2 Kɔlɛ́ntinu 1 - MAWUXÓWÉMA

Gbedómɛ

¹ Nyɛ Pɔ́lu e nyí mɛsɛ́dó Klísu Jezu tɔn gbɔn jlǒ Mawu tɔn gbla mɛ ɔ́, kpódó nɔví mǐtɔn Timɔtée kpán wɛ ɖo wěma élɔ́ wlán sɛ́ dó agun Mawu tɔn e ɖo Kɔlɛ́nti é, kpódó mɛɖeɖóvo Mawu tɔn e ɖo tokpɔn Akáyi tɔn mɛ lɛ́ɛ bǐ kpán wɛ.

² Mawu Tɔ́ mǐtɔn kpó Aklúnɔ Jezu Klísu kpó ní ná fɛ́nú kpódó fífá kpán mi.

Pɔ́lu dó kú nú Mawu

³ Mi nú mǐ ná kpa Mawu Aklúnɔ mǐtɔn Jezu Klísu sín Tɔ́; Tɔ́ nǔbláwǔkúnúmɛtɔ́ wɛ é nyí, bó nyí Mawu e nɔ dó gbɔ nú mɛ ɖo ali bǐ nu é.

⁴ É nɔ dó gbɔ nú mǐ, ɖo wǔvɛ́ e mǐ nɔ́ mɔ lɛ́ɛ bǐ mɛ, bónú mǐ ná sixú sɔ́ gbɔ e é dó nú mǐ ɖésúnɔ ɔ́ dó dó gbɔ nú mɛ e ɖo wǔvɛ́ tɛnmɛ tɛnmɛ mɔ wɛ lɛ́ɛ.

⁵ Nǔgbó ɔ́, lě e mǐ ji ya gěgé xá Klísu gbɔn ɔ́, mɔ̌ ɖokpó ɔ́ jɛ́n Mawu na dó gbɔ gěgé nú mǐ gbɔn Klísu jí.

⁶ Ényí mǐ ɖo ya ji wɛ ɔ́, è nǎ dó gbɔ nú mi, bó ná hwlɛ́n mi gán wú wɛ; ényí è dǒ gbɔ nú mǐ ɔ́, è nǎ dó gbɔ nú mi wútu wɛ. Gbɔdónúmɛ énɛ́ wɛ ná zɔ́n, bɔ mi ná dɛ ɖo ya ɖokpó ɔ́ e ji wɛ mǐ ɖe lɛ́ɛ nu kpó suúlu kpó.

⁷ Énɛ́ ɔ́, nukún e ɖó mi wɛ mǐ ɖe ɔ́ syɛ́n ɖésú. Đó mǐ tunwun ɖɔ ée wǔvɛ́ e mɔ wɛ mǐ ɖe ɔ́ mɔ wɛ mi lɔ ɖe é ɔ́, gbɔ e è dó nú mǐ ɔ́, è nǎ dó nú mi lɔmɔ̌.

⁸ Nɔví lɛ́ɛ mi, nǔgbó ɔ́, mǐ jlǒ nú mi ní tunwun wǔvɛ́ e mǐ mɔ ɖo tokpɔn Azíi tɔn mɛ é: agban tɔn kpɛn mǐ sɔ mɔ̌, káká bɔ mǐ sɔ́ sixú dɛ ɖ'é nu ǎ; mǐ sɔ́ ɖó nukún lɔ ɖɔ mǐ ná nɔ gbɛ ǎ.

⁹ Mǐ ko vɛdó ɖɔ kúhwɛ wɛ è ɖǒ nú mǐ sín; nǔ nyí mɔ̌, bó ná kplɔ́n mǐ ɖɔ mǐ ní ma nɔ ɖó jiɖiɖe dó mǐ ɖésúnɔ wú ó; lo ɔ́, mǐ ní nɔ ɖó jiɖiɖe dó Mawu e nɔ fɔ́n mɛkúkú lɛ́ɛ ɔ́ kɛ́ɖɛ́ wú.

¹⁰ É wɛ hwlɛ́n mǐ sín afɔkú baɖabaɖa énɛ́ e hɛn ɔ́, é ná dɔn mɛ yi kú ɔ́ mɛ, bó ka ná lɛ́ hwlɛ́n mǐ sín mɛ. Nǔgbó wɛ! Mǐ ɖo nukún ɖó e wɛ ɖɔ é ná lɛ́ hwlɛ́n mǐ sín mɛ;

¹¹ ɖó mi ɖésúnɔ ɔ́, mi ná dó alɔ mǐ ɖo ɖɛ e mi nɔ xo nú mǐ lɛ́ɛ gbla mɛ. Énɛ́ ɔ́, Mawu ná yí ɖɛ e mɛ gěgé nɔ xo dó ta mǐtɔn mɛ lɛ́ɛ é; é ná wa ɖagbe énɛ́ nú mǐ, gbɔn hwlɛ́n e é ná hwlɛ́n mǐ gán ɔ́ gbla mɛ, bɔ mɛ gěgé ná nɔ dó kú n'i ɖó mǐ wú.

Pɔ́lu húzú tito tɔn lɛ́ɛ

¹² Nǔ e wú mǐ hɛn ɔ́, mǐ ná gó ɔ́ ɖíe: ayixa mǐtɔn ná gǎnjɛwú mǐ ɖɔ mǐ zǎn gbɛ mǐtɔn ɖo gbɛ ɔ́ mɛ; ɖo tají ɔ́, mǐ zán gbɛ mǐtɔn ɖo tɛ́ntin mitɔn kpó ayi ɖokpó kpó, kpó nǔgbó e nɔ gosín Mawu gɔ̌n ɔ́ kpó. Nǔ énɛ́ e mǐ ka wa ɔ́, fɛ́nú Mawu tɔn wɛ xlɛ́ ali mǐ; é nyí nǔnywɛ́ gbɛtɔ́ tɔn ǎ.

¹³ Nǔgbó ɔ́, ɖo wěma e mǐ nɔ sɛ́ dó mi lɛ́ɛ mɛ ɔ́, mǐ nɔ wlán nǔ ɖěvo zɛ nǔ e mi nɔ xa ɖ'é mɛ, bó nɔ mɔ nukúnnú jɛ mɛ lɛ́ɛ wú ǎ. Bɔ un ɖo nukún ɖó wɛ ɖɔ mi ná mɔ nukúnnú jɛ nǔ élɔ́ mɛ céɖécéɖé.

¹⁴ Nǔ kpɛɖé kpowun wú jɛ́n mi mɔ nukúnnú jɛ din; é wɛ nyí ɖɔ Aklúnɔ mǐtɔn Jezu sín azǎn gbe ɔ́, mi hɛn ɔ́, mi ná xɔ susu ɖó mǐ wú, lě e mǐ lɔ ná xɔ susu ɖó mi wú gbɔn é.

¹⁵ Un ko ɖeji dó nǔ énɛ́ wú sɔ mɔ̌, bó ko lin ɖ'ayǐ ɖɔ un ná wá mi gɔ́n, bónú Mawu ná wa ɖagbe nú mi ɖó azɔn we jí.

¹⁶ Nǔgbó ɔ́, un ko lin ɖ'ayǐ ɖɔ un ná gbɔn mi gɔ́n, bó ná dín yi Masedwani, bó lɛ́ kɔ ɔ́, un ná lɛ́ wá mɔ mi, bɔ mi ná dó alɔ mì, bɔ un ná dín yi Judée.

¹⁷ Ée un ɖo linlin énɛ́ ɖó wɛ ɔ́, nǔɖé kpowun wa wɛ un ɖe a? Hwenu e un ɖo tito ce lɛ́ɛ to wɛ ɔ́, linlin gbɛtɔ́ tɔn kɛ́ɖɛ́ wɛ un dó to yě ná a? Un ná ɖo gbesisɔ mɛ, bó ná ɖo “ɛɛn” kpó “éeǒ” kpó ɖɔ wɛ zɛ̌ɛ́n wɛ a?

¹⁸ Lě e xó e Mawu ɖɔ lɛ́ɛ ɖě ma nɔ húzú ǎ gbɔn ɔ́, mɔ̌ jɛ́n nǔ e un ɖɔ nú mi ɔ́ ma nyí “ɛɛn” bo lɛ́ nyí “éeǒ” ǎ é nɛ́.

¹⁹ Đó Klísu Jezu, Mawu ví e xó nyɛ kpó Silási kpó, kpódó Timɔtée kpó, ɖɔ nú mi ɔ́ wá, bó ná nyí “ɛɛn”, bó ná lɛ́ nyí “éeǒ” ǎ. É nyɔ́ wa ɔ́, “ɛɛn” Mawu tɔn wɛ é nyí.

²⁰ Nǔgbó ɔ́, é wɛ nyí “ɛɛn” e yí gbe ɖɔ akpá e Mawu dó lɛ́ɛ bǐ nyí nǔgbó é. Hǔn Klísu Jezu jí wɛ mǐ nɔ́ ɖɔ “amǐ” mǐtɔn gbɔn, bó ná dó kpa susu nú Mawu.

²¹ Bɔ Mawu ɖésúnɔ wɛ nɔ ná lǐnsyɛ́nsyɛ́n mǐ kpó mi kpó ɖo gbɛ e mǐ nɔ́ zán ɖo Klísu mɛ é mɛ. Mawu ɖésúnɔ wɛ ɖe mǐ ɖó vo.

²² É wɛ sɔ́ nyǐkɔ tɔn dó ɖó wuntun mǐ, bó kɔn Yɛsinsɛn dó ayi mǐtɔn mɛ; é wɛ ná gǎnjɛwú mǐ ɖɔ mǐ ná mɔ ɖagbe e é sɔ́ ɖ'ayǐ nú mǐ lɛ́ɛ yí.

²³ Mawu ná ɖe kúnnu nú mì; ényí nǔvú ɖó wɛ un ɖe hǔn, ma kú. Un jló ná gba ayi dó nú mi ǎ wútu wɛ un ma lɛ́ kɔ wá Kɔlɛ́nti ǎ.

²⁴ Mǐ ba ná ɖɔ nú mi ɖɔ nǔ lě wɛ mi ɖó ná ɖi nǔ ná dandan ǎ, ɖó mi ko lí dǒ ɖo nǔɖiɖi mɛ; lo ɔ́, mǐ jló ná wa azɔ̌ xá mi nú nyɔ̌ná mitɔn.