2 Timoti 1 - WEN GBAŊKA

¹ Mi, Pɔɔl ale a ŋmarisi gbaŋka de. Wen ale lueri mu ayen mi chim Yeezu Kirisita tuimtomdɔ. Yeezu tom mi kama ayen m cheŋ a ga weeni nuruba Wen ale puulim ayen wa le te ba nyuvuri dii ale kan ta kpeglimka la ase ba a nin ta siaka. Nyuvunni de ate tama ta la ka bunyi ale Yeezu Kirisita.

² Mi a ŋmarisi gbaŋka de a te ka fi Timoti m dek biika Yeezu Kirisita yue nyiŋ. Ti Kowa Wen ale ti Nyɔnɔwa Yeezu Kirisita le ŋmante fu abe ba ta jiirim ale fu abe ba basi ate fi boro ale suiyɔgni.

³ Mi a te Wen dii ate mi a tom a te ale popola maŋsa ase ti kokpieŋsaŋa ale jam a tom diila jiam daa meena fi nyiŋ. Yɔk ale kantueŋ m dan boro a puusi a te fu mi a nye Wen ka jiam fi nyiŋ.

⁴ Mi a teeri diipo ate fi jam a kum la kama. M be ŋman pilim a yaali ka nna yegayega ayen m nya fu, ate m suipeentik yegayega.

⁵ M seba ayen fi makpieŋka Loyis ale fi mawa Yunis ta siaka yegayega kama ale Yeezu. Mi a teeri ayen fi mɛ ta wensie siaka kama ale wa ase bala la.

⁶ Dila ale soa ate mi a yaali ayen fi teeri diipo ate m jam pai m nisaŋa a vi fi zuk la, Wen ale jam pai wa tiirimu a te fu. Yɔgyɔgla m be ŋman a weeni fu kama ayen fi pai fi tiirimu a tom tuima.

⁷ Dii nyiŋla, chiik kaai ate Wen a jam pai a te ti la, a kan basi ate ti a chali yɔgsum ale suinum baasinsa, alege wa a basi kama ate ti a ta pagrim, ate ti a yaali nuruba abe ti a yik tidek.

⁸ Kan chali yɔgsum ayen fi weeni a sak nuruba ti Naawenni Kirisita wie. Kan chali chivie mɛ ale mi nuruba jigiya, dii nyiŋ la, ba le jam yik mi a lik dɔk po Kirisita nyiŋla. Ku nala kama ate fi mɛ maa nam Wen wamaŋsaŋa nyiŋ ate Wen a yaa pai wa pagrimu a te fu fi ninammu po.

⁹ Wen wi ti kama ayen ti chim wa nuru weleŋsa ate wa vari ti ti tuimbaata po a basi ate ti va wa. Daa tama dek tuima nyiŋ ate wa nye dila. Alege, ku jam ka wadek yaalika a ta nyini diipo ate wa an diem nye ŋanta meena tɛŋzuk dela ayen wa va Yeezu Kirisita nyiŋ a ŋmante ti.

¹⁰ Yɔgyɔgla de, ŋmanteka de ate wa a ŋmante ti la, wa yaa basi kama ate ka va ti Varibasidɔwa Yeezu Kirisita nyiŋ ate ka nyini peelim ate ti nya ka. Kirisita a jam nya pagrim kama kum zuk. Bu ŋman ka pagrimoa. Wa pai Wen wamaŋsaŋa a sak ti ka wa nyuvuri dii ale kan ta kpeglimka la.

¹¹ Wen ale lueri mi ayen m chim wa tuimtomdɔ a cheŋ ga sak nuruba wa wamaŋsaŋa.

¹² Tuimaŋa de nyiŋ abe ale soa ate mi a nam la. Alege m suinummu a diem pagra kama ate mi a sak, dii nyiŋla, m seba waai ate m ta siaka ale wa la kama. M be seba ayen wa baga nya dii ate m pai nyo wa nisa po la zuk kama a ta ga paari dai dii dai ate wa le ŋman pilim a jam la.

¹³ Mi ale jam bo ale fu la, m jam sak fu Wen wensie wieŋa ayen fu va ŋa. Yɔgyɔgla de ŋmasi yik m wensie sinsaŋŋa de nalimnyiini, ale siaka, ale yaalika, nyaŋa de ŋayewa ate Yeezu Kirisita a te ti la.

¹⁴ Wen Chiika waai ale bo ti suiniima po la ale pai wensie sinsaŋŋa a nyo ti nisima po. Be ŋmasi yik ŋa nalimnyiini.

¹⁵ Fidek seba ayen baai meena ale bo Asia tɛŋka po ale mi la a basi mi kama. Ba be ka Figelus ale Yemogenes.

¹⁶ Onesiforus ale deŋsi mi kpai a paari dii choa. Dila nyiŋla, ti Naawenni le ta jiirim ale wa ale wa dɔkdemma. Wa an jam chali chivie ale mi ba le jam yik mi a lik la nyiŋŋa.

¹⁷ Wa le jam a paari Aroom tɛŋka la, wa jam deri nyeema a gisi ka kauk kuui ate m boro la, ate wa yaa jam a nya mu.

¹⁸ Fi mɛ seba chak wa le jam maari mi yegayega dii Efisos tɛŋka la. Naawen le ta jiirim ale wa dai dii danni ate wa le ŋman pilim a jam la.