Guyeiti 1 - GALA Daawoo Zɛʋɛi

Sɛʋɛ Mɔungi ( Guyeiti 1—41 ) Undaanɛ ɠitei

¹ Undaanɛ nu ɠa ga naa, nii é la ziɛzu ga faa ɲɔu ɠɛ nuiti ta-lɛnɛ gooi, é la ziɛzu ga kotoba nuiti siɛ ʋelei, é la zeizu ɲɛɛɠulasu nuiti ta-ɓɔkpɔgi ma.

² Kɛlɛ ziima vai ɠa ga Ɠɔoɠɔ GALAGI ná-tɔgi, é ɗa ɠizɛ ná-tɔgi zu, folo ʋɛɛ kpidi ʋa.

³ Kɛɛʋɛ eɠɛ gului nii siingai ziɛlaʋɛ, é gwaai wosu ga gwaa yeeɠɛɠalai, gaalaagi la ʋooloa, nii kpein é kɛɛzu, ta ɗa zoloo.

⁴ É la ɠana ga faa ɲɔu ɠɛ nuiti, ti ɠɛɛʋɛ eɠɛ molo ɠalai fiilɛi liizu la.

⁵ Naa ɠa é ba, faa ɲɔu ɠɛ nuiti ti la losu zɔlɔɔga tukpɔɠaaleʋe voloi. Kotoba nuiti ɓalaa, ti la zeizu zɔlɔɔga telebo nuiti saama.

⁶ Mazɔlɔɔ Ɠɔoɠɔ GALAGI ɠaazu ɠa telebo nuiti ta-ʋelei ʋa. Kɛlɛ kotoba nuiti ta-ʋelei ɠa liizu ga tiye undaaʋiligi zu.