LUKA 1 - EBAIBO INZIENUKHU

¹ Abandu abenji bateemakhwo akabanyala okhuhandika amang'ana ake ebindu ebiali okhukholwa mwifwe.

² Bahandika aka khwabool'lwa nende yabo abalola ebindu yibi okhurula mukhuchiaka ma nibalandia amang'ana kene yaka.

³ Ma nase ndutsi, owoluyali Tseofilo, mbu nobulahi khuhandichile amang'ana yaka inyuma wokhuhengelesia mubweyinikhu okhurula mukhuchiaka.

⁴ Kholanga mbwo khe ibe omanye akatooto kosi akawechibwa.

Okhwibulwa khwa Yohana Omubaputisi khwalandibwa

⁵ Mumatukhu ka Herode yali omuruchi we Ebuyahudi, yaliho omwesaalisi owalangwa Sakaria, owalinji owomukanda kwa abesaalisi okwali hasi wa Abiya. Omukhasi uwe yalangwanga Elisabeti, owomubakhana ba Haruni.

⁶ Bombi bamenyanga obulahi imbeli wa Nyasaye ma balondanga amalako nende emilukha chio Mwami sila esikha.

⁷ Sibaalikhwo nende abaana tawe sichila Elisabeti yali omukumba, ma khandi bombi bali nibakhunguha okhusila.

⁸ Litukhu elala Sakaria yali narumikhilanga Omwami uwe mu Hekalu, mumukhosi kwobulindi bubwe.

⁹ Okhulondokhana nende esimo siobwesaalisi yelwa okhubir'ra khumbulu okhusamba obwali khulusambwa. Ma natsia mu Hekalu yo Mwami,

¹⁰ ne omukanda kwabandu kwali esioba nikusaayanga khunyinga eyobwali bwasambwa.

¹¹ Om'malaika wo Mwami yalolekha khuye nasinjiye khulubeka lwomukhono omulunji okwolusambwa lwokhusambilakhwo obwali.

¹² Olwa Sakaria yamulola, nahumania ma naria.

¹³ Nebutswa om'malaika namubool'la, “Sakaria, oraria tawe! Nyasaye uhuliye okhusaaya khwo, ne omukhasiwo Elisabeti yakhakhwibul'le omwana omusiani. Wakhamukulikhe eliiralie Yohana.

¹⁴ Wakhabe nobusangali nende obuyanzi, khandi abenji bakhasangale olwa yakhebulwe!

¹⁵ Yakhabe omundu omukhongo mumoni mwo Mwami. Arakhanywakhwo ewaini nohomba esiokhunywa sindi esilulu tawe. Yakhetsule nende Omwoyo Omutsienukhu okhurula khukhwibulwakhwe.

¹⁶ Yakhakalusie abandu ba Isiraeli abenji khu Mwami Nyasaye wabwe.

¹⁷ Yakharanjil'le okhutsia imbeli wo Mwami mutsingufu nende obunyali bwa Elija. Yakhaleere abapapa nende abaana halala, yakhasukhanie abandu besikala marwi khunjila eyo khupaala khwabalunji, yakharechekhele Omwami abandu.”

¹⁸ Sakaria nabool'la om'malaika, “Ndakhamanya mbwena yaka kali mbwo? Ise ndi omusakhulu khandi omukhasi wanje nomusiele.”

¹⁹ Om'malaika nakalusia naboola, “Ise nise Gaburieli, sinjilanga imbeli wa Nyasaye ourumile okhwitsa okhul'loma n'nawe, nende okhukhuler'ra amang'ana amalahi yaka.

²⁰ Nebutswa siosubiye oburume bwanje tawe, khulwe yako olasiluhala, nobule okhul'loma okhwola khwitukhu elia akakhusubisisie kaliekhola.”

²¹ Ne abandu bali nibalindil'langa Sakaria, nibahukanga busina nasisil'la oluhono mu Hekalu.

²² Olwa yarulamwo siyaali onyala okhul'loma khubo tawe, ma nibamanya mbu uluutsi obusukhi mu Hekalu. Yabasimila butswa namakhono sichila siyali onyala okhul'loma tawe.

²³ Olwa amatukhu kaake akokhurumikha mu Hekalu kahwa yatsia ingowe.

²⁴ Olweinyumakhwo omukhasiwe Elisabeti yabelekha, ne niyebisa munyumba khulwe emiesi chirano naboola,

²⁵ “Leelo Omwami ukhonyele, umbinichisisie es'simbamurwe sianje mubandu.”

Okhwibulwa khwa Yesu khwalandibwa

²⁶ Mumwesi kwakhasasaba okhurula Elisabeti nabelekha, Nyasaye yaruma om'malaika Gaburieli mwitaala lia Galilaya elialangwa Nasareti.

²⁷ Yali noburume khumukhaana owali niyahambwa nende omundu owalangwa mbu Yosefu, owali owolwibulolwomuruchi Daudi. Eliira liomukhaana tsana liali Mariamu.

²⁸ Om'malaika yetsa khuye naboola, “Omulembe kube khwibe! Nyasaye ukhubeeleye esirenda, Omwami ali n'nawe ma oli neikhabi.”

²⁹ Mariamu yanyakhana mumakani khuburume bwom'malaika ma nahuka esifune siamang'ana yaka.

³⁰ Om'malaika nabool'la Mariamu, “Oraria tawe. Unyooye esirenda khu Nyasaye.

³¹ Nobelekhe inda, ma wakhebule omwana omusiani, ne wakhamukulikhe eliiralie Yesu.

³² Yakhabe omukhongo ma yakhalangwe Omwana wa Nyasaye Oweikulu Okhusila. Omwami yakhamukhole okhuba omuruchi, singa Daudi kuka nyene yali,

³³ ne yakhabe omuruchi khubandu ba Isiraeli inziaiyo, obwamibwe sibulihwa tawe.”

³⁴ Mariamu nabool'la om'malaika, “Ise sili okhubakhwo nende omusaatsa wosi tawe. Khe yaka kakhekhola mbwena?”

³⁵ Om'malaika nakalusia, “Omwoyo Omutsienukhu alikhwitsila, ne obunyali bwa Nyasaye bwakhabe khuibe. Khulwe yako omwana omutsienukhu wolibula yakhalangwe Omwana wa Nyasaye.

³⁶ Ne lola, Elisabeti omwikhowo naye wabelekha ali neinda eyemiesi chisasaba mubusiele bubwe, kata nikali walangwa omukumba.

³⁷ Okhuba libulaho ling'ana liosi elia Nyasaye arakhakhola.”

³⁸ Mariamu naboola, “Ise ndi omurumikhili wo Mwami, kekhole khwise singa obooye.” Ma om'malaika namulekha, natsia.

Mariamu Yatsia Okhukonya Elisabeti

³⁹ Inyuma khwo hatititi Mariamu yarula natsia mayuchila mwitaala liomubikulu elie Buyahudi.

⁴⁰ Niyenjila munyumba ya Sakaria ma nasiesia Elisabeti.

⁴¹ Olwa Elisabeti yahul'la amasiesi ka Mariamu, omwana yerunda munda mumwe. Omwoyo Omutsienukhu yetsula mu Elisabeti,

⁴² nahanzukha butinyu naboola, “Ibe oli neikhabi ingali mubakhasi bosi, khandi omwana owawakhebule noweikhabi.

⁴³ Busina ling'ana likali yili liekhole khwise, mbu nyina Omwami wanje witsile okhungonya?

⁴⁴ Okhuba olwambuliye butswa amasiesi kako, omwana yerun'nde munda mwanje khulwo obusangali.

⁴⁵ Oli neikhabi okhusubila mbu yako ako Mwami yakhubooleye kaliekhola.”

Olwembo lwa Mariamu lwokhwitsomia

⁴⁶ Mariamu naboola, “Omwoyo kwanje kwitsoomianga Omwami

⁴⁷ Ne omwoyo kwanje kusangaliiye Nyasaye omuhoni wanje,

⁴⁸ Okhuba unzitsuliiye ise omurumikhili uwe omutu! Okhurula leelo abandu nabanangenge oweikhabi,

⁴⁹ khulwa amang'ana amakali aka Nyasaye wobunyali yakholeye. Eliira lilie nelitsienukhu;

⁵⁰ Tsimbabasi tsitsie tsili khu yabo abamuhetsanga oluyali, Khumasuuba na masuuba.

⁵¹ Unyiil'le omukhono kukwe ma usasisie abeinjinia halala nende obuloosie bwabwe.

⁵² Uhiinisie abaami khutsiruba tsiabwe ma uchingul'le aba hasi.

⁵³ Abe inzala ubekusisie nebindu ebilahi, ne abahinda ubatabisie namakhono amakhaya.

⁵⁴ Ukhonyele omurumikhiliwe Isiraeli singa obwa yalaka abakuka befwe.

⁵⁵ Witsuliye okhumanyia Aburahamu nende olwibulolwe tsimbabasi inziaiyo.”

⁵⁶ Mariamu yamenya nende Elisabeti singa emiesi chitaru ma nakalukha ingo.

Okhwibulwa khwa Yohana Omubaputisi

⁵⁷ Amatukhu ka Elisabeti okhwibula koola, niyebula omwana omusiani.

⁵⁸ Abamenyani baabe nende abekho bahul'la obwo Mwami yali omulahi khuye, ma bosi nibasangala halala n'naye.

⁵⁹ Khwitukhu liamunane betsa okhuseba omwana, ne bali nibenyanga okhumukulikha Sakaria eliira lia samwana.

⁶⁰ Nebutswa nyina naboola “Tawe. Eliira lilie lienyekhanga libe Yohana.”

⁶¹ Nibamubool'la, “Mubekho benywe sialikhwoho olangwanga eliira yili tawe.”

⁶² Ma nibasima samwana, nibenya okhumanya eliira liayenya omwana akulikhwe.

⁶³ Sakaria nasaba liseleti liokhuhandika khwo ma nahandika, “Eliira lilie ni Yohana.” Bosi nibachenya.

⁶⁴ Olwene yilwo ne Sakaria nachiaka okhul'loma khandi, ma nachiaka okhwitsomia Nyasaye.

⁶⁵ Oburi bwahamba abarende babwe bosi, ne amang'ana yaka kalanda hosi mubikulu bie Buyahudi.

⁶⁶ Bosi abakahulila bakapaalakhwo mumioyo chiabwe, nibaboola, “Omwana uno yakhabe owambila sina?” Okhuba kalolekha kol'lani mbu obunyali bwo Mwami bwali khuye.

Oburoobi bwa Sakaria

⁶⁷ Sakaria, samwana Yohana yetsula no Mwoyo Omutsienukhu, naroba naboola,

⁶⁸ “Yetsoomibwe Omwami, Nyasaye wa Baisiraeli Witsile okhukhonya abandube ma ubakhol'le abalakhule.

⁶⁹ Ukhunyooleye omuhoni omukufu, owomunyumba ya Daudi omurumikhiliwe.

⁷⁰ Yalaka khale okhubir'ra mubaroobi baabe abatsienukhu

⁷¹ mbu yakhakhuhonia khubasuku befwe, okhurula mubunyalibwe yabo abakhubihil'lwanga.

⁷² Yaboola yakhabeele abakuka befwe tsimbabasi nende okhwitsul'la Indakano ye inzienukhu.

⁷³ Yesuha esiesuho khukuka wefwe Aburahamu

⁷⁴ nalaka okhukhusoola khubasuku befwe ma khumurumikhile sila oburi.

⁷⁵ Kho khube abatsienukhu khandi abalunji imbeli we amatukhu kosi akobulamu bwefwe.

⁷⁶ “Nawe, omwana wanje, wakhalangwe omuroobi wa Nyasaye Weikulu okhusila. Wakharanjil'le Omwami okhumulombela injila,

⁷⁷ okhubool'la abandube mbu bakhahonibwe nibalekhelwa tsimbi tsiabwe.

⁷⁸ Nyasaye wefwe nowetsimbabasi, yakhachile omukamba omulahi okwobuhoni kulakhusiele ifwe

⁷⁹ ma kulakhwakhile okhurula mwikulu yabo bosi abamenyanga musiilima siokhufwa, kukhwemel'le ebilenje biefwe munjila yomulembe.”

⁸⁰ Omwana yakhula, nakufuhala mumwoyo. Yamenya musitsiimi okhwola litukhu elia yalolekha habulafu khubandu ba Isiraeli.