Marku 1 - Etkwen New Testament

Moetum mo Yohana ya Batisǝma

¹ Ena a abu Fwa Esese a chu mo Yeso Kristi Nwen mo Ehwya, è tke ángá.

² Ge no ebam adi afketa mo efojan Eshaya jan, “Ma tson etsonchi mam a kwafya mbo nwene e bwe a se o efǝ mbo ángá.”

³ “Ge no ebam efwe jan, be nobǝ fo aken mo ende akan a tswa ehwen jan anga, ‘Bwese efǝ nyi Yeso Etsodwe hon, bwe ywa be efǝku mbwe hon ju nyi ye.’ ”

⁴ No enona, Yohana ya Batisǝma è mbwibwa a tswa ehwen nè no du edgon a chu Fwa Esese mo Ehwya anga jan ne be nobǝ be e twa etwa mo be ebgen mo be, evǝa ge e bwe be batisǝma ngge Ehwya gwa a no be be ebgen mo be.

⁵ Be nobǝ embo chá efa mo Yahudiya ngge Urishelima è ken a zǝn ye. Bè no janvǝ mo be a anga a chu ebgen mo be a bè bwe Ehwya, ngge Yohana è bwe be batisǝma a tswa Kǝn a Joda.

⁶ Yohana è nggwa bwi mokàn a bè bwe ngge fǝfǝ mo gwemo a be fǝ́ anga rakumi. Gè tè bwi kanda a bè bwe ngge kpumo ángá a chin mbwe, mode mbwe è no embǝgwa ngge ngǝ̀ mo ju.

⁷ Ena a edgon a gè du anga, “Ende akan nyabwa chashin mam, ge chakpo twafǝ̀ m. M chà kǝn m me e hò a sen evǝa me e fken dgomo mo kpumo a tkyafù mbwe ra.

⁸ M bwe nye batisǝma ngge mbǝ, tea a ge ga bwe nye batisǝma ngge Engǝ́ Echanwenwen.”

Abu bè bwe Yeso Batisǝma ángá

⁹ Adi be tsǝnò hon, Yeso è vǝ a Nazarati a sǝnsen mo Galili bwa, Yohana è bwe ye batisǝma a tswa Kǝn a Joda.

¹⁰ Abu Yeso è nyagwa a je a kǝn hon ángá, gè di kpe è fkigwa, Engǝ́ Echanwenwen è no nyashwa ye a ju abu eba.

¹¹ Kǝnggwa aken è shwa chá kpe jan, “A bo wa Nwen m, m dgyan o àywá, ngge m fo etkwa mbo.”

Abu Shetan è mbwadi Yeso ángá

¹² Kǝnggwa Engǝ́ Echanwenwen hon du ye ken a tswavǝ́n.

¹³ Gè no a tswavǝ́n hon mo be tsǝnò gwi ndwe, Shetan è no mbwadi ye anga. Be nobǝ è fwa be a zǝn ra, kpwà be gwemo a tswavǝ́n, ngge be maleka mo Ehwya è bwa no dgon ye anga.

Yeso è fǝ́ be etsonchi ekwafya dwa

¹⁴ Chashin a bè twa Yohana ya Batisǝma no a àtá ehwyatu ángá, Yeso è ken a Galili nè no du edgon a chu Fwa Esese mo Ehwya anga. Ge jan,

¹⁵ “Engga bwa ara, zǝnotì mo Ehwya bwa tén ara, twa etwa mo ebgen mo nye, ngge nye e tsǝ́ekǝ̀n a chu Fwa Esese hon.”

¹⁶ Abu Yeso è no ken anga a buetkwa mo edan a Galili ángá, gè di be ya gwejo efum, Sima ngge nwenjin ye Andoro è no nggwa acha shi anga a tswa edan hon evǝa be e fu gwejo.

¹⁷ Ge jan be jan, “Nye bwa ba m, ma bwe nye nya nga ya a fǝ́ m be nobǝ dwa.”

¹⁸ Kè akan bè gwa acha mo be nè ba ye.

¹⁹ Atan a gè ken bishi chafya ángá, gè di Yakubo nwen Zabadi ngge nwenjin ye Yohana a tswa ngga no bwese acha mo be anga.

²⁰ Myan myan, gè fǝ́ be dwa, bè gwa ate be Zabadi ngge be ya mochi mo be, nè ba ye.

Yeso è nyonvǝ́ engǝ́ esera a ju nobǝ akan

²¹ Yeso ngge be ye è ba ye anga è ken a Kapanahum. Kǝnggwa Nò nya Etkem, Yeso è kwashi a àtá chuefǝnm, nè kwa ara moetum.

²² Be nobǝ è tàn ebwikpe adi moetum mbwe, adia gè tú be mò hon abu ende e no ngge emwentì, fwa ye abu be etumo mo edon ra.

²³ Ende akan nwene è no ngge engǝ́ esera, è no a tswa àtá chuefǝnm hon, kè akan, gè tandwa jan,

²⁴ “Mò a o nda anga a zǝn je ángá a ano, Yeso ya a Nazarati? O bwa we tkò je? M yi ende hon a o no anga, wa Nobǝ Echanwenwen, Akan hon mo Ehwya.”

²⁵ Yeso tén ye dgyén ngge echakpo jan, “Kpo nya. Gwa a je a ju ye.”

²⁶ Kǝnggwa engǝ́ esera hon è zon ye ngge echafǝju kposhi a sen, nè gwa a je a ju ye ngge dwa etànm.

²⁷ Be nobǝ binbin è tàn ebwikpe àywá nè no ká so eka anga jan, “Mo ena a ano? Moetum efwe ngge emwentì. Ge kpon èé be engǝ́ esera dgyén, be tse ye.”

²⁸ Etkyen a chu Yeso è kpò myan myan kwa gu efa mo Galili.

Yeso è matswa be ya modwa embo

²⁹ Atan a bè nyagwa àtá chuefǝnm hon ángá, Yeso è kpu Yakubo ngge Yohana twa e ge, bè ken a mbwe be Sima ngge Andoro.

³⁰ Gwe Sima ndegwa è dwano a sen adi edgye, kè akan be nobǝ ya ehwyà è jantu Yeso fwa a chu ye.

³¹ Yeso è ken a zǝn ye nè fu ye bu nè vǝ ye chu etkyen, edgye hon è gwa ye. Gè ken bwe mode no be.

³² Edgó nò eni, a nò è kpo ara ángá, be nobǝ kpu be ya modwa embo ngge be ya è no ngge be engǝ́ esera ángá bwa a zǝn Yeso.

³³ Be nobǝ a tswa eten hon è fǝnno gu a fǝehwen mo mu hon a Yeso è no a ángá,

³⁴ Kǝnggwa Yeso matswa be nobǝ embo ya è no ngge be modwa echu echu ángá nè nyonvǝ́ be engǝ́ esera àywá a ju be nobǝ. Gè cha ye dwa be engǝ́ esera hon be e jan fwa ra, adia bè yi ara ende a gè no ángá.

Yeso ken bgó ebgo a zǝn a nobǝ è fwa be ra

³⁵ Akǝndon, a zǝn è chà nggacha ye ra, Yeso è nyi etkyen nè vǝ́ a je, nè ken adi zǝn a be nobǝ è fwa be ra, a zǝn, gè bgó ebgo.

³⁶ Kǝnggwa Sima ngge be shushwa ye è kwa ara ye etkundam.

³⁷ Atan a bè di ye ángá, bè jan, “Be nobǝ binbin tkunda o anga.”

³⁸ Tea Yeso è jan be, “Je e ken chá be eten efki abu me e jan be Fwa Esese gaten. Eni a mò e bwe m bwa ángá.”

³⁹ Gè tkukwa gu be efa mo Galili nè no jan Fwa Esese mo Ehwya anga a tswa be àtá chuefǝnm ngge be engǝ́ esera enyonvǝ́m a je a ju be nobǝ.

Yeso matswa ya modwa-ehwyá

⁴⁰ Ende akan, ya modwa-ehwyá, è bwa hò a sen chafya mo Yeso nè bgó ye jan, “Ano o dgyan anga, o bwe a ti m, me e no enachacha.”

⁴¹ Ashi è mbo Yeso tsuruku, gè ywa bu yi ya modwa hon a ju, nè jan, “M dgyan anga, cha ematswam.”

⁴² Kè akan modwa-ehwyá hon gwa ye, ge ben ematswam.

⁴³ Kǝnggwa, kè akan Yeso è du ye efǝ, nè twa ye echa echakpokpo jan,

⁴⁴ “Di jan, we jan mbo nobǝ akan fwa ena ra, tea ken tú chu o a zǝn ekǝ́n. We no mò etinom hon abu edon mo Mosa è jan ángá, ti e tú be nobǝ jan o ben ara ematswam.”

⁴⁵ Tea nobǝ hon è vǝ́ a je nè kwa ara be nobǝ embo fwa ejantum mo mò e bwe ngge ge ángá. Enona, Yeso è cha ye dwa ge e kwashi a tswa be nobǝ embo enggasansan ra. Tea gè no m̀ mbwe chá je mo eten efifi hon a zǝn nobǝ è fwa be ra ángá. Bi adi enó, be nobǝ e vǝ chagwa chagwa nè no bwa anga zǝn ye.