2 Timɔte 1 - GALA Daawoo Zɛʋɛi

Tuʋɔ gooiti

¹ Nɛ̀i gè ga Pɔle, gè ga Yesu Kilista ná-keelai, GALA ziimai maaʋele ma, nɛ̀i tèʋegai ga gè ɗa minazeɠe zɛnvui ma vai laazeeli, de sɔlɔɔsu da-ɠilibalai zu da Yesu Kilista,

² nà è luʋɔsu, Timɔte, dòin è nɛai bɛ̀ gola. Ɠɛɛɠɛ GALA ta de-Maliɠii Yesu Kilista ti zaalai la è ma, ti è maawɔinɠa, ti ziilɛigi ve è ʋɛ.

Mamagi ta iɲɔdɔɔi

³ Nà GALA mamasu, nii gè botii ɠɛɛzu bɛ kisiɛ ʋagɔi zu, eɠɛʋelei mɛ̀mɛwolani ti kɛɛni la bɛ, nà ɗa ɠisiɛ è zu yeenɔpɛ nà-GALA faliiti su, kpidi ʋɛɛ folo ʋa.

⁴ Nà ɗa ɠisiɛ è-ɠaazuɗɛi zu, wɔin ɠa mà gola ga gè è ʋɛtɛ, nii a kɛ zìimaʋɛ laave ga koozunɛɛi.

⁵ Kì ka ɗa-ɠidaaleʋei zu, nii wooveleda la su. È-lee Loyise ta è-leewola Enise ɠa naama ɠidaaleʋei ɠɛni ti ya è luɠɔ. Dàaʋɛ da ga zekana é è ya la ɓalaa.

⁶ Naa ɠa é ba, nà è loozu ɠisu, ga è GALA ná-vebɛanii niinɛ ʋolu, nii è sɔlɔɔni, siɛgi zu gè yeelaani la è ma.

⁷ Mazɔlɔɔ Zɛnvui GALA ge feai de ya, é la de ɠɛɛzu ga ladalala nuiti, kɛlɛ ná-Zɛnvui ɠa zɛbɛi veezu de ʋɛ, ta nɛɛbɛi, naa ʋɛɛ ɠimalai ʋa.

⁸ Naa ɠa é ba, mina unfe ga zeele wooi wo fai Maliɠii ʋɛ. Mina unfe ɓalaa ga ze, nɛ̀i gè ga kasoɠa nui ná-faa zu. Kɛlɛ kɛni è ɗɔnɔ zɔlɔɔ kpɔlɔi zu Woo Niinɛ Ʋagɔi vaa zu, eɠɛʋelei GALA ge ma zɛbɛi veezu la è ya.

⁹ Tɔ ɠa é de ɠizogai, é de loli ga toli ɲadegai, naa maa la zɔlɔɔni ga kɛɛwotiiti maaʋele niiti de ti ɠɛɛni, kɛlɛ tɔɔzei é seini kpasu, é deve ɠana, ná-zaalai zu. É naama zaalai veeni de ʋɛ ga Yesu Kilista maaʋele, kaite aisa wɔlɔwɔlɔi.

¹⁰ Kɛlɛ zaalai naa ɠulaa kɛlɛma niizu de ʋɛ, ga de Ɠizo Nui Yesu Kilista ʋaa vai. É saai ná-zobogi ɠulaai zea, é zɛnvui ta saalalai ɠula kɛlɛma ga Woo Niinɛ Ʋagɔi.

¹¹ GALA ge kàsɔɠiliʋɛ ga gè Woo Niinɛ Ʋagɔi naa laazeeli, gè ɠɛ ga keelai ta kalamɔin.

¹² Naa ɠa é ga nà-kpɔlɔiti ma ungi. Kɛlɛ gè la unfesu ga naa, mazɔlɔɔ gè naa ɠwɛɛ, nii kìdaaleʋeai ma, dàaʋɛ da ga zobogi ɠa bɛ, nii é kalivaai mà, é naa makɛ eyɛsu tukpɔɠaaleʋe voloi.

¹³ Gaama ɓɔɛiti è ti mɛnigai dà, ziɛ ga tiye, kɛ kidaaleʋei ta nɛɛbɛi zu ti zɔlɔɔsu ni nu ɗa ɠilina Yesu Kilista ʋa.

¹⁴ Makɛ kala pagɔiti ma, ti ɠalivaai è ma ga Zɛnvu Ɲadegai maaʋele, nii é zeini ade-yiimaʋɛ.

¹⁵ È suɠwɛɛ ga niiti pɛ ti Azi yooi zu, ti màaɠelesa teʋea, ma un ge daa ma mɛɛ ga Fizɛle ta Ɛlemozɛne.

¹⁶ Maliɠii ná-maawɔinɠai ɠɛ Wonezifɔle ná-pɛlɛyeɠei ʋɛ, mazɔlɔɔ é ɠɛni ìɲɔdɔɔzu yeeɠɛɠala mɔinmɔin su, é la ɠɛni unfeni ga nà-kasoɠa vai,

¹⁷ tɔun siɛgi zu é ʋaani la Wɔlɔme, é gàiziɛni gola, eyɛsu é kà.

¹⁸ Maliɠii va bu, é GALA ná-maawɔinɠai zɔlɔɔ tukpɔɠaaleʋe voloi. È suɠwɛɛ ga pagɔ, botii kpein é kɛɛni bɛ̀ Efɛze taazuʋɛ.