۱تسالونئکلیلره 1 - کتاب مقدس به زبان آذربایجانی جنوبی - گویشی1 پولوس، سئلوانوس و تئموتاعوسدان، تسالونئکلئلرئن کئلئساسینا کی آتا تاریدا و رب عئسا مسئحده دئرلر: سئزه فیض و سالاماتلیق اولسون. شوکور الهمک و دوعا 2 بئز همئشه سئزئن هامیز اوچون تارییا شوکور الهیئرئک و دوعالاریمیزدا سئزی ذئکر الهیئرئک، 3 و دائم آتامیز تاری حوضوروندا ائمانیزین ائشئنی، محبّتئزئن زحمتئنی، و ربّئمئز عئسا مسئحده اولان اومئدئزئن مؤحکملئیئنی خاطیرلاییریق. 4 ای تارینین سودئیی قارداشلار، سئزئن سچئلمئش اولدوغوزی بئلئرئک. 5 چونکی بئزئم خوش خبرئمئز سئزه آنجاق سؤز ائنن یوخ، بلکی قودرت و تارینین موقدّس روحی و چوخ یقئن ائنن سئزه یتئشدی، نجه کی، یاخشی بئلئرسئز سئزئن خاطئرئز اوچون آرازدا نجه رفتار الهدئک. 6 سئز ده بئزدن و ربدن نومونه گؤتوروب، بؤیوک سیخینتی ائچئنده کلامی موقدّس روحون شادلیغی ائنن قبول اله دئز. 7 اِله کی، مقدونئیّه و اخایئهده اولان بوتون ائمانلیلار اوچون نومونه اولدوز. 8 چونکی ربّئن کلامی سئزدن آنجاق مقدونئیّه و اخایئهیه یاییلمادی، بلکی هر یره ده کی، سئزئن تارییا اولان ائمانیزین شؤهرتی چاتیب. بونا گؤره ده بئر شی دمهیئمئزه احتئیاج یوخدور. 9 چونکی اولار اؤزلری خبر ورئرلر کی، سئز بئزی نجه قبول الهدئز و نه جور بوتلرئزدن تارییا دؤندوز کی، دئری و حقئقی تارییا خئدمت الئیهسئز، 10 و اونون اؤلولردن دئرئلتدئیی اوغلونون گؤیدن گلهجه یئنی، یعنی عئسانی گؤزلهیهسئز کی، بئزی گلهجک قضبدن قورتاریر. |
@ 2024 Korpu Company