Bɔ̀zɛ̃́níriè 1 - Buamu Laa

Hɔ̀ bòo lɛ wɛ̃́ lépe vɛ̃hṹ sɔ lɛ hũn bòo

¹ Hɔ̀ bòo lɛ ɛ́ Dɔfĩn ɛ́ lɛ́ Yiezu Kirisa ǹ nɛ a zɛ̃́ní lɛ́ mí tɔntɛ́riè ǹ, ɛ́ wɛ̃́ wi lepe vɛ̃hṹ sɔ lɛ hũn. Dɔfĩn ɛ́ lɛ́ hɔ́ ɔ̀ ǹ nɛ a dàá zɛ̃́ní hɔ́pe bòo lɛ ɛ́ vaá-ɓen hũ̀nún àá bìcínbóo ɛ̀ lɛ́ ɓà ǹ. Ápe Yiezu Kirisa ɛ́ wo tɔrɛ mí mɛlɛkɛ á van ɛ́ zɛ̃́niɛ hɔ̀pe bòo sɔ ɛ́ lɛ́ mí tɔntɛ́ Zãn.

² Ɛ́ ńpe Zãn lɛ mɔn hɔ̀pe bòo lɛ ɛ́ wɔ́ míkùi ɛ́ den ɛ́ bie nɛ hɔpe bòo lɛ ɛ́ ń mɔn míkùi ɛ́ hɛ̀ iè pe Dɔfĩn bienù àá bɔ̀bín, ɛ̀ Yiezu Kirisa temu ɛ́ zɛ̃́ní kɛ́ hɔ́pe bòo sɔ ɛ́ iè bɔ̀bín.

³ Álɛ ɛ́ hɔ̀pe Dɔfĩn bòo háanírɔ́ vɛ̃hṹ sɔ lɛ ɛ̀ kɛ̀rán, àá ɓɛ́lɛ ɛ́ tɛ́ ɓɛ́ ɲɛkɛ̃̀a ɛ́ hɔ̀pe lɛ á ɛ́ kɛ̀rán ɛ̀ ɲí ɛ̀ ɓɛ̀ ɛ́ bɔ̀ hɔ̀ ɓɛ́ tĩɛ̀ lɔ̀n ɛ́ iè nìɛ lɛ ɲúuhɛ̃ ɛ́ tĩ iè hɔ̀ lɛ ɛ́ lé pɛ̃̀hṹ lɛ ɛ́ hɔ́pe bòo sɔ ɛ́ mii wé hũn ɛ́ wo ɓɛrɛ lúwi.

Zãn ɛ́ Dɔfĩn zĩhĩ́ɛ hùuɲu nìɛ dɔ̀ ɛ̀ tìɛníkɛnin

⁴ Hɔ̀ iè ǹpe Zãn ɛ́ te lepe vɛ̃hṹ sɔ lɛ ɛ́ wĩ́ ɛ́ nin lɛ́ mípe ńdɛsĩ̀riè lɛ ɛ́ wi hɔ Azii pɛ̃̀hɛ̃ Dɔfĩn zĩhĩɛ́ hùuɲu hũn: Nɛ hɔpe Dɔfĩn lɛ ɛ́ wi, ɛ̀ Hɔ̀ ɲuhṹ wi, ɛ̀ Hɔ̀ lò vaá-ɓen ɛ̀ wé hiì àá miɛ ɛ̀ Hɔ̀ lɛ́ hũn-wiɛ̀ miɛ ǹ. Nɛ pehɔ̀ Mɛkɛ̃nɛa hùuɲu lɛ ɛ́ wi pehɔ̀ bɛ́záanú wànlè híɛhɔ́ ɛ̀ lò ɓiɛ̀ wé hiì àá miɛ ɛ̀ Hɔ̀ lɛ́ ɛ̀ mì kań hũn-wiɛ̀ hũn.

⁵ Nɛ a Yiezu Kirisa lɛ ɲún ɛ́ cã̀aní, àpe lɛ ɛ́ hɔ̀ bɔ̀berà ɛ̀ munkɛ hɔ bòo míkùi hũn, ɛ̀ wé hiì àá miɛ à lɛ́ hũn-wiɛ̀ miɛ ǹ. Àpe ɛ́ temu iè ɔ̀ hán nìnbírɔ lɛ vìé lɔ́ hɔ́ húmú hũn, àpe ɛ́ temu iè ɓɛ̀ dímíɲɛ́ bɛ́zɛ̀ɓɛ̀ ɓɛ́kùi peɓɛ̀ bɛ́zuú. Ápe Yiezu Kirisa ɛ́ den wɛ kie. Piè cãani lɛ á lɛ́ ɛ́ hɔ́ koosí ɛ́ te ke ɲún ɛ́ lerɛ ɛ́ líeniɛ kè bɔ̀koohɛ̃ hũn.

⁶ À ɛ́ wɔ́ kie àá Dɔfĩn bɛ́záanú nìɛ dɔ̀, à wɔ́ kie àá khɛ̃́ndàariè lɛ ɛ́ ɓà Yàá Dɔfĩn tɔnlɔ́ ɛ̀ tɛ́. Nɛ hɔ ɓàarɔ́ àá hɔ́ pànkɛ́ ɛ̀ bòo sĩ̀-ɛ ǹ pɛ̃̀hṹ lɛ yá vé hũn. Amiina.

⁷ Ɛ́ mí húi, à wi hɔ dùndùó lɔ̀n ɛ́ ɓen. Ɛ́ ɓɛ́ nìnbirìe ɓɛ́kùi ɛ́ ɓén mi-ɛ, Hɛ̀rí ɓɛ̀pe lɛ ɛ́ hàarí tuirɛ piè dùkɛ̃́nlé. Ɛ̀ lè sṹsùnù dàa ɓɛ́kùi nìɛ Ɛ́ ɓén wírí piè bòohũn. Ũun, hɔ̀ ɓén wé kɛ̀amu, Amiina.

⁸ «Ǹpe temu iè Alifa àá Omeka, hɔ̀ bòo míkùi fìi ɓánlén àá pehɔ̀ vénlén,» Ɲunsɔ Dɔfĩn pànkɛ́ míkùi ɓàasɔ ɛ́ temu ɛ́ bie kɛ̀amu. Àpe lɛ ɛ́ wi, À ɲuhṹ wi, À lò vaá-ɓen.

Yiezu Kirisa ɛ́ zɛ̃́niɛ míte à Zãn

⁹ Hɔ̀ iè ǹpe mì zuú Zãn lɛ lò iè mì ńtɛ́ɓánlɔ̀n nùún lè lɔ̀nbiè hũn, lè Dɔfĩn bɛ́záanú hũn àá hɔ́ hũn hĩ̀nlɔ́ hũn kè ńcɛɓánlɔ́ àá ɔ́ Yiezu bòo hũn. Ɓɛ̀ hàarí ɓaa mi ɛ́ van dɔ́ lé cɛ̃̀mɛ̀nɛ́ dɔ̀ lɛ van zɔn wi hɔ ɲun-bɛhɔ́ tĩ́ihṹ lɛ ɛ́ ɓɛ́ wóò ve nɛ Patimɔɔsi lè Dɔfĩn bienù lɛ ɛ́ ń hàarí ɛ́ buie bòo hũn, àá hɔ́ bɔ̀berà lɛ á Yiezu ɛ́ zɛ̃́niɛ mi ǹ lɛ ɛ́ nín bòo bie bòo hũn.

¹⁰ Ɛ́ Ɲunsɔ sí zɔn, ɛ́ lé Mɛkɛ̃n-Sãanu ɛ́ siɛ mɔ̀ mi ǹ ɛ́ ń wo ɲɛ́ lé tɛn-bɛhɔ́ dɔ̀ niǹ máahṹ, kɛ́ lé ɛ́ tɛ̀ kɛ̀a ie bũì lɛ ɛ́ ɓɛ́ ɛ́ pìɛ́ bòo sí,

¹¹ ɛ́ bie ɛ́ nɛ làa: «Hɔ̀pe bòo lɛ ɛ́ kɔ́ loo ɛ́ kɔ́ wĩ́ kóo lé vɛ̃hṹ dɔ̀ hũn ɛ̀ tɔní ɛ̀ vɛ lɛ́ ɓɛ́ ńdɛsĩ̀rìe lɛ wi hɔ Dɔfĩn zĩhĩ́ɛ hùuɲu lɛ van wi hɔ Efɛɛzi àá Simiinɛ àá Pɛrɛkaamu àá Tiyatiire àá Saride àá Filadɛlifi àá Laodiise lóoniɛ̀ hũn.»

¹² Ɛ́ ń bĩniɛ niǹte ɛ́ nin khíi húi ɓàasɔ lɛ ɛ́ bie àá mì, ɛ́ ń khie mɔn sɛ̃́ní pɛ̃̀ntĩ́hĩ́ hùuɲu.

¹³ Ɛ̀ pehɔ̀ tĩ́ihṹ ɛ́ wìe dɔ̀ lɛ ɛ́ lɔ́ɓán àá nìnbírɔ zuú ɛ́ zɔn dɛ̃̀ nin. Ɓàasɔ ɛ́ zɔn pɔnkɔ̀rɔ́ dɔ̀ lɛ ɛ́ tóo van siɛ ɛ́ dɛ̃un piè zehĩ́, à ɛ́ can sɛ̃́ní khìrí mí kuò hũn.

¹⁴ Piè ɲún ńɲiihĩ́ ɛ́ ce pánpán kɛ̀a ie ńkuándí bòo sí, ɛ̀ piè yìe ɛ́ dɛ̃̀ kɛ̀a ie dṹn pɔnù bòo sí,

¹⁵ ɛ̀ piè zehĩ́ ɛ́ ɲiiníkɛ kɛ̀a ie hɛ̃nlɛ̀a lɛ ɛ́ tɛ̃un bɔn hɔ̀ dṹn hũn bòo sí, ɛ̀ piè tɛmu ɛ́ kɛ kɛ̀a ɲun-bɛhɔ́ lɛ ɛ́ cáa siɛ tɛmu.

¹⁶ À hàarí dàa ńpĩ́inàwuò hùuɲu mí ńdóonín núnú hũn, ɛ̀ khɛ̃́n-tɔ́nú dɔ̀ lɛ ɛ́ ɲihĩɛ́-hĩ̀ɲu ɛ́ liɛ ɛ́ hàarí ɛ́ zɔn ɛ́ lé àá piè ɲunù, ɛ̀ piè híɛhɔ́ ɛ́ hàarí ɛ́ ɲiiníkɛ kɛ̀a ie wurù lɛ ɛ́ lé wusɔndáabíi hũn bòo sí.

¹⁷ Ɛ́ bòo lɛ ɛ́ ń mɔn ɔ̀, ɛ́ ń kùerɛ siɛ piè zehĩ́ fìi hũn kɛ̀a bòo ɛ́ ń húrun. Á síɛ bɔ̀ mí ńdóonín núnú niǹ lɔ̀n à zɔn bie ɛ́ nɛ làa: «Bí zán wɛ̀! Ǹpe ɛ́ temu iè ɔ̀ hándí ɛ̀ ǹ lò iè ɔ̀ mɛ́ndí.

¹⁸ Niǹ yìe ɛ́ wi. Ń hṹn húrun, kɛ́ laà lɛ lɔ̀n ɛ́ niǹ yìe ɛ́ wi yán fúu pɛ̃̀hṹ lɛ yá vé hũn. Ń dàa pànkɛ́ hɔ̀ húmú lɔ̀n àá ɓɛ́ nìhiè lóo lɔ̀n.

¹⁹ Ɛ́ kɔ́ wĩ́ hɔ́pe bòo lɛ ɛ́ kɔ́ loo: hɔ̀pe lɛ ɛ́ wé kɛ̀a làa lɛ lɔ̀n àá hɔ́pe lɛ ɛ́ mii khíi wé máahṹ lɔ̀n.

²⁰ Ɛ́ lɛ iè hɔ̀ ńpĩ́inàwuò hùuɲu lɛ ɛ́ kɔ́ mɔn niǹ ńdóonín núnú hũn àá hɔ́ sɛ̃́ní pɛ̃̀ntĩ́hĩ́ hùuɲu lɛ ɛ́ kɔ́ lò ɛ́ mɔn pehɔ̀ ɲún: hɔ̀ ńpĩ́inàwuò hùuɲu ɛ́ iè hɔ̀ Dɔfĩn zĩhĩ́ɛ hùuɲu mɛlɛkɛɓɛ, ɛ̀ hɔ̀ pɛ̃̀ntĩ́hĩ́ hùuɲu ɛ́ iè hɔ̀pe Dɔfĩn zĩhĩ́ɛ nìɛ.»