ hu, nga gu ngi liilo ngi nde bi ma a ngaulewe ngɛɛ bi na wie mahoungɔ i wie.

⁹ Kɛɛ jifa mu longɔ ma hinda mia ngi bi manɛnɛma fa. Ngi ji wiemaa kia bɛɛ Pɔɔl a nge, Yesu Kristi yaamɛi kɛɛ gbɔma kpindiwɛlɛbumɔ kiahuna Kristi wooma.

¹⁰ Faale nyaa bi manɛnɛma Onɛsimɔsi va, na bi tɔaa bɛɛ i yɛnga a nya loi vulii ji i langa a Kristi; ajifa ngi longa kpindi-wɛlei bu lɔ ngi yɛnga a ngi kɛkɛ.

¹¹ Watii yila ma wɔɔ ii yɛni a nafayahumɔ bi gama, kɛɛ kiahuna na nafayahumɔ mia bi gama kɛɛ nya bɛɛ.

¹² Nyaa ngi yamama na bi gama, tawao taa nya lii mia ti lima.

¹³ Nga lolɔ i yɛ nya gbla kia lɛ ngi kpindiwɛlei bu Ngowili Yekpei wooma, aako i yɛ a gbɔ nya ma a bi jɔngɔ.

¹⁴ Na hu gbi, ngii loni ngi kpɔnda bi ma gbɔva nya ma; kia na aa wie, nga lolɔ bi pie a bi nyɛkɛ. Famia ngɛɛ gbɛogbɛ wie kɛlee bi luma pɛiŋ.

¹⁵ Tɛnga Onɛsimɔsi i gbuailɔ bi ma watii wulo va aako i yama bi gama kunafɔ va.

¹⁶ Faale na, ii yɛni a nduwɔ lekee, i leweni polouŋ nduwɔ ma: i langa a Kristi i wotenga a bi liima ndewei. Ngi hinda i wɔlɔni kpa nya yaama! Tawao ngi hinda a wɔlɔ kpa tewengɔ na ma bi gama jifa bi luwɔi a ngie kɛɛ bi ndewei jifa ngi langɔ a mu Lemɔi!

¹⁷ Faale, bi gilingaa kɛ bi mbaa mia a nge, loko hei ngi bu bi tɔaa bɛɛ nya mia bi loko heima nya bu.

¹⁸ Ina i hinda nyamu wienga gɛ a bie ɔɔ ina bi gbaa gbi lɔ ngi ma, loko hei nya wɛ fa.

¹⁹ Mbei kɔlɛi ji i gɛlɛnga na, nyaa yeeji ta nyɛima a nya vulii nya lokoi: Nya Pɔɔl nga yeekpɛi gbualɔ lɔɔ. (Maa ii houni ngi hitɛ bi wɛ kɛ nya nda gbɛi lɔ bi ma ndɛvu ninɛi va bi majɔɔnga Kristi sabui hu.)

²⁰ Faale, nya ndewei, kɔnɛɛ le kpekpei ji wie a nge Ndemɔi va; kia nya ndewei a bie jifa mu langɔ a Kristi, nya lii i nɛɛ a na wiela.

²¹ Nya langɔe la kɛ kia ngi kɔlɛi ji nyɛima, ba na wielɔ ngi ndema bi ma; a tɔnya ngi kɔɔlɔ kɛ ba malema vulii wielɔ.

²² Nya longɔ gbɔma bi lomu yila hugbatɛ nya va, ajifa nya lii lɔ ma kɛ Ngewɔ a lumalɔ wu gbi wu hɛɛwoisia ma, a ji a nya yama wu ma.

Kɛlɛma Vamɛisia

²³ Ipafras ji mua ta mu kpindiwɛlei bu Yesu Kristi wooma, yɛ a va kaka wu ma,

²⁴ tawao nya mbaa ngengeblɛisia Maaki, Aristakɔs, Diimas kɛɛ Luki bɛɛ tɛɛ ta va kaka wu ma.

²⁵ Mu Lemɔi Yesu Kristi yauwandei i yɛ bi ma.