Márkus 1 - Dii New Testament

Yoohá̧na ı̵́ mam Tayɨɨ wooné pa moo Tayɨɨ

¹ Moo to̧o̧ 'maŋ yúú Yesu Krístu Waa Tayɨɨ woolı̵́ dəŋ yɛlı̵́.

² Vu̵ bíńda moo Tayɨɨ woo debtere anábi Esáya woolı̵́, o̧ ná': “Míń ba' waa ba'ad míí la tíŋ́ móólȩ́. Wú̵ńnɔ mbɔ́gɔm hi̧naa.

³ Yɛ́g nánán tóó woo kiy hó̧g kȩŋŋı̵́, o̧: ‘I mbɔ́g hi̧naa ı̵́ 'yɛ́lı̵́ woo ú̵; i zȩȩ hi̧naa waa woo vu̵ u̵u̵ man kííd.’ ”

⁴ Anábi tóó ká du̵u̵lı̵́, yéé woo Yoohá̧na. Dɨd nán vu̵ mam Tayɨɨ wooné hó̧g kȩŋŋı̵́, baa pa moo, o̧: “I gbɔ mbaalı̵́ see víí vu̵, i woo mam Tayɨɨ tée, Tayɨɨ wú̵ń kéé hȩn ɓı̵́d kɔ́lı̵́ víí vu̵ gbɔ la.”

⁵ Nán hág Yúúdalı̵́ vu̵, kan nán kaa Yerúsalemmé vu̵ ɓu̵u̵lı̵́ na'a, vu̵ laa woolı̵́, vu̵ vud hȩn ɓı̵́d kɔ́lı̵́ voo vu̵ o̧. Yoohá̧na woo vu̵ mam Tayɨɨ ziŋ Yu̵ŕdɛnné.

⁶ Yoohá̧na ká dɔ́ sa̧a̧m gu̵d ŋgelobaɨ, ta kandá kó̧ó̧ yu̵u̵né gə́ńsə́ŋ́ŋı̵́, baa lá sig vu̵ kan naam.

⁷ Baa pa moo, o̧: “Nán tóó wú̵ń yaa pig míílí̧ dɨlı̵́, wu̵ mban néélȩ́. Mí maan bin nə'əyn buun zaŋ tɛ́gɛ́ woo né á̧ḿ.

⁸ Ɨ́ míí, mí woo ví mam Tayɨɨ kan mamme, a̧máa ı̵́ woo, wú̵ń woo ví kan yigid Tayɨɨ woo nɔ.”

Yesu woo mam Tayɨɨ; Seeɗán zo"u̵ á̧ḿ

⁹ Sey woo Yesu lúú ya kaa Naazaréddı̵́, hág Gáliléelı̵́. Yoohá̧na woowu̵ mam Tayɨɨ ziŋ Yu̵ŕdɛnné.

¹⁰ Sey Yesu ka dɨ dɔg vúnní mammé máa, ho̧ be' tú̵'ú̵, yigid Tayɨɨ woo sí zu̵u̵ yúú woolı̵́ kɔ́ ı̵́ gbɔkii wɔgɔ.

¹¹ Yɛ́g tóó kiy zu̵u̵ be"ı̵́, o̧: “Móo Waa hí̧í̧lí̧ míí, zó̧ó̧ míí dȩ' yúú móólȩ́.”

¹² Pig Yesu ka woo mam Tayɨɨ máa, yigid Tayɨɨ woo ndaawu̵ laan hó̧g kȩŋŋı̵́ há̧ná,

¹³ səə wu̵lı̵́ bá' vo' ndaddú̵, Seeɗán baa zo"u̵. Yesu mbaa kan pú̵g vu̵ wu̵lı̵́, maleeka vu̵ baa kɔ́ddu̵ ba'ad.

Yesu bee nán ze' ma"ȩ́ vu̵ ndaddú̵

¹⁴ Ku̵u̵ ma' Yoohá̧na ı̵́ mam Tayɨɨ wooné máa, Yesu daa lúú laa hág Gáliléelı̵́, pa moo to̧o̧ 'maŋ Tayɨɨ woo wu̵lı̵́.

¹⁵ Baa o̧: “Bá' ya̧ sú̵'ú̵, gbaŋ waalı̵́ Tayɨɨ woo dɨ bə́'. I gbɔ mbaalı̵́ see víí vu̵ la ú̵, ví fȩȩ moo to̧o̧ 'maŋŋɨ.”

¹⁶ Yesu ka dɨ daa 'yȩ́mné ya̧g mam Gáliléelı̵́ máa, ho̧ Simɔ́ŋ vu̵ kan daa sá̧ŋ́ A̧ndɛrée, vu̵ dɨ kȩgȩ tú̵ú̵lı̵́ mammé, moo ká vu̵ nán ze' ma"ȩ́ȩ.

¹⁷ Yesu o̧d vu̵: “I duunɔ́, míń 'yɛ́ ví ı̵́ nánán vu̵ beelı̵́ɨ.”

¹⁸ Sey woo vaŋná vu̵ kéé kȩgȩ voo vu̵ gbɔ, vu̵ dugu.

¹⁹ Yesu ka duu laa tíŋ́ waaná' máa, ho̧ Zebedée waa Yaakúbu vu̵ kan daa sá̧ŋ́ Yoohá̧na, vu̵ dɨ kȩgȩ voo mbɔ́ggı̵́ nɛ́ŋ́ŋı̵́.

²⁰ Ma Yesu bee vu̵, vu̵ gbɔ ba' voo Zebedée nɛ́ŋ́ŋı̵́ kan nán ba'ad vu̵, vu̵ dugu.

Nán tóó yigid ɓı̵́d ká kɔ́gɔ ú̵

²¹ Yesu daa laa kaa Kapɛrnáhu̧mmé, kan waa duulí woo vu̵. Zá̧ga̧ asawəlı̵́ máa, Yesu dɔ́ la lig sú̵ggı̵́ nán Yúúda voolı̵́, bé' moo Tayɨɨ tú"í wu̵lı̵́.

²² Moo tú"í woo la' nán vu̵ la fid, moo baa tú'ud vu̵ moo kɔ́ ı̵́ nán gbo̧o̧ tóó wɔgɔ. Moo tú"í woo man kan ı̵́ nán moo Tayɨɨ tú"í voo vu̵ né.

²³ Nán tóó yigid ɓı̵́d ká kɔ́gɔ máa, dɔ́ lig sú̵ggı̵́ voolı̵́, moo dɔg moo yúba,

²⁴ o̧: “Yesu nán Naazaréd, moo móó kan vɔ́ máa ȩná? Mɔ́ yaa vɔ́ tunnáa? Mí gaamɔ́, mɔ́ nán gbo̧o̧ Tayɨɨ ka ba' ya má nɔ.”

²⁵ Ma Yesu sée yigid ɓı̵́d yȩ, o̧ddu̵: “Mbaa simná, vúd la nán yȩ woolı̵́.”

²⁶ Ma yigid ɓı̵́d kɔ́gɔ, tu̵u̵, vúd nán pee woolı̵́ kan wa̧ya̧g gbo̧o̧ ba'a.

²⁷ Nán sú̵ggı̵́ ku̵u̵ ki máa, vu̵ mbaa ɗii ya voo 'waapád, há̧á̧ vu̵ víń ya voolı̵́, vu̵ o̧: “Hȩn ı̵́ yo̧go̧ máa, ȩná? Moo tú"í 'maŋ tóó ı̵́ ka mba hȩn má nɔ. Nán yɛ pi̧i̧ yigid ɓı̵́d vu̵, vu̵ kiddu̵ tɔ́g á̧ḿ.”

²⁸ Yɛ́g Yesu woo kiy vaŋná ya 'waapád hág Gáliléelı̵́.

Yesu za̧a̧ nán ho̧o̧ vu̵ ɓu̵u̵lı̵́ na'a

²⁹ Sey Yesu ku̵u̵ vúd lig sú̵ggı̵́ nán Yúúda voolı̵́ máa, vaŋná vu̵ daa dɔ́ la kíi Simɔ́ŋ pee woolı̵́ kan A̧ndɛrée. Vu̵ laa kan Yaakúbu kan Yoohá̧na pee vu̵ á̧ḿ.

³⁰ Simɔ́ŋ a̧a̧ fa̧a̧ ká ud ho̧o̧ fó̧ó̧ píím, vaŋná vu̵ o̧d Yesu moo woo.

³¹ Yesu ka ki máa, séé la ma"o̧ nagá, luu dɔg. Ho̧o̧ ka̧"o̧, daa kɔ́d vu̵ ba'ad.

³² Mɛnné, zá̧ga̧ ka dɔ́ sú̵'ú̵ máa, nán vu̵ pa̧ŋ nán ho̧o̧ vu̵ 'waapád yaan Yesu woolı̵́, kan nán yigid ɓı̵́d ká kɔ́ vu̵ máa á̧ḿ.

³³ Nán kaa vu̵ sú̵g ya̧gníimí ɓu̵u̵lı̵́ na'a.

³⁴ Yesu za̧a̧ nán ho̧o̧ vu̵ wu̵lı̵́ ɓu̵u̵lı̵́ na'a, yéé ho̧o̧ kə́dkə́d ká wu̵ ho̧o̧ vu̵; nɛŋ yigid ɓı̵́d ká kɔ́ nán vu̵ ɓu̵u̵lı̵́ na'a, gbɔn vu̵ hi̧naa moo moolȩ́ né, moo vu̵ gaawu̵ ú̵.

Yesu kə̧́ə̧́ hág Gálilée 'waapád

³⁵ Damnaalȩ́ máa, Yesu níḿ vúd lúú laa ya tutugu tóólı̵́, la o̧d Tayɨɨ moo wu̵lı̵́.

³⁶ Simɔ́ŋ vu̵ kan daga vu̵, vu̵ bé"u̵ soolı̵́.

³⁷ Ku̵u̵ nuŋŋɔ máa, vu̵ o̧ddu̵: “Nán 'waapád vu̵ soomɔ́.”

³⁸ A̧máa Yesu hí̧i̧d vu̵: “Ba laa ví kaa tóó vu̵lı̵́, moo mí la pad vu̵ moo to̧o̧ 'maŋ wu̵lı̵́ á̧ḿ. Mí yaa də́ń moo woo nɔ.”

³⁹ Yesu kə̧́ə̧́ hág Gálilée 'waapád, pa moo to̧o̧ 'maŋ lig sú̵ggı̵́ nán Yúúda voo vu̵lı̵́, nɛŋ yigid ɓı̵́d vu̵ á̧ḿ.

Yesu kɔ́ nán ho̧o̧ naa tóó fó̧ó̧ woo yu̵d

⁴⁰ Nán ho̧o̧ naa tóó ya nə'əy tíŋ́ Yesu woolı̵́, ká̧ńnɔ, o̧: “Tow i hí̧í̧ ú̧ tée, víń kɔ́ fó̧ó̧ míí yɛ wú̵ń yu̵d.”

⁴¹ Yesu ho̧ gíḿ gaadu̵, yo̧o̧ nag, za"u̵, o̧: “Mí hí̧í̧ sú̵'ú̵, fó̧ó̧ móó a yu̵dda ú̵.”

⁴² Vaŋná ho̧o̧ woo 'wáawu̵, fó̧ó̧ woo yu̵d zu̵u̵ ya̧g woolı̵́.

⁴³ Yesu ba"u̵ la, tiŋŋɔ,

⁴⁴ o̧: “Tée a̧m o̧d nán tóó moo yɛ sá. A̧máa a̧m la tú' fó̧ó̧ móó nán hȩn ha"ı̵́ woolı̵́, mɔ́ la ha'ad Tayɨɨ hȩn anábi Múúsa ká o̧ máa, moo nán 'waapád a gaa fó̧ó̧ móó ba yu̵d sú̵'ú̵.”

⁴⁵ A̧máa nán pee ka laa sú̵'ú̵ máa, bé' moo pee moolȩ́ ɓu̵u̵lı̵́ na'a. Moo woo nɔ ma Yesu duu dɔ́n kaa tóólı̵́ nɔ́ɔ́ na'alȩ́ né, a̧máa mbaa ya tutugulí. Ma nán vu̵ baa yaa woolı̵́ ya 'waapád.