NA SAME 2 - Ai Vola Tabu (Vakadewa Makawa Vakavoutaki 2021)

Na Vosa ni Yalayala ni Kalou Baleta na Nona i Lumuti

¹ A cava era sa daucudru kina na veimatanitu, ka vakananuma na ka wale ko ira na lewe ni veivanua?

² Era sa tuvai valu na tui kei vuravura, a ra sa bose vata ko ira na kena turaga, me ra veivala kei Jiova, kei koya ka lumuta ko koya, a ra kaya,

³ “Tou drutilaka sara na kedrau i vesu, ka biuta tani vei keda na nodrau dali.”

⁴ Ko koya sa tiko mai lomalagi ena dredre; ena vakalialiai ira na Turaga.

⁵ Ena qai vosa vei ira ko koya e na nona cudru, ka vakararawataki ira e na nona cudru katakata, ka kaya,

⁶ “Ia koi au ga, ka'u sa buli koya na noqu tui e na noqu ulunivanua tabu ko Saioni.”

⁷ Au na tukuna nai lesilesi; sa kaya vei au ko Jiova, “Ko iko na luvequ; au sa vakatuburi iko e na siga oqo.

⁸ Kerea mai vei au, ka'u na solia na veimatanitu me nomu i votavota, kei nai yalayala kei vuravura mo taukena.

⁹ Ko na voroki ira e nai titoko kaukamea, ko na vorolaki ira me vaka na bilo nei koya na dautuli kuro.”

¹⁰ Ia mo dou qai vuku oqo, koi kemudou na tui; dou vakatavulici, koi kemudou na turaganilewa kei vuravura.

¹¹ Dou qaravi Jiova e na rere, ka ia vata na reki kei na sautaninini.

¹² Reguca na Luvena, de cudru ko koya, ka dou sa rusa tani mai na sala; ni sa waqawaqa vakalailai ga na nona cudru. Era sa kalougata ko ira kecega sa vakararavi vei koya.