Ester 1 - WEN GBAŊKA

¹ Diipo ate Ayasuerus a jam chim naab ate dii a nye la ale nna. Ayasuerus a jam a nya ka tɛŋsa kook ale pisiye ale siyopɔi zuk. A nyini India a ga paari Kus.

² Da ŋala po, Naab Ayasuerus a jam kali wa naam zukpaglika zuk ka Susa tɛŋka jigi pagrika a nya tɛŋka zuk.

³ Wa yaa le nya tɛŋka zuk a ga paari bena ŋata la, wa yaa nye tigi a te wa nisɔmma ale wa tomteerɔma: Persia ale Miidi kpaŋŋa ale nisɔmma meena yaa jam maa boro.

⁴ Wa jam sak ba wa jigsika ale wa naamu pimpaukku ale wa zulaŋa a paari ka da boari. Ŋa meena jam ka daa kook ale pinaanuŋ.

⁵ Ase daaŋa de ale jam taam la, naawa yaa nye tigi a te nuru baai meena ale jam bo Susa tɛŋka po la, ŋankpagsa ale bimbaansa. Daa ŋayopɔi ate wa pai a nye dila wa yenni po.

⁶ Dula ba jam pai ka garuk pala peeta ale garuk pala sobta a yaa pai mi mɔnta ale mi peeta a tuiri a yik kpana baŋsa nyiŋ a yik ŋan baai ate ba pai tana sɛ chɔgsi yenni a zaani la. Wa zukpaglik woŋsaŋa jam ka kpana ale ligmɔniŋ ate ba pai nye. Wa dɔkku tɛŋka mɛ a jam ŋmirisi kama ale mɔnuŋ ale peeluk ale sobluk ale tintain ŋaai ale a nyaksi la.

⁷ Ate ba yaa jam te ba daam ale ligmɔniŋ beerisa tɔgatɔga. Naawa yenni daamu mɛ a jam zuak kama a magsi chaab ale naawa pagrimu ale ka diila.

⁸ Ate waai meena yaa jam nyu daamu a va chaab ale naawa ale weeni diila, fifiok a jam ka, dii nyiŋla, naawa a jam lueri ka kpaga wa yenni po, ayen ba nye a magsi waai meena yaalika.

⁹ Ku ŋaaŋnyiŋ naawa powa Vasti yaa jam nye tigi a te nipooma, naamu yenni po, dii ate Naab Ayasuerus soa la.

¹⁰ A nyini daa ŋayopɔiwa danni, naawa yaa jam nyu daam a buk. Wa yaa weeni Meyuman ale Bizta ale Yarbona ale Bigta ale Abagta ale Zetar ale Karkas, tomteerɔba bayopɔi baai ale jam a tom a te Naab Ayasuerus la,

¹¹ ayen ba ta naawa powa Vasti a jam wa niŋ ale wa naam zutɔkka ate wa sak nuruma ale kpaŋŋa ale wa nala kama a magsi ayen ba a nya.

¹² Alege naawa powa Vasti yaa jam zɛri an cheŋ naawa jigi ya, ase wa ale jam tom wa tomteerɔma ayen ba wi wa la, dila nyiŋ naawa sui yaa jam puuri ate wa suinni kasim jam a dɛ.

¹³ Ate naawa yaa jam weeni wa yam nuruma, baai ale seba wie la, dii nyiŋla, ku jam magsi ayen wa nye ka dila a ta va waai ale seba kisukku ale dii ale magsi la.

¹⁴ Ku ŋaaŋnyiŋ baai ale jam a vi wa la ale Karsena ale Setar ale Admata ale Tarsis ale Meres ale Marsena ale Memukan. Persia ale Miidi kpaga ŋayopɔiwa de ale baai ale jam baga a paari wa ale wie ale ŋman chim baai ale maa de naamu niŋ la.

¹⁵ Ka boa ate ti le nye m powa Vasti a magsi chaab ale tɛŋka kisukku? Wa an jam nye Naab Ayasuerus ale weeni wa nisɔmma ayen ba weeni wa ate wa nye diila.

¹⁶ Ate Memukan yaa tulisi naawa ale wa nisɔmma niŋ ayen, naawa powa Vasti an nye kaasi daa naawa nyiini alege ka nisɔmma ale nuruma meena ale bo Naab Ayasuerus tɛŋka po la.

¹⁷ Nye kaai ate nipowa a nye la, a sak nipooma kama ayen ba a zɛri ba chorɔba noa ba nimbie po, ayen Naab Ayasuerus ale jam wi wa powa Vasti ayen wa jam la wa an jam cheŋ ya.

¹⁸ Danni de dek Persia ale Miidi tɛŋsaŋa kpaŋŋa pooma baai ale wom dii ate nipowa a nye la, ba mɛ ale zɛri, waai meena zula teka kama ale suipuurum.

¹⁹ Ase Naawa a daa yaali, wa te wari a nyini wadek jigi dii ate naawa dek an baga a tagri la ate ba ŋmarisi di a gum Persia ale Miidi tɛŋsaŋa wieŋa po ate ku weeni ayen Vasti naawa powa a kan ŋman bo Naab Ayasuerus jigi ya, abe naawa a pai wa boka jigini a te waai ale zunchoŋ wa la.

²⁰ Ate naawa wieŋa, ŋaai ate wa a yaali ayen wa nye la, yaa dan nyini wa tɛŋka po meena, nipooma meena a yaa le te ba chorɔma zula, baai ale pagi ale baai ale kan pagi la.

²¹ Ate weenika de a yɔk naawa ale wa nisɔmma sue. Ate naawa a yaa nye a magsi chaab ale wa dii ate Memukan a weeni wa la.

²² Ate wa yaa tom gbaŋsa a te nalima meena, tɛŋ meena ale tɛŋ buuri a ta va dii ate wa ŋmarisi la, a te biik meena ale nuru meena ayen wa nya wa yeri zuk, abe ba basi ate nuru meena a seba a ta nyini ba tɛŋka biika po.