इफिसियों 1 - पहाड़ी महासुईमसीह दी आत्मा री आशीष 1 हाऊं पौलुस ज़ुण परमेश्वरा री मौरज़ी कौरी यीशु मसीह रौ प्रेरित ऊ। तुमुलै इऐं चिट्ठी लिखाऊ ज़ुण इफिसुसा री कलिसिया दी परमेश्वरा रै लोग और यीशु मसीह दी विश्वासी ई। 2 आमारै बाब परमेश्वर और प्रभु यीशु मसीहा री तौरफा कु तुमुलै बौड़ी दया और शान्ति थाकाली मिलदै लागी। 3 आमारै प्रभु यीशु मसीहा रै बाब और परमेश्वरा रौ धन्यबाद च़ांई हुऔ। कि ज़िणौ आमै मसीह आइलै एक ई, ता परमेश्वरै आमुलै सारी आत्मिक आशीषै देइयौ ज़ो सौरगा दी ई आशीषित किऐ ई। 4 ज़िणौ परमेश्वरै आमै धौतरी चाणनै कु पैहलै मसीह दी छ़ाँटी ऐरै, कि आमै तेसरै नौज़री दी पवित्र और बेदाग औलै। 5 कैलैकि परमेश्वरै आमु आइलै प्यार कियौ और आपणी इच़्छ़ा रै भौलै मकसदा रै मुताबिक, आमै आपुलै यीशु मसीह रै ज़ौरिऐ पैहला कु आपणी सन्तान हुणा लै छ़ांटी गौऐ। 6 कि परमेश्वरा री तिऐं नोखी बौड़ी दया री बौड़ाई च़ांई हुई, ज़ो तिणीऐ आमुलै तेसरै प्यारै छ़ोहरु रै ज़ौरिऐ मुफ्त देई। 7 आमुलै मसीह दी तेसरै लोऊ रै ज़ौरिऐ छ़ुटकारौ, मतलब कि बुरै कामा री माफी, तेसरी तिऐं भौरी बौड़ी दया रै मुताबिक मिलौ आ 8 परमेश्वरै सारै ज्ञान और सौमझ़ा आइलै आमु माथै ज़रुरता कु ज़ादौ कियौ आ। 9 कि परमेश्वरै आपणी इच़्छ़ा रौ भेद भौलै इरादै रै मुताबिक आमु माथै पौगड़ौ कियौ आ ज़ो तिणीऐ मसीह दी ठाणी ऐरौ थौ। 10 और परमेश्वरै इणौ विच़ार कियौ कि बौगत पुरै हुणै माथै दी ज़ो सौरगा दी और ज़ो कुछ़ धौतरी माथै आ, तेस सारौ कुछ़ कौठै कौरीयौ मसीह कै राज़ कौरना लै देऊ। 11 तेथी दी ज़ेथदी आमै भी परमेश्वरा री मौरज़ी कौरी पैहला कु च़ुनै औन्दै री वज़ाह कु वारीस बौणै, ज़ुण आपणी मौरज़ी रै चुनाव रै मुताबिक सब कुछ़ कौरा आ। 12 कि आमु ज़ुणिऐ मसीह माथै पैहला ओउलै आश छ़ाड़ी आ, तेसरी महिमा री बौड़ाई हुआ। 13 मसीही दी परमेश्वरै तुमु माथै वायदै किऐ औन्दै पवित्र आत्मा री छ़ाप लाई आ। ज़ेबी तुमुऐ सौच़्च़ाई रौ वचन शुणौ आ, ज़ो तुमारै छ़ुटकारै री खुश-खौबरी आ, और ज़ेथ माथै तुमुऐ विश्वास भी कियौ आ। 14 कैलैकि परमेश्वरै आमुकै पवित्र आत्मा देई आ, ताकी आमै पाक्कौ कौरुलै कि परमेश्वर आमुलै औज़ौ भी आच़्छ़ी च़िज़ै दिया आ ज़ो तिणीऐ वायदौ आ कियौ औन्दौ। एऊ तेबी हुणौ आ ज़ेबी परमेश्वर पुरै तरिकै कौरी आमु आज़ाद कौरा ज़ो तेसरै लोग ई। कि तेसरी महिमा री बौड़ाई हुआ। पौलुसा री प्राथना 15 एज़ै कारणै, ज़ेबी कु मुंइऐ प्रभु यीशु माथै तुमारै विश्वास और सारै परमेश्वरा रै लोगु लै तुमारै प्यारा रै बारै दी शुणौ, 16 ता हाऊं सौदा तुमुलै परमेश्वरा रौ धन्यबाद, और आपणी प्राथना दी तुमु याद थाकाऊ कौरदै लागी। 17 हाऊं प्राथना कौराऊ कि परमेश्वर ज़ुण आमारै प्रभु यीशु मसीह रौ बाब आ और बौड़ाई जोगी आ, सेऊ तुमुकै आत्मा दिया ज़ो तुमु औकली वाल़ै चाणा आ और परमेश्वर तुमु माथै पौगड़ौ कौरा ताकी तुमै तेस ज़ाणा। 18 और हाऊं इणी भी प्राथना कौराऊ कि परमेश्वर तुमु सौच़्च़ाई सौमझ़णा लै मज़द कौरा ताकी तुमै ज़ाणा कि तिणीऐ आपणै औटाऐ औन्देऊ लै पाक्की आश देई आ, और तुमुकै पौतौ लागणौ आ कि सै केती महान और महिमावाल़ी आशीषै ई ज़ेथरौ परमेश्वरै आपणै लोगु कु वायदौ आ कियौ औन्दौ। 19 और आमु विश्वासिऊ लै तेसरी तागत नोखै रुपा दी केती महान आ। इऐ सेज़ी महान शक्ति आ 20 ज़ुणिऐ मसीह मौरै औन्दै मांझ़िया कु ज़िउंदौ कियौ और इज़्ज़त वाल़ी ज़ागाह दी ज़ो सौरगा दी परमेश्वरा री सुल़टी भिलै आ बोशाल़ौ आ। 21 सेज़ी ज़ागाह दी सारै रौंगा रै राज़ और हक्क, और तागत, और प्रभुता रै, और हर नावां माथै, ज़ो ना सिरफ एज़ै जुगा दी, पर आशणै वाल़ै जुगा दी भी निआं आ। 22 परमेश्वरै सब कुछ़ मसीह रै वशा दी कौरी ऐरौ आ और सेऊ कलिसिया रै फाइदै लै सारी च़िज़ु माथै मुख्यौ चाणी ऐरौ आ। 23 कलिसिया मसीह रौ शरीर आ, और मसीह आपणी पुरी शक्ति आमु मांझ़िऐ ला सा ज़िणौ सेऊ पुरै ब्रमांडा दी कौरा सा। |
This work is licensed under Creative Commons Attribution-ShareAlike 4.0 License.