فئلئمونا 1 - کتاب مقدس به زبان آذربایجانی جنوبی - گویشی1 پولوسدان کی، مسئح عئسانین خاطئرئنه زئنداندا دیر و قارداشیمیز تئموتاعوسدان، عزئز همکاریمیز فئلئمونا، 2 آپفئیا باجییا و بئزئم کئمی سرباز اولان آرخئپوسا و سنئن اِوئنده اولان کئلئسایا: 3 آتامیز تاریدان و رب عئسا مسئحدن سئزه فیض و سالاماتلیق اولسون. شوکور و دوعا 4 تاریما همئشه شوکور الهیئب دوعالاریمدا سنی ذئکر الهیئرم، 5 چونکی سنئن رب عئسایا و بوتون موقدّسلره اولان محبّت و ائمانینی اِشئدئرم. 6 مسئحئن خاطئرئنه سنده اولان هر یاخشی شیئن معرئفتی ائمانینین رفاقتئنده ثمرهلی اولسون. 7 چونکی گلمئشم کی، سنئن محبّتئنده چوخ شادلیق و تسلّی آلیم. اونا گؤره کی، قارداش، سنئن ساینده بوتون موقدّسلرئن اورهیی تزهلنئب. پولوسون اونسئموس اوچون خواهشی 8 بونا گؤره، گرچی مسئحده اله جسارتئم وار کی، سنه صحئح اولانین اله مهیئنه امر اله یئم، 9 آمّا بونی ترجئح ورئرم کی، محبّتئن خاطئرئنه، من پولوس کئمی بئر آدام، یاشلی و ائندی ده مسئح عئسانین بئر زئندانئسی، سندن خاهئش الهیئم. 10 اؤولادیم اونسئموس اوچون کی اونا زئنداندا آتا اولدوم، سندن بئر خاهئشئم وار. 11 او، بئر زامان سنه فایداسیز ائدی، آمّا ائندی هم سنه، هم ده منه فایدالیدیر. 12 من اونون اؤزونی کی منئم اورهیئمدئر سنئن یانینا گؤندَرمئشم. 13 ائستردئم اونی اؤز یانیمدا ساخلایام اله کی، او واختاجاق کی ائنجئله گؤره زئنداندایام، سنئن عوضئنه او منه خئدمت الهسئن. 14 آمّا سنئن راضیلیغین اولمادان ائستمهدئم هچ بئر ائش گؤروم کی، سنئن یاخشیلیغین مجبوری یوخ، اؤز ائستهیئندن اولسون. 15 بلکه ده بئر مودّت سندن آیریلماسی بونون اوچون اولدی کی، همئشهلئک سنئن یانینا قاییدا. 16 داها بئر قول کئمی یوخ، بلکی بئر قولدان دا آرتیق، بئر عزئز قارداش کئمی، خوصوصَن منه، آمّا نهقدر چوخ سنه، هم جئسمده هم ده ربده. 17 ائندی اگر منی اؤزونه بئر شرئک ساییرسان، اونی منئم کئمی قبول اله. 18 آمّا اگر سنه بئر نحو ائنن پئسلئک الهمئش اولسا، یا دا سنه بورجلی اولسا، اونی منئم حسابیما قوی. 19 من پولوس، اؤز اَلئم ائنن یازیرام کی، بونی جوبران اله رم. بونی دمک ده ائستهمئرم کی، اؤز جانینی بله منه بورجلوسان. 20 بلی، قارداش، قوی ربده سندن بئر فایدا گؤروم، اورهیئمی مسئحده تزهله. 21 سنئن ائطاعتئندن یقئنئم اولان حالدا بولاری سنه یازیرام و بئلئرم کی، حتّا ددئیئمدن آرتیغینی دا اِلئیهجکسن. 22 بو آرادا، منئم اوچون ده بئر یر حاضیرلا، چونکی اومئدئم وار سئزئن دوعالاریز سایهسئنده سئزئن یانیزا گلئم. 23 من ائنن برابر مسئح عئسادا زئندانی اولان اِپافراس، 24 همکارلاریم مرقوس، اَرئسترخوس، دئماس و لوقا دا سنه سالام گؤندَرئرلر. 25 رب عئسا مسئحئن فیضی سئزئن روحوز ائنان اولسون. |
@ 2024 Korpu Company