2 Iwhe e meru l'oge ndu eze 1 - BAYỊBURU Ẹzaa

Sólomọnu l'aryọ mmamagụ

¹ Sólomọnu, bụ nwa Dévidi bya akpọo onwiya g'ọo abara l'alị-eze iya. Onye-Nwe-Ọha, bụ Chileke iya swiru iya ọkpobe eswiru, bya emee ya ọ bụru oke amadụ.

² Sólomọnu bya ekfuru yeru ndu Ízurẹlu l'owhu. Ndu o kfuru yeru bụ ndu ishi, l'achị ndu ojọgu, dụ ụnu labọ l'ụkporo iri mẹe ndu ishi, l'achị ndu ojọgu, dụ ụkporo ise mẹe ndu ikpe mẹe iwhe bụ ndu ishi ndu Ízurẹlu gẹ whẹ ha, mbụ ndu bụ ishi l'ibe nna whẹ.

³ Sólomọnu yẹle edzudzu-ọha Ízurẹlu tụgbua jeshia l'ẹka, l'aagwajẹ iwhe dụ lẹ mkpụkpu Gibyiyọnu. Nkele ọo l'ẹka ono bẹ Ụlo-ẹkwa-ndzuko nke Chileke dụ, mbụ ono, Mósisu, bụ onye ozhi Onye-Nwe-Ọha mejeru l'echi-ẹgu.

⁴ Dévidi bẹ patawarụ igbe-ọgbandzu Chileke lẹ mkpụkpu Kiriyatu-jeyarimu bya edobe lẹ nwọru ẹka o metaru iya; o noo l'ọ kpọberu iya ụlo-ẹkwa lẹ Jerúsalẹmu.

⁵ Ọle ẹnya-mgbẹja ono, o meru l'ope, mbụ Bezalẹlu bẹ dụ lẹ Gibyiyọnu l'ẹka ono; l'iwhu mkpuumkpu Onye-Nwe-Ọha. Bezalẹlu bụ nwa Uri; Uri bụru nwa Họru. Sólomọnu yẹle edzudzu-ọha ono chọlahaa Onye-Nwe-Ọha l'ẹka ono.

⁶ Sólomọnu nyihu l'eli ẹnya-mgbẹja ono, e meru l'ope, mbụ l'iwhu Ụlo-ẹkwa ndzuko; je egbua anụ, dụ ụnu labọ l'ụkporo iri gude gbaarụ Onye-Nwe-Ọha ẹja ọkpokota-iwhe-ọku.

⁷ O rwua l'ẹnyashi; Onye-Nwe-Ọha byakfuta Sólomọnu bya asụ iya: “Ryọo mu iwhe ị chọru tẹ mu nụ ghu.”

⁸ Sólomọnu sụ Chileke: “I goshiwaru l'i yeru Dévidi, bụ nna mu obu shii; bya emewa tẹ mu bụru eze l'ọzori iya.

⁹ Byiko Onye-Nwe-Ọha, bụ Chileke; t'ụkwa ono, i kweru nna mu Dévidi medzukota nụ. Nkele i mewaru tẹ mu bụru eze ikpoto ndu ha g'ọo ẹja, dụ l'alị.

¹⁰ Nụnu mu mmamagụ mẹe ọkwa-ẹnya, mu l'e-gude eje eje alwa alwa l'iwhu ndu-a, o noo nkele ọ tọ dụdu onye sụru gẹ l'ọo-chịkota ndibe ghu-a, parụ ẹka ẹgube-ẹ.”

¹¹ Chileke yeeru Sólomọnu ọnu sụ: “Eshi-ọwhu ọ bụ iwhe ono bẹ dụ ghu l'obu. T'ị sụ t'a nụ ghu ẹku l'ụba mẹe t'a nụ ghu ugvu; t'ị sụ tẹ ndu ị dụ ashị nwụshihu; t'ị sụnu m'ọo t'a nụ ghu ndzụ ogologo; gbahaa t'a nụ ghu mmamagụ yẹle ọkwa-ẹnya, l'ii-gude achị ndibe mu ono, mu meru t'ị bụru eze whẹ ono;

¹² Ọ kwa iya bụ lẹ mu l'a-nụ ghu mmamagụ mẹe ọkwa-ẹnya. Mu anụkwa ghu whọ ẹku l'ụba mẹe ugvu, l'adụa onye eze nwejeru iya nụ lẹ ndu vu ghu ụzo; tọ dụ onye eze bya l'e-nwe iya lẹ ndu ọwhu l'etso ghu etso.”

¹³ Ọo ya bụ, Sólomọnu bya eshi l'ẹka ono, l'aagwajẹ iwhe lẹ Gibyiyọnu ono nyizeta, mbụ l'iwhu Ụlo-ẹkwa ndzuko ono. Ọ lashia Jerúsalẹmu. Ọ bụru eze ndu Ízurẹlu.

Ẹku Sólomọnu

¹⁴ Sólomọnu dokoberu onwiya ụgbo-ịnya mẹe ndu l'agba ịnya. O nweru ụnu ụgbo-ịnya ugbo ẹto l'ụkporo iri mẹe ụkporo ụnu ndu l'agba ịnya l'ụnu iri. Ndu bẹ eze harụ dobe lẹ mkpụkpu, l'eedobeje ụgbo-ịnya, dobe ụwhodu lẹ Jerúsalẹmu swibe onwiya.

¹⁵ Eze bẹ meru tẹ mkpọla-ọcha kụru g'ọo ẹwhuru lẹ Jerúsalẹmu, mee t'oshi sida dzuru ẹka lile g'ọo oshi sịkamo, tụkoru alị ọkpa-ugvu, dụ l'ụzo ẹnyanwu-arịba nata.

¹⁶ Ọo l'alị Íjiputu yẹle alị Kuwe b'e shi anmajẹru Sólomọnu ịnya. Ọ bụru ndu l'agbarụ eze nghọ shi ejeje alị Kuwe je akfụa aswa iya nmata iya.

¹⁷ Aswa, whẹ shi akfụje gude zụa ụgbo-ịnya lẹ Íjiputu bẹ bụ mkpọla-ọcha, dụ ụnu shẹkelu l'ụkporo shẹkelu ugbo iri. Ịnya bẹ whẹ shi anmajẹ ụkporo shẹkelu mkpọla-ọcha ugbo ẹsaa lẹ shẹkelu iri. Ọ bụru l'ẹka whẹ bẹ ndu eze ndu Hetu mẹe ndu eze ndu Arámu shi eshije enweta iya.