એફેસીઓ પત્રો 1 - દુબલી નવો કરાર

નમસ્કાર

¹ આંય પાઉલ, પરમેહેરુહુ ઈચ્છાકી ઇસુ ખ્રિસ્તુ પસંદ કેલો ચેલો હાય, આને આંય ઓ પત્ર એફેસ્સ શેહેરુમે રેનારા પવિત્ર આને ઇસુ ખ્રિસ્તુપે વિશ્વાસ કેનારા લોકુહુને લેખી રીયોહો.

² આમા બાહકો પરમેહેરુ આને પ્રભુ ઇસુ ખ્રિસ્તુ વેલેને તુમનેહે શાંતિ મિલતી રેઅ.

ખ્રિસ્તુમે આત્મિક આશીર્વાદ

³ આપુ પ્રભુ ઇસુ ખ્રિસ્તુ બાહકા પરમેહેરુ ધન્યવાદ વેઅ, કા તીયાહા ખ્રિસ્તુ આરી એકતામે રાંઅ લીદે હોરગા દરેક પ્રકારુ આશીર્વાદ આપ્યોહો.

⁴ તીયાહા આપનેહે જગત બોનાવા શુરુવાતુમેનેજ પસંદ કી લેદાહા, કા આપુહુ તીયા હુંબુર પવિત્ર આને નિર્દોષ રીઅ સેક્જી.

⁵ પરમેહેર આપનેહે પ્રેમ કેહે ઈયા ખાતુરે તીયાહા ખુબુજ પેલ્લા ઇ નક્કી કી લેદલો, કા તોઅ આપનેહે ઇસુ ખ્રિસ્તુ મારફતે પોતા પોયરા રુપુમે ગોદ લીઅ, પરમેહેરુહુ એહેકી પોતા હારી ઈચ્છાકી આને આનંદુકી કેયોહો.

⁶ કા પરમેહેરુ કૃપા વાહ-વાહી વેઅ, તે કૃપા આપનેહે તીયા મેરાલા એકુ-એક પોયરા ઇસુ ખ્રિસ્તુ મારફતે મીલીહી.

⁷ આપનેહે પરમેહેરુહુ ખુબુજ કૃપા અનુસાર ખ્રિસ્તુમે તીયા રોગુતુ બલિદાનુ મારફતે છુટકારો એટલે પાપુમેને માફી મીલીહી.

⁸ તીયાહા પોતા પુરા જ્ઞાન આને હોમજુકી આપુપે બહુતાયુકી કૃપા કેયોહો.

⁹ કાહાકા ખ્રિસ્તુહુ પોતા યોજના ભેદ તીયા હારા ઇરાદા અનુસાર આપનેહે આખ્યો, જીયાલે તીયાહા પોતા મનુમે નક્કી કી લેદો.

¹⁰ જાંહા પરમેહેરુ ઈયુ ગુપ્ત યોજના પુરો વેરુલો સમય આવી, તા પરમેહેર હોરગા આને તોરતી બાદી વસ્તુહુને ઇસુ ખ્રિસ્તુ આધિનુમે કી દી.

¹¹ પરમેહેરુહુ આપુ યહુદીહીને બી ઇસુ ખ્રિસ્તુ આરી આપુ સંબંધુ લીદે પોતા લોક વેરા ખાતુરે પસંદ કેયાહા. કાહાકા એ શરુવાતુમેનેજ તીયા યોજના આથી.

¹² તીયાહા એહેકી ઈયા ખાતુરે કેયો, કા આમુહુ યહુદી જાતિ વાલા, જે ખ્રિસ્તુપે આશા રાખનારા લોક આથા, પરમેહેરુ મહાનતા તાંહા કા આપુહુ જીયા પોતામે ખ્રિસ્તુપે આશા રાખલી આથી તીયા મહિમા સ્તુતિ કારણ વેઅ.

¹³ આને તુમા આરી બી એહકીજ વીયો, જાંહા તુમુહુ સત્ય સુવાર્તા, એટલે ઉદ્ધાર આપનારી હારી સુવાર્તા, તાંહા તુમુહુ ખ્રિસ્તુપે વિશ્વાસ કેયો, આને પરમેહેરુહુ પોતે કેલા વાયદા અનુસાર પવિત્રઆત્મા આપીને, તુમાપે હક્કુ મોહર લાગવી દેદી.

¹⁴ પવિત્રઆત્મા ઈયુ ગોઠી ગેરેંટી આપેહે કા પરમેહેરુ વારીસ આપુ હાય, જીયા તીયાહા વાયદો કેલો. આને ઇ બી કા તીયાહા આપનેહે પોતા લોકુ રુપુમે છુટકારા મારફતે ખરીદી લેદાહા, તીયાહા એહેકી કેયો ઈયા ખાતુરે આપુ પરમેહેરુ મહિમા કેજી.

પાઉલુ પ્રાર્થના

¹⁵ કાહાકા તીયા બાદા લીદે જો પરમેહેરુહુ કેયોહો, જાંહા માયુહુ પ્રભુ ઇસુપે તુમા વિશ્વાસ આને પરમેહેરુ બાદા લોકુ આરી તુમા પ્રેમુ વિશે ઉનાયોહો.

¹⁶ આંય સાદા તુમા માટે પરમેહેરુ ધન્યવાદ કીહુ, જાંહા બી આંય પ્રાર્થના કીહુ તા પ્રાર્થનામે તુમનેહે યાદ કીહુ.

¹⁷ આને આંય એ પ્રાર્થના કીહુ કા આપુ પ્રભુ ઇસુ ખ્રિસ્તુ બાહકો જો મહિમામય હાય, તુમનેહે આત્મિક જ્ઞાન આને સમજ આપે, જીયાકી તુમુહુ આજી બી વાદારે પરમેહેરુલે હોમજી સેકા.

¹⁸ આંય એ બી પ્રાર્થના કીહુ કા સત્યલે હોમજામે તોઅ તુમનેહે મદદ કેરી, કા તુમુહુ જાંયલ્યા તુમનેહે હાદા આરી તીયા કાય આશા હાય, આને તીયા ભકતુ આરી તુમનેહે જે વિરાસત મીલીહી, તોઅ કોતો મહિમામય હાય.

^19-20 આને આપુહુ ખ્રિસ્તુપે વિશ્વાસ કેનારામે કામ કેનારો સામર્થ્ય કોતો મહાન હાય, ઇ તુમુહુ જાંય સેકા. જીયા સામર્થ્યકી પરમેહેરુહુ ઇસુ ખ્રિસ્તુલે મોલામેને ફાચો જીવતો કેયો, આને હોરગામે પોતા હુદીવેલ આને આદરુ જાગાપે બોહાવ્યોહો.

²¹ તોઅ હોરગામે રાજ્ય કેનારો આને અધિકારીહીપે, આને બાદા પ્રકારુ સામર્થ્ય, આને બાદા જે પ્રભુ આખાતાહા તીયાપે, આને ઈયા જગતુ મોડા અધિકારી ઉપે આને ખાલી ઈયા જગતુમે ઓતોજ નાય, પેન ભવિષ્યમે આવનારા જગતુપે બી રાજ્ય કેરી.

²² પરમેહેરુહુ મતલબ બાદોજ ઇસુ ખ્રિસ્તુ અધિકારુમે કી દેદોહો, આને તીયાલે પરમેહેરુહુ બાદા વિશ્વાસ કેનારાપે મંડળી આગેવાનુ રુપુમે નિયુક્ત કી દેદોહો.

²³ આને મંડળી ખ્રિસ્તુ શરીર હાય, આને ખ્રિસ્ત શરીરુ મુનકો હાય, આને મંડળી ખ્રિસ્તુ મારફતેજ પોરાલી હાય, જો દરેક વસ્તુહુને પોતા ઉપસ્થિતિ કી પોય દેહે.